(1) La violaziun di dovëis de sorvisc y de comportamënt, sciöche ince dles desposiziuns penales da pert dl personal porta pro, aladô dla gravité dl’infraziun, al’aplicaziun de chëstes sanziuns disciplinares, do le prozedimënt disciplinar:
- amoniziun;
- reduziun dl paiamënt;
- sospenjiun dal sorvisc;
- lizenziamënt cun preavis;
- lizenziamënt zënza preavis.
(2) Da dé sanziuns disciplinares vëgnel tigní cunt de chisc criters generai:
- dl’intenzionalité dl comportamënt, dl degré de negligënza, dl’imprudënza o dla mancianza de esperiënza y ince dla prevedibilité dl evënt;
- dla gravité dla violaziun;
- dles responsabilités coliades ala posiziun dla dependënta/dl dependënt;
- dl degré de dann o de prigo gaujé al’aministraziun, ales utëntes/ai utënc o a terzi o le dejsorvisc gaujé;
- dl'esistënza de situaziuns de reduziun y agravamënt, tignon dantadöt cunt dl comportamënt dl personal, de straufunghes disciplinares da denant, ti dui agn preodüs dala lege, y dl comportamënt ti confrunc di utënc;
- dl concurs al’infraziun de de plü dependënc a öna;
- dla grandëza y dla proporzionalité dles sanziuns en relaziun ala gravité dl’infraziun.
(3) Sön la basa di criters preodüs dal coma 2 pól gní dé ince na sanziun disciplinara plü o manco grana danter chëres preodüdes dal coma 1.
(4) Les mancianzes nia preodüdes espressamënter vëgn a vigni moda straufades aladô di criters preodüs dal coma 2, fajon referimënt, por ci che reverda l’individuaziun di fac sanzionabli, ai dovëis de sorvisc y de comportamënt preodüs dal articul 15, y por ci che reverda la sort y la mosöra dles sanziuns, ai prinzips che vëgn dai articui da 35 a 39.
(5) Le dann gaujé al’aministraziun o a terzi por faziun dl comportamënt premedité o dër negligënt dl personal en sorvisc comporta a vigni moda le dovëi da rete le dann aladô dles normes varëntes.