(1) I contribuć preodüs dal articul 2, coma 1, lëtra K), à le fin de ti alisiré l’azès al marćé lëde di cuartiers en afit ai afitadins cun entrades basses. Aladô de chësc articul vëgnel conscidré afitadins cun entrades basses i damananć che à i recuisić generai por gnì ametüs ai alisiramënć dl frabiché provinziai y che à n paiamënt che ne n’é nia plü alt co le secundo scalin de davagn preodü dal articul 58.
(2) L’aiüt finanziar por l’abitaziun ne ti vëgn nia conzedü ai:
- damananć olache i geniturs à abitaziuns che à n valur convenzional majer co la mosöra preodüda dal articul 46, coma 2, o che à n patrimone imobiliar majer co la soma preodüda dal articul 47, coma 3 y dal regolamënt de esecuziun che alda laprò;
- afitadins de abitaziuns dl IPFS y d’atri ënć publics;
- damananć che à afité abitaziuns de parënć o porsones parentades tres matrimone de pröm degré;
- damananć che subafitëia na pert dl’abitaziun;
- damananć che à en afit d’atres abitaziuns por les afité inant.
(3) Les porsones singoles che ne mëss nia paié i alimënć y i pêrs zënza mituns ciafa l’aiüt finanziar por l’abitaziun aladô di criters stabilis dala Junta provinziala.
(4) Ma ai afitadins che é titolars de n contrat de locaziun de n’abitaziun nia de lus ti vëgnel conzedü le contribut. I afitadins che ciafa l’aiüt finanziar ne po nia afité a d’atri l’abitaziun o na pert de chësta, scenò ti vëgnel tut le contribut.
(5) L’aiüt finanziar por l’abitaziun vëgn conzedü por n ann alalungia. I contribuć vëgn conzedüs pian ia dal pröm mëis do che al é gnü dè jö la domanda y ai vëgn paià fora dedô por i mëisc bele passà dala presentaziun dla domanda, y vigni mëis por le rest dl ann, sce le raport de locaziun ê bele y é. Denant che l’ann por chël che al é gnü conzedü l’aiüt finanziar passes, vëgn le benefiziar damanè de ortié la documentaziun che va debojëgn por conzede inant l’aiüt finanziar.
(6) Sön domanda ti trasferësc l’assessur provinzial por le frabiché abitatif vigni mëis ai aministradus dl aiüt finanziar por l’abitaziun n dodejim dl contribut al ann preventivé, ater co tl caje de avaliamënt dl mëis de dezëmber. I aministradus dl aiüt finanziar por l’abitaziun ti sotmët vigni ann ala Junta provinziala le decunt di contribuć paià fora y conzedüs por l’aprovaziun.
(7) L’aiüt finanziar por l’abitaziun che po gnì conzedü ai damananć vëgn stabilì aladô dla capazité economica dla familia dl damanant. Por la valutaziun dla capazité economica dla familia vëgnel apliché i criters nüs por la valutaziun dla capazité economica, determinà cun regolamënt de esecuziun de chësta lege.
(8) L’aiüt finanziar por l’abitaziun ne po indöt nia superè i 6.000,00 euro al ann a familia. I contribuć de manco co 50,00 euro al mëis ne vëgn nia paià fora. L’aiüt finanziar por l’abitaziun vëgn conzedü ti limić dles ressurses finanziaries desponibles al ann. Te caji particolars, motivà aladô, po la Junta provinziala mudé chëstes somes. 151)
(9)152)
(10) Les somes preodüdes dal coma 8 po gnì adatades cun deliberaziun dla Junta provinziala tignin cunt dl cost dla vita.153)
L'art. 91, coma 8 é gnü sostituì insciö dal art. 1, coma 9 dla l.p. di 13 de jügn dl 2012, n. 11.
L'art. 91, coma 9, é gnü abroghè dal art. 23, coma 6, dla L.P. di 17 de jenà dl 2011, n. 1.
L'art. 91 é gnü mudé dal art. 44 dla L.P. di 3 de mà dl 1999, n. 1, y dal art. 25 dla L.P. di 10 d’agost dl 2001, n. 8, y spo insciö sostituì dal art. 1, coma 25, dla L.P. di 13 d’otober dl 2008, n. 9. Ćiara inće l'art. 2 dla L.P. di 13 d’otober dl 2008, n. 9.