(1) Al vëgn istituì l’Indesc dles porsones litades y nominades dla Provinzia de Balsan.
(2) Al vëgn istituì pro la Presidënza dla Junta provinziala che à l’inćiaria da le tignì y da l’ajornè. Al sarà poscibl da ti rové pormez al Indesc tres internet.
(3) Chësc Indesc tol ite dötes les porsones che é gnüdes litades y/o nominades dal Consëi provinzial, dala Junta provinziala o da assessurs provinziai. Porsones litades y/o nominades é porsones che vëgn cherdades dai ënć che les à litades y/o nominades a i rapresentè te sozietês cun partezipaziun dla Provinzia, te gremiums de rapresentanza de vigni sort, te ënć stromentai, te agenzies y fondaziuns.
(1) Al vëgn odü danfora che pro vigni inom sön l’Indesc dles porsones litades/nominades él da injuntè sües inćiaries, süa posiziun, la soma de sü onorars, les indenisaziuns, les reduziuns y vigni ater vantaje economich.
(2) Implü mëss l’Indesc inće tó ite la detlaraziun dla porsona interessada por ći che reverda l’eserzize de funziuns d’aministradù o de mëmber dl consëi de control de na sozieté cun l’ajunta dla formula “Sön mi onur confermëii che chësta detlaraziun ti corespogn ala verité”.
(3) Implü tol ite l’Indesc i fins, i statuć y la composiziun di organns di ënć y dles sozietês odüs danfora dal articul 1.
(4) Vigni ann vëgnel publiché na relaziun sön i obietifs y les ativitês di ënć y dles sozietês odüs danfora dal articul 1.
(1) Vigni mudaziun di dać dà dant tl articul 2 ti mëss gnì comunicada tl tëmp de 60 dis ala Junta provinziala che ajornarà l’Indesc te 30 dis.
(1) Por curì les spëises di intervënć che resultëia da chësta lege a ćiaria dl eserzize finanziar 2011 y che vëgn aratades de alplü 12.000 euro, vëgnel tut ca les cuotes de stanziamënt ćiamò desponibles sön l’UPB 02130 dl bilanz provinzial 2011.
(2) Les spëises a ćiaria di agn finanziars che à da gnì vëgn stabilides cun la lege finanziara anuala.
Chësta lege gnarà publicada tl Boletin Ofizial dla Regiun. Vignun a chël ch’al ti speta é oblié da la respetè y da la fà respetè sciöche lege dla Provinzia.