(1) La costruziun d´insediamënć, frabicać y implanć che ne desćiaria nia les eghes pazes de ćiasa tla rëi de canalisaziun, de stabilimënć che vëiga danfora la desćiaria de eghes pazes industriales y inće de rëis de canalisaziun y de sarenares por eghes pazes comunales é sotmetüs al´aprovaziun dl ombolt por les categories aladô dla injunta M y dl´Agenzia te düć i atri caji, tut fora les desposiziuns dla lege provinziala dl 24 de messè 1998, n. 7 y mudaziuns suandëntes.
(2) Por l´aprovaziun dles costruziuns y di implanć aladô dl coma 1 mëssel gnì menè ite adöm ala domanda de conzesciun da frabiché la documentaziun tecnica che contëgn:
- la descriziun di insediamënć, y tl caje de stabilimënć, dl ziclus de produziun y dles materies prömes y intermesanes adorades, dla capazité de produziun y dl bojëgn d´ega;
- l´indicaziun dla cualité y dla cuantité dles eghes pazes da desgorje;
- l´indicaziun dl implant olache les eghes pazes vëgn desćiariades;
- la descriziun di sistems de canalisaziun y de tratamënt;
- vigni atra informaziun y indicaziun aladô de criters y modalitês da definì cun regolamënt d´esecuziun.
(3) Pro la lîta di implanć y di tratamënć de depuraziun mëssel gnì tignì cunt dles mius tecniches desponibles, dl bojëgn d´avëi injins assà por garantì la continuité dl tratamënt, tut fora les interuziuns por manutenziun straordinara o por dagns, y de ći che gnarà definì cun regolamënt d´esecuziun.
(4) Ti caji olache al é damanè l´aprovaziun da pert dl´Agenzia damana l´ombolt, do avëi ciafè la domanda de conzesciun da frabiché, n arat liënt sön le proiet al´Agenzia che se pronunziëia tl tëmp de 60 dis. Te de te’ caji dà jö l'Agenzia so arat inće por les costruziuns y les desćiaries de competënza dl ombolt aladô dl’injunta M. 30)
(5) Cuntra la dejaprovaziun di proieć o cuntra les prescriziuns contignides tl´aprovaziun pol gnì fat recurs tl tëmp de 30 dis dala notificaziun dl provedimënt al´Agenzia por les costruziuns y les desćiaries aladô dla injunta M y al comitê ambiental 31)aladô dl articul 12 dla lege provinziala dl 24 de messè 1998, n. 7 tla verjiun varënta, por düć i atri caji.
(6) La dezijiun sön i recursc aladô dl coma 5 é definitiva.
L'art. 38, coma 4, é gnü sostituì insciö dal art. 14, coma 18, dla L.P. di 10 de jügn dl 2008, n. 4.
L'art. 34 dla L.P. di di 5 d’aurì dl 2007, n. 2 à sostituì la denominaziun "Comitê VIA" cun la denominaziun "Comitê ambiental".