(1) Chi che gauja, nce zënza ulëi, la cuntaminazion efetiva o putenziela de na spersa o che gauja n pericul cuncret y atuel de cuntaminazion, muessa se cruzië sun si spëises di ntervënc de segurazion, de bonificazion y de recostituzion dla sperses mpaziedes y di mplanc che gauja l pericul de mpaziamënt. A chësc fin:
- ti muessel unì comunicà tl tëmp de 48 ëura al’Agenzia provinziela y al chemun teritorialmënter cumpetënt coche ie la situazion de mpaziamënt y ciun che ie l pericul cuncret y atuel de mpaziamënt dla spersa;
- ti muessel unì comunicà, tl tëmp de 48 ëura do la nutificazion nunzieda pra l pustom a), ala medema autoriteies destinateres ënghe nunziedes pra l pustom a) ciuni che ie i pruvedimënc de segurazion adotei per schivé che la situazion de mpaziamënt o l pericul de mpaziamënt devënte pieces, per limité la fazions dl dann y smendrì l risch ambientel.
- muessel unì prejentà, tl tëmp de 30 dis dala ntraunida che à gaujà l mpaziamënt, o da canche n se à ntendù dla situazion de pericul, l proiet de bonificazion dla sperses mpaziedes aldò dl articul 40.
(2) I organs publics, che tl eserzize de si funzions istituzioneles se ntënd de sperses cun n livel de mpaziamënt plu aut di lims udui danora, ti l fej al savëi al’Agenzia provinziela y al chemun; chësc cumanda l respunsabl dl mpaziamënt de tò pruvedumënc aldò dl articul 40.
(3) I ntervënc de segurazion, de bonificazion y de recostituzion ambientela vën realisei d’ufize dal chemun teritorialmënter cumpetënt, do l’apurvazion aldò dl articul 40, a cëria dl respunsabl o dl detenient ratà curespunsabl, ti caji tlo cumpedëi sù:
- sce l respunsabl dl mpaziamënt ne ie nia da ndividué y l patron dl terac, che vën ratà curespunsabl, ne tòl degun pruvedimënc;
- sce l respunsabl dl mpaziamënt ie da ndividué, ma l ne fej nia, y sce nce l patron dl terac, che vën ratà curespunsabl, o n auter soget nteressà ne tòl degun pruvedimënc;
- sce l terac da bonifiché ie na puscion de proprietà publica y l respunsabl dl mpaziamënt ne ie nia da ndividué o ne tòl degun pruvedimënc.
(3/bis) Sce l chemun ne se cruzia nia aldò dl coma 3 possa la Provinzia ntervenì mpede ël. Te chësc cajo ie la spëisa a cëria dl chemun, ora che sce l se trata de n nteres generel. 19)
(4) I ntervënc de segurazion, de bonificazion y de recostituzion ambientela costituësc na cëria reéla sun la sperses mpaziedes. La cëria reéla muessa unì data sëura tl zertificat de destinazion urbanistica da relascé aldò dla despusizions valëivles.
(5) Per la spëises abudes per i ntervënc de segurazion, de bonificazion y de recostituzion ambientela vel l dërt de privilegh dla cosses imuvibles aldò y per la fazions dl articul 2748, coma 2 dl codesc zevil. Chësc dërt de privilegh possa nce unì dejëut a desvantaje dla rejons, che terzi à acuisì sun l bën imubil. Per la speises nunziedes vel oradechël nce l dërt de privilegh generel imubilier.
(6) Tl cajo che l mudamënt de destinazion urbanistica de na spersa cumporte l’aplicazion di lims d’azetabltà de mpaziamënt plu rigurëusc, fissei aldò dl articul 40, coma 4, pustom a), muessa l nteressà pruzeder a si spëises ai ntervënc de bonificazion che ie de bujën n basa a n proiet aposta, che ie da apurvé aldò dla modaliteies nunziedes te chësc articul.