(1) Tl bilanz plurianuel vën la ntredes da chëutes dla Provinzia, chëles da cumpartezipazions a chëutes stateles y la ntredes y la rededes da chëutes stateles, che aldò dl decret dl Presidënt dla Republica di 31 d’agost 1972, nr. 670 passa defin o n pert ala Provinzia, dates sëura tl amudlé udù danora n basa ala rededes curespundëntes dl ann curënt y di ani dant, coche nce n basa ala previjions ududes danora n cont dla variazions tl daunì de chësta rededes; per cie che reverda la chëutes stateles iel da tenì cont dla previjions lauredes ora dal Guviern y dai organns de prugramazion statei.
(2) La ntredes dala cuotes variables aldò dl articul 78 dl decret dl Presidënt dla Republica di 31 d’agost 1972, nr. 670, ie, per chël che reverda l prim ann dl bilanz plurianuel, da dé sëura n basa ala previjions de resultat dl’acurdanza ududa danora tl articul nunzià y, per i eserzizies suzessifs, n basa ala spëises ududes danora dala legislazion naziunela y dal bilanz plurianuel dl Stat ti lims de tëmp y tla modaliteies ndichedes dal medemo articul 78.
(3) La ntredes liedes al’aplicazion di regulamënc y al’atuazion dla diretives dla Union Europeica, chëles revardëntes asseniazions y cuntribuc speziei dl Stat, chëles revardëntes l’eserzitazion de funzions deleghedes dal Stat o dala Region, la ntredes che vën da servijes o ativiteies dla Provinzia y da d’autra ntredes ie da dé sëura n basa ala normes y ai criteres udui danora tla legislazion valëivla.
(4) L ie oradechël nce da dé sëura la ntredes che se porta pro dai mprësć y da d’autra formes de finanziamënt bele autorisei, y separatmënter da chëstes, la ntredes da mprësć nueves interns y da formes de finanziamënt che n vëij danora de autorisé tl tëmp tëut n cunscidrazion, per fé nvestimënc te operes de carater durëivl y per spëises ududes danora dai programs de ntervënt dla Provinzia.