(1) La ates di mpënies de spëisa vën adotedes tl respet dl orden dla cumpetënzes stabilì dala normativa provinziela tla materia dla urganisazion di ufizies y dla pruzedures aministratives y tl cheder dla ressurses asseniedes.
(2) I mpënies de spëisa daussa mé unì fac a cëria dl bilanz de previjion per l eserzize curënt, ti lims di stanziamënc apurvei dala Jonta provinziela sun i capituli de purtenienza dl plann de gestion nunziei tl articul 12.
(3) Duta la somes, che la Provinzia ie debit n basa a leges, cuntrac y d’autri tituli de dërt a creditëures determinei o determinabli, forma mpënies dl eserzize, sce la ublianza curespundënta destoma tl lim de tëmp dl eserzize.
(4) La somes che l’aministrazion vëij danora n basa a cuntrac, de chëi che la stipulazion ie unida autoriseda, coche nce la somes che l’aministrazion vëij danora de dé ora tla forma de cuntribuc sun operazions de mprëst o d’autra formes de finanziamënt, forma mpëni tl bilanz dl eserzize n basa ala ates curespundëntes, cun chëles che l benefize ie unit cunzedù; chësc vel ënghe sce la stipulazion dl cuntrat o la cuntlujions dla operazions de credit ne vën nia dejëutes nchin ala fin dl eserzize.
(5) I fonds stanziei tl bilanz per la realisazion de lëures publics aldò dla leges provinzieles dl 21 de lugio 1977, nr. 21, y dl 8 de juni 1978, nr. 27, y dla lege dl 22 de lugio 1966, nr. 614 forma mpëni sun l bilanz dl eserzize, a cundizion che i sibe unic partìi sù danter i ënc locai tl tëmp dl eserzize.
(6) I mpënies per spëises n cont dl tratamënt economich cumplessif dl personal dependënt y la groaries curespundëntes per spëises de amurtamënt, fic, y groaries azessores per mprësć y d’autra formes de finanziamënt, coche nce per spëises che ie de bujën n basa a cuntrac o despusizions de lege vën custituìi sun l eserzize curespundënt dala Repartizion Finanzes y bilanz, zënza che l ie de bujën de d’autra ates.
(7) Per la spëises curëntes o la spëises per nvestimënc che ie de bujën per l funzionamënt di ufizies y di servijes provinziei possel unì sëurantëut mpënies a cëria dl eserzize che vën do, sce chësc ie de bujën per seguré l jì inant di servijes. Sce l se trata de spëises per afic o d’autra spëises che se porta pro per n tëmp plu lonch y for inò, possa l mpëni nce se tré ora sun de plu eserzizies, sce chësta ie na usanza o sce l’aministrazion recunësc che l ie de bujën o de utl. 38)
(7/bis) Per spëises per l’atuazion de scumenciadives y proiec realisei defin o n pert cun n finanziamënt plurianuel da pert dla Union Europeica possa i mpënies nce unì slargei ora a cëria di eserzizies che vën do y che toma ti tëmps de prugramazion curespundënc, tl cheder dla cuotes anueles de spëisa stabilides dai planns curespundënc de finanziamënt plurianuel. 39)
(8) Per spëises de nvstimënt, che ie partides sù per lege sun de plu ani o per chëles che la lege vëij danora n’autorisazion globala n referimënt a na cërta cumpëida de ani, possel unì tëut mpënies a cëria di eserzizies suzessifs tl cheder dla soma ududa danora dala lege.
(8/bis) La spëises per nvestimënc tla materia de imubilisazions finanzieres per partezipazions a sozieteies dla Provinzia aldò dl articul 21/bis, coma 1 dla lege provinziela di 21 de jené 1987, nr. 2 possa unì partides su sun de plu ani. Te chisc caji possa i liams unì fac per n tëmp de de plu ani a cëria di eserzizies che vën do. 40)
(9) Per la spëises ududes danora dal articul 8, coma 3 reprejentea la prima dla rates anueles de uni limitazion de mpëni da stanzië tl bilanz n curespundënza ala ublianzes ududes danora dala lege, l lim mascim a cëria de chël che l possa unì sëurantëut mpënies y dejëut paiamënc n relazion ala prima rata anuela de cuntribut.
(10) Per la spëises n economia zënza giaurida de credit aldò dl articul 52, vën l mpëni tëut adum cun la licuidazion.
(11) L’ates che cumporta n mpëni de spëisa a cëria dl bilanz provinziel vën cialedes tres n cont de si regularità contabla y registredes dal ufize cumpetënt per la Repartizion Finanzes y bilanz dan che les vën furmalisedes. A chësc fin azertea l ufize che la spëisa lieda ne sibe nia majera che l stanziamënt dl capitul o che l ne sibe nia da assenië a n capitul defrënt da chël dat sëura y che la cuantificazion dla spëisa vënie fata tl respet dla ublianzes de natura contabla y fischela.