b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1)  Pro vigni comun vëgnel metü sö n zënter operatif por la proteziun zivila. I comëmbri dl zënter operatif comunal vëgn nominà dal consëi de comun y à le dovëi de sostignì l’ombolt o l’ombolta tla previjiun, tla prevenziun y tl’atuaziun dles mosöres da tó te caji de catastrofes. Por chësc fin vëgnel elaborè n plann sön la basa de modei che l’Ofize por la proteziun zivila dla Provinzia mët a desposiziun; chësc vëiga danfora:

1. l’istituziun di sorvisc de segnalaziun, d’alarm y de pröm aiüt;
   
2. l’individuaziun di posć y di raiuns che é manacià aladô dla sort de prigo;
   
3. la constataziun dles desponibilitês de personal, de mesi y echipamënć, ressurses, vivandes y infrastrotöres tl raiun de comun;
   
4. l’individuaziun de locai y strotöres da adorè por operaziuns de pröm aiüt, sciöche magazinn y cuartiers d’emergënza;
   
5. la realisaziun de sorvisc de coliamënt;
   
6. l’elaboraziun de normes diretives por les situaziuns d’emergënza desvalies;
   
7. la lista dles assoziaziuns de volontariat por la proteziun zivila reconesciüdes.
   

(2)  Le numer dles porsones che fej pert dl Zënter operatif comunal, presidié dal ombolt/dala ombolta o da na porsona da ël/da ëra delegada, depënn dal numer di abitanć y dala grandëza dl raiun comunal. Dl Zënter operatif comunal mëssel te vigni caje fà pert le comandant/la comandanta dl Corp di stödafüch de profesciun dl comun de Balsan y ti atri comuns n comandant/na comandanta di Corps di stödafüch volontars y le presidënt/la presidënta dla comisciun por les lovines, olache ara é. Implü pol fà pert dl Zënter operatif comunal inće i rapresentanć y les rapresentantes di ofizi destacà dl’aministraziun provinziala y inće dles assoziaziuns de volontariat por la proteziun zivila reconesciüdes. Le personal dla Repartiziun provinziala Bosć vëgn metü en sorvisc por l’esecuziun dles ativitês relatives, sce al vëgn nominé mëmber dl Zënter operatif comunal. Le Zënter operatif comunal resta de regola tl’inćiaria por la dorada dla legislatöra o almanco ćina so renovamënt. 3)

(3)  Vigni comun ti ortiëia al Comitê provinzial por la proteziun zivila na copia di planns comunai y inće dötes les dates che va debojëgn por l’elaboraziun dl plann provinzial de proteziun zivila.