a) Lege provinziala di 18 de jügn 2002, n. 81) —
Desposiziuns sura les eghes

(1)  Chësta lege regolëia l´utilisaziun y la sconanza dles eghes dla provinzia de Balsan por arjunje i obietifs suandënć:

1. prevenziun y reduziun dl incuinamënt y ressanamënt dles eghes incuinades;
2. mioramënt dla condiziun dles eghes y mosöres de sconanza adeguades por eghes cun lians d´adoranza particolars;
3. promoziun de n´adoranza persistënta y de dorada dles ressurses dal´ega cun priorité al´ega da bëre;
4. mantignimënt sides dla forza naturala de autodepuraziun dl´ega che inće dla capazité de garantì la lerch vitala a comunitês amples y desvalies de tiers y plantes.

(2)  I obietifs aladô dl coma 1 vëgn arjunć tres les ativitês y i provedimënć suandënć:

1. individuaziun di obietifs de cualité ambientala por les eghes y di obietifs de cualité por les eghes cun destinaziun d´adoranza particolara;
2. sconanza integrada di aspeć cualitatifs y cuantitatifs de vigni raiun idrografich y sistem de controi y sanziuns adeguè;
3. osservanza di valurs limo d´emisciun por desćiaries odüs danfora da chësta lege;
4. adatamënt dles rëis de canalisaziun y dles sarenares por les eghes pazes comunales ales desposiziuns de chësta lege;
5. determinaziun de mosöres por la prevenziun y la reduziun dl incuinamënt;
6. determinaziun de mosöres por la conservaziun, le reziclaje, la reutilisaziun y le sparagn dles ressurses dal´ega.