Ćiara l’art. 3 dla L.P. di 25 de mà 1982, nr. 20, modifiché dal art. 7 dla L.P. di 25 de forà 1986, nr. 5, dal art. 10 dla L.P. di 19 de novëmber 1986, nr. 28, dal art. 17 dla L.P. di 18 de agost, nr. 33, dal art. 7 dla L.P. di 16 de merz 1992, nr. 7 y dal art. 7 dla L.P. di 13 de otober 1993, nr. 15:
3. (Strotöres imobiliares tl setur sanitar)
(1) I laûrs de costruziun, d’ampliamënt y de restrotoraziun di bëgns imobii dles aziëndes sanitares vëgn aprovà dala Junta provinziala cun l’aprovaziun di programs anuai o cun provedimënć susc.
(2) Tla delibera de aprovaziun aladô dl coma prezedënt ti vëgnel deleghé al Assessur por i laûrs publics i ademplimënć preodüs dala lege provinziala di 3 de agost 1976, nr. 26, do avëi aldì l’Assessur competënt tl setur sanitar.
(3) Por ći che reverda la proietaziun y la direziun di laûrs, la suravidlanza, l’assistënza de colaudaziun dl frabicat y la licuidaziun, la mosöra y la contabilité di laûrs nominà dessura, fistidiëia l’Assessur por i laûrs publics inće dl personal di rodi nominatifs provinziai dl Sorvisc sanitar.
(4) Por les operes aladô dl pröm coma fistidiëia l’Assessur por i laûrs publics do l’arat obligatore dla comisciun por les strotöres sanitares, inće dla cumpra dl aredamënt y de injins.
(5) La Junta provinziala po deleghé ales unitês sanitares locales l’esecuziun di laûrs aladô dl coma 1 de chësc articul y inće la proietaziun y la direziun di laûrs. Te chisc caji po la Junta provinziala nominé n grup de esperć metüs adöm da rapresentanć dl’unité sanitara locala interessada y dles repartiziuns competëntes dl’aministraziun provinziala, cun compić de consulënza tla proietaziun y tla costruziun; ala Junta provinziala ti spétel de nominé i colauradus.
(6) La Junta provinziala po deleghé ai comuns, ai distreć o ai consorc intercomunai sciöch’inće al Istitut por le frabiché alisiré l’esecuziun di laûrs de costruziun, d’ampliamënt y de restrotoraziun di zëntri di distreć sanitars y dles residënzes sanitares assistenziales y inće la proietaziun y la direziun di laûrs. Te chisc caji vëgnel apliché prozedöres varëntes por les unitês sanitares locales.
(7) La Junta provinziala tol pert ala realisaziun di punć de referimënt de comprensore, conzedon ai comuns interessà n finanziamënt dl 50% dla spëisa preodüda.