(1) La Junta provinziala é autorisada a inćiarié l’Uniun provinziala di Corps di stödafüch volontars o n ater ënt adatè ala gestiun dla Scora di stödafüch provinziala che organisëia y tëgn cursc de formaziun teoretics y pratics por i comëmbri di Corps di stödafüch.
(2) La formaziun po inće tó ite periodes d’istruziun te istituziuns, scores y zëntri de formaziun fora de Südtirol o foradecà.
(3) La Scora di stödafüch provinziala po inće tignì cursc cuntra le medefüch y de proteziun zivila y cursc de segurëza sön le laûr ti ćiamps desvalis preodüs dales leges varëntes en materia. 24)
(4) Por les ativitês preodüdes dai comes 1, 2 y 3 é la Scora di stödafüch provinziala reconesciüda sciöche scora adatada a tignì les ativitês de formaziun aladô de chësta lege.
(5) La Scora di stödafüch provinziala relascia zertificać de frecuënza y, do avëi dè jö i ejams, inće diploms legalmënter varënć.
(6) La formaziun é debann por i volontars y les volontares che fej pert dles organisaziuns dl sorvisc cuntra le medefüch y de proteziun zivila.
(7) Le consëi d’aministraziun dl’Aziënda speziala se fistidiëia por cunt dla Junta provinziala dl finanziamënt di cursc de formaziun y dl control dla realisaziun regolara di cursc; implü pol inće autorisé l’atuaziun de cursc a paiamënt, determinan les tarifes, y stabilì l’adoranza dl imobil, fissan tarifes d’afit eventuales.
(8) Por l’ativité de formaziun dla Scora di stödafüch provinziala à l’ënt inćiarié le dërt al rembursamënt dles spëises che corespogn al preventif aprovè dal consëi d’aministraziun dl’Aziënda speziala. Tl tëmp de 30 dis dal mëteman dl ann de scora inant ti vëgnel dè al ënt inćiarié n’antizipaziun dl 40 por cënt dl preventif de spëisa aprovè. N’atra antizipaziun dl 30 por cënt vëgn conzedüda do sis mëisc. La licuidaziun dl import che resta gnarà fata do la presentaziun dl cunt consuntif regolar che mëss gnì aprovè dal consëi d’aministraziun dl’Aziënda speziala.
(9) Le program y le preventif dles spëises mëss gnì presentè al consëi d’aministraziun ćina al pröm de otober dl ann prezedënt.
(10) Por tignì les ativitês dla Scora di stödafüch provinziala y dles Uniuns di Corps di stödafüch volontars preodüs dal articul 2, coma 3, vëgnel metü debann a desposiziun dl ënt inćiarié i imobii cumprà por chësc fin dala Provinzia autonoma de Balsan.
(11) La manutenziun ordinara dles strotöres aladô dl coma 10 ti speta al ënt inćiarié; la manutenziun straordinara y dötes les spëises che deröia dal’aplicaziun dl decret legislatif di 19 de setëmber dl 1994, n. 626, é a ćiaria dl bilanz dla Provinzia; i laûrs po gnì fać dal ënt inćiarié y les spëises albüdes ti gnarà retüdes.