(1) La Provinzia ie autoriseda, aldò dl articul 3 dl decret de lege di 30 de setëmber 2005, nr. 203, tramudà cun mudazions dal articul 1 dla lege di 30 de setëmber 2005, nr. 248, a mëter su na sozietà per azions, denumineda "Südtiroler Einzugsdienste AG - Alto Adige riscossioni spa" tl respet dla carateristiches preududes dai articuli 2 y 3 dla lege provinziela di 16 de nuvëmber 2007, nr. 12, o a partezipé a nal tel sozietà; la Provinzia nstëssa, i ënc che nen depënd y i ënc aldò dl coma 3 possa ti afidé, n basa a n cuntrat de prestazions de servijes aposta, nce separatmënter:
- l azertamënt, l relevamënt y l scudimënt spontann dla ntredes;
- l scudimënt sfurzà dla ntredes;
- l’ativiteies liedes y cumplementeres ai pustoms a) y b) cun leprò nce la gestion dla viulazions aministratives.
(2) Per dejëujer l’ativiteies aldò dl coma 1 possa la sozietà unì autoriseda a azeder ala banches dac, che ie a despusizion di assoziei tl plën respet dl decret legislatif di 30 de juni 2003, nr. 196 y mudazions suzessives. A chësc fin stipulea la sozietà cuntrac direc cun i tituleres o gestëures dla banches dac.
(3) Ala sozietà possel tò pert i chemuns y i autri ënc locai dla Provinzia de Bulsan sciche nce si cunsorc y assoziazions. L statut possa udëi danora che ala medema sozietà possel nce partezipé sozieteies cun capital mé publich y d’autri ënc publics.
(4) I raporc danter i assoziei y la sozietà vën regulei da n cuntrat de prestazions de servijes che regulea la cundizions y la manieres per dejëujer l’ativiteies preududes ti comes 1 y 2, per assenië eventualmënter finanziamënc y cuntribuc y per mëter a despusizion bëns y massaries y per definì i raporc finanzieres che se porta pro dainora. L cuntrat de prestazions de servijes possa udëi danora che i assoziei posse dejëujer ativiteies de sustëni aministratif o tecnich per l bën dla sozietà. La sozietà lëura cun personal provinziel, cun personal de aministrazions locales o cun si personal nstës. Tl cheder dla despunibltà dl bilanz possa la sozietà tl cajo de cuestions particulermënter zariëuses o tl cajo de deficulteies tecniches spezifiches se nuzé de esperc cun na gran cumpetënza tl ciamp. 32)
(5) L diretëur dla sozietà vën numinà a una danter Provinzia y Cunsorz di Chemuns dla Provinzia de Bulsan danter i funzioneres di ënc assoziei cun ésperienza desmustreda tl setor dl scudimënt dla ntredes. 33)
L articul 44/bis, coma 4, ie unit mudà nsci dal articul 7, coma 2, dla L.P. di 7 d’auril 2014, n. 1.
L articul 44/bis ie unit juntà dal articul 10, coma 3 dla L.P. di 11 d’utober 2012, nr. 18.