(1) L'organ competënt por le prozedimënt disciplinar mët a jí le prozedimënt disciplinar sön la basa dla segnalaziun dla superiura direta/dl superiur diret o d'ofize y se crüzia che al vëgnes atira metü por scrit la contestaziun ala dependënta/al dependënt.
(2) Le personal pó presenté sües controdeduziuns ti 20 dis do la contestaziun dl’acüsa. Le personal o, sön autorisaziun formala, süa porsona de crëta o süa rapresentanta/so rapresentant dl'assoziaziun sindacala de chëra che al fej pert o a chëra/chël che al ti á surandé le mandat, pó ti rové pormez a düc i ac d’inrescida che reverda so prozedimënt. Le termin nominé dessura ti mëss ince gní conzedü al personal vigni iade che al vëgn fat na mudaziun o integraziun dla contestaziun o al vëgn tut sö documentaziun nöia. Vigni mudaziun o integraziun dla contestaziun mëss gní fata por scrit. Sce an ne tëgn nia ite le termin di 20 dis toma la prozedöra disciplinara.
(3) Le personal vëgn convoché dala responsabla/dal responsabl dl prozedimënt disciplinar, tl respet dl termin preodü dal coma 2, por che al pois se defëne; al pó s’anuzé dl'assistënza eventuala de na porsona de crëta o de na rapresentanta/n rapresentant dl'assoziaziun sindacala de chëra che al fej pert o che al á inciarié.
(4) Do avëi stlüt jö la prozedöra d’aldiziun tres la responsabla/le responsabl dl prozedimënt disciplinar dá chësta ultima/chësc ultim la sanziun disciplinara o comana l'archiviaziun y ti le lascia alsavëi ala porsona interessada y a süa superiura direta/so superiur diret. Sce la porsona interessada ne se presentëia nia por rajuns iustificades, se crüzion de na convocaziun nöia. Te chësc caje pëia ia le termin preodü dal coma 5 dala data dla convocaziun nöia.
(5) Le prozedimënt disciplinar, cun lapró la sospenjiun preventiva eventuala dal sorvisc, se röia te 120 dis dala data dla contestaziun, ater co sc'al vëgn dant la sospenjiun aladô di articui 40 y 41. Sön domanda dl personal pó le prozedimënt ince gní tigní sö, cun indicaziun dl termin che alda lapró, por ti conzede ala porsona interessada che é te condiziuns psico-fisiches particolares da fá na terapia o por controlé sce al é les condiziuns por lauré inant. Sce le prozedimënt disciplinar é gnü tigní sö pëia ia le termin preodü dessura dala data de reativaziun dl medemo prozedimënt. Le prozedimënt disciplinar se röia a vigni moda sce al passa 120 dis zënza che al vëgnes tut val’ mosöra dl prozedimënt.
(6) Cun le consëns scrit dl personal pó la sanziun aplicabla gní smendrida; te chësc caje ne pó la sanziun disciplinara nia plü gní contestada.
(7) Le prozedimënt disciplinar por dé l’amoniziun ti pó gní delegada dales aministraziuns al personal dirigënt.
(8) Tl caje che al vëgnes metü a jí n prozedimënt disciplinar o che al vëgnes dé na sanziun disciplinara, pó le paiamënt dla premia de basa de produtivité por le tëmp de valutaziun che alda lapró gní sospenü, refusé o smendrí. Implü pól te chësc caje ince gní temporaneamënter sospenü o smendrí les indenités diretamënter coliades cun l’ativité contestada.