(1) Por emergënza capëscion aladô de chësta lege n avenimënt che manacia la vita, la sanité o l’assistënza de basa de n gröm de porsones o tiers, o che manacia o danejëia l’ambiënt y d’atres condiziuns fondamentales por la vita dla popolaziun a na manira che aiüt y proteziun po ma gnì garantis sce les strotöres dla proteziun zivila, les autoritês, i sorvisc y les organisaziuns de pröm aiüt competënć é sotmetüs a n’organisaziun y na gestiun unitara.
(2) Le presidënt o la presidënta dl Zënter operatif provinzial surantol la direziun y la coordinaziun di sorvisc de proteziun zivila a livel provinzial y tol tres le Zënter operatif provinzial i provedimënć nezesciars.
(3) Chi che constatëia caji de prigo mëss informè l’ombolt o l’ombolta dl comun interessè o la Zentrala provinziala d’emergënza. Inće les aministraziuns statales y i ofizi por la segurëza publica à le dovëi de ti dè segnalaziuns al Comissariat dl Govern y ala Zentrala provinziala d’emergënza.
(4) Canche la situaziun de prigo o de dann pê particolarmënter agravanta a gauja de süa dimenjiun o intensité detlarëia le Presidënt dla Provinzia sön proposta dl presidënt o dla presidënta dl Zënter operatif provinzial la situaziun d’emergënza y determinëia la zona interessada dl teritore provinzial y la dorada dla situaziun d’emergënza.
(5) La detlaraziun preodüda dal coma 4 ti vëgn comunicada al Comissar o ala Comissara dl Govern acioche i provedimënć preodüs dal articul 9 pois gnì tuć y ai comuns interessà. I ombolć o les omboltes de chisc lascia al savëi la situaziun d’emergënza cun vigni meso conveniënt. Por la difujiun se crüzia inće la Junta provinziala tres la stampa, le radio, la televijiun o te val’atra manira adatada.
(6) Por l’atuaziun di provedimënć d’emergënza do la detlaraziun dla situaziun d’emergënza tol le Presidënt dla Provinzia inće ordinanzes d’emergënza desvian dales desposiziuns revardëntes les materies de competënza dla Provinzia mo respetan i prinzips generai dl ordinamënt iuridich.
(7) Tl caje de dann ales costruziuns preodüdes dal articul 19 dl decret dl Presidënt dla Republica di 22 de merz dl 1974, n. 381, che reverda les competënzes resservades ai organns de stat o sce al va debojëgn de intervënć dl’aministraziun statala, comunichëia i ombolć o les omboltes domandes eventuales diretamënter ales aministraziuns interessades y inće al Ofize por la proteziun zivila cun le meso plü snel poscibl.