c') Lege Provinziala di 5 de merz dl 2001, n. 71)
Ordinamënt nü dl Sorvisc sanitar provinzial

(1)  I dirigënć sanitars vëgn portà ite te n organich su che é partì sö do i profii profescionai, y tlassificà te n livel su, articolè en relaziun ales responsabilitês profescionales y de gestiun desvalies.108)

(2)  L’ativité di dirigënć sanitars é caraterisada tl destrigamënt dles funziuns y di compić cun dal’autonomia tecnica-profescionala; sü ćiamps d’eserzize vëgn tres indô amplià sön la basa de momënć de valutaziun y de ejaminaziun dal superiur atira dessura. Le dirigënt, en relaziun cun l’ativité, cun i programs da realisé y cun sües funziuns spezifiches, é le responsabl dl resultat.109)

(3)  Pro la pröma assunziun ti vëgnel afidé al dirigënt compić profescionai cun ambić avisa de autonomia prezis, da eserzité respetan les diretives dl dirigënt responsabl dla strotöra. Al dirigënt cun cin agn d’ativité ti pol gnì atribuì inćiaries de profesciuns inće de na spezialisaziun alta, de consulënza, de stüde y d’archirida, de control, d’ejaminaziun y d’ispeziun, sciöch’inće de responsabilité de strotöres scëmples.110)

(4)  Le dirigënt vëgn sotmetü ala valutaziun anuala dl superiur atira dessura. Tl caje de na valutaziun negativa da pert dl superiur atira dessura o sön recurs dl interessè, vëgn le dirigënt sotmetü a na valutaziun da pert dl grup de valutaziun. Düć i dirigënć vëgn danter l’ater sotmetüs a na valutaziun vigni trëi agn da pert dl coleghium tecnich che reverda la cualité dles prestaziuns tecniches-profescionales. Le dirigënt cun la funziun de spezialité alta, cun l’inćiaria dla responsabilité dla strotöra scëmpla, de diretur de strotöra complessada y de diretur de departiziun, é sotmetü ala valutaziun ala fin dl’inćiaria sides dal grup de valutaziun, sides dal coleghium tecnich. Ala fin de vigni ann solar ti vëgnel presentè al superiur atira dessura na relaziun por iscrit sura l’ademplimënt di obietifs che é gnüs stabilis tl mëte man dl ann. Le superiur po te vigni momënt contestè l’insodesfaziun dl destrigamënt di compić diretifs sciöch’inće di obietifs nia arjunć. Tl caje de na valutaziun negativa po l’interessè presentè süa posiziun al grup de valutaziun, che dà jö so arat. Tl caje de na valutaziun negativa da pert dl grup de valutaziun, vëgn l’interessè inće sotmetü ala valutaziun dl coleghium tecnich. Sce le Diretur dl comprensore sanitar, respetivamënter le Diretur general confermëi chësta valutaziun negativa, vëgnel revochè la nominaziun dl dirigënt cun la funziun de spezialisaziun alta, dl responsabl respetivamënter diretur. Le grup de valutaziun vëgn nominé dal Diretur general y al é metü adöm da trëi mëmbri; un de chisc vëgn chirì fora dal Diretur general, un vëgn chirì fora da n grup de candidać che vëgn proponüs dal Consëi di sanitars y n espert nominé dal Assessur provinzial por la sanité. Le coleghium tecnich vëgn nominé dal Diretur general y al é metü adöm da trëi mëmbri; un de chisc vëgn chirì fora dal Diretur general, un dai candidać proponüs dal Consëi di sanitars y n espert chirì fora danter i direturs dl Sorvisc Sanitar Nazional o danter i professurs universitars, che vëgn inće da Stać mëmbri dl’Uniun Europeica. Le grup de valutaziun y le coleghium tecnich döra trëi agn.111)

(5)  Ai dirigënć sanitars cun l’inćiaria da diretur ti vëgnel atribuì - dlungia sües funziuns spezifiches te süa materia - funziuns de direziun y d’organisaziun dla strotöra che vëgn destrigades tla cornisc dles diretives operatives y de gestiun dl departimënt d’portignënza, inće dan dant les diretives por döt le personal che laora te chësta strotöra y tolon les dezijiuns nezesciares por le destrigamënt do regola dl sorvisc y por garantì intervënć amosorà de prevenziun, diagnostica, terapia y de reabilitaziun, che vëgn fać tla strotöra che ti vëgn afidada ai dirigënć sanitars. Le dirigënt é responsabl dla gestiun efiziënta dles ressurses che ti vëgn atribuides. I resultać dla gestiun vëgn controlà anualmënter dal superiur atira dessura. Tl caje de na valutaziun negativa vëgnel apliché le coma 4.112)

(6)  Ala dirigënza sanitara y ales inćiaries de diretur àn azès en conformité cun la disciplina varënta de setur tres concurs publich o seleziun, tignin cunt che i contrać coletifs de laûr disciplinëia les modalitês de sconanza dl tratamënt economich di dirigënć en godimënt le dé dla jüda en forza de chësta lege.

(7)  L’azès ala direziun teritoriala y ala direziun dl Sorvisc de medejina de basa dles aziëndes sanitares, tl caje che tla seleziun scrita fora por curì chëstes direziuns, i candidać ne sides nia stà aratà adatà, ti é inće conzedü ai medi de medejina generala cun n’esperiënza profescionala de diesc agn, che à inće n atestat de na formaziun de management.

(8)  L’atestat de na formaziun de management mëss gnì arjunt dai dirigënć cun l’inćiaria de direziun anter n ann dal scomenciamënt de süa inćiaria. L’inćiaria toma sce le pröm curs metü a jì dal’aministraziun provinziala do la confermaziun dl’inćiaria ne vëgn nia stlüt jö cun suzès. I dirigënć sanitars cun l’inćiaria de cin agn, le dé dla jüda en forza de chësta lege, mëss tó pert al pröm curs de formaziun de management organisé dal’aministraziun; i dirigënć cun l’inćiaria confermada ne mëss nia avëi l’atestat dla formaziun de management.