a) Lege Provinziala di 30 de aurì dl 1991, n. 131)
Ordinamënt nü di sorvisc soziai tla Provinzia de Balsan

(1) Por sostignì sües ativitês po la Provinzia ti conzede contribuć por spëises de investiziuns y cosć corënć por alplü 85 porcënt dles spëises che vëgn reconesciüdes sciöche ametüdes ai ënć publics o privać de ütl publich che operëia tla provinzia de Balsan cun ativitês soziales sciöche da so statut y aladô dla legislaziun provinziala varënta, por daidé curì en pert cosć determinà dles ativitês metüdes a jì y por tó pert ales spëises che à da nen fà cun l’esecuziun de inćiaries istituzionales che reverda:

1. la gestiun di sorvisc y l’atuaziun de ativitês soziales odüdes danfora dala legislaziun provinziala varënta tla materia di sorvisc soziai che jô en general ala realisaziun di fins dà dant tl articul 1;
   
2. la gestiun de colonies por vacanzes, camping y ćiases por vacanzes;
   
3. les ativitês por mantignì la vita deboriada y por promöie les relaziuns soziales dles porsones y di grups dà dant tl articul 1, coma 3, lëtra c) tles formes desvalies dla vita de comunité sciöche ativitês de club, scomenciadies tl tëmp lëde, de educaziun soziala sciöche inće sojornanzes por vacanzes y ativitês analoghes;
   
4. l’atuaziun de proieć por porvè fora formes d’assistënza nöies;
   
5. l’atuaziun de ativitês de consulënza y de patronat sciöche inće de agregaziun soziala a bëgn de porsones che à n bojëgn particolar de aiüt sozial;
   
6. l’atuaziun de scomenciadies de informaziun y de sensibilisaziun dla popolaziun por ći che reverda argomënć de interès sozial y i sorvisc soziai;
   
7. l’atuaziun de cursc de formaziun, recualificaziun y d’ajornamënt dl personal y dles porsones volontares che laôra ti sorvisc soziai;
   
8. l’atuaziun de stüdi y inrescides tl ćiamp sozial;
   
9. l’atuaziun de scomenciadies de autoaiüt;
   
10. la tuta en afit de imobii che é destinà a fins de assistënza soziala;
    
11. la cumpra, la costruziun, la restrotoraziun generala o parziala, la reparaziun y la manutenziun de imobii destinà daldöt o en pert a ativitês de assistënza, sciöche inće la cumpra y la restauraziun de mebli, aredamënt, mesi de trasport y d’atri stromënć che va debojëgn por l’ativité d’assistënza soziala;
    
12. les ativitês de federaziun y la coordinaziun danter i ënć.
    

(2) I criters y les modalitês por conzede y paié fora i contribuć, sciöche inće i documënć che va debojëgn y le terminn por dè jö les domandes vëgn stabilis cun regolamënt d’esecuziun.

(2/bis) I bëgns alisirà é sotmetüs a lian de destinaziun a bëgn dl’ativité d’assistënza soziala. Cun la presentaziun dla domanda de alisiramënt é i ënć oblià da respetè chësc lian de destinaziun. Tl regolamënt d’esecuziun preodü dal coma 2 vëgnel stabilì la dorada y les modalitês dl lian aladô dles sorts desvalies di bëgns alisirà, sciöche inće les modalitês de retüda dl contribut tl caje de na venüda o de na mudaziun dl lian de destinaziun dl bëgn alisiré. 38)

(3) Tl regolamënt d’esecuziun preodü dal coma 2 vëgnel inće regolè chi caji olache le contribut mascimal dl 85 porcënt stabilì tl coma 1 po gnì alzè ćina al mascimo dl 95 porcënt dla spëisa reconesciüda sciöche ametüda, por gauja de n bojëgn temporann straordinar.

(3/bis) Tl caje de domandes presentades da sogeć privać che à stlüt jö acordanzes o contrać cun i ënć de gestiun di sorvisc soziai aladô de ći che vëgn preodü dal articul 12, coma 2 po le contribut mascimal dl 85 porcënt por la cumpra, la costruziun o la restrotoraziun de imobii gnì alzè ćina al 95 porcënt dla spëisa reconesciüda sciöche ametüda. Tl caje de venüda o de mudaziun dl lian de destinaziun mëss le contribut gnì retü. 39)

(4) Por garantì la continuité dles ativitês di ënć indicades tl coma 1 y sön domanda di ënć interessà, po le diretur dla Repartiziun provinziala Sorvisc sozial conzede, zënza tignì cunt dl’aprovaziun dl plann anual, n’antizipaziun de indöt 70 porcënt di contribuć autorisà, che é gnüs indöt conzedüs tratan l’eserzize finanziar dan da chël a chël che la domanda fej referimënt; les spëises aladô dl articul 50, coma 6 dla lege provinziala di 26 d’aurì dl 1980, n. 8 po inće gnì liades ala destinaziun. Chëstes antizipaziuns po ma gnì conzedüdes por spëises de gestiun.

(5) L’ofize provinzial competënt por i contribuć po te vigni momënt pretëne de tó en vijiun i documënć de contabilité originai y mëte a jì ispeziuns tles sëntes di ënć benefizià. 40)