(1) Sce le defunt o la defunta n´à nia desponü por ći che reverda la porsona che surantol le lüch o le prisc d´assunziun y i interessà o les interessades ne arjunj nia n´acordanza vëgn la porsona che surantol le lüch y le prisc d´assunziun determinà da signoria te na prozedöra unica.
(2) Por stimé le prisc d’assunziun dl lüch vëgnel tignì cunt dl davagn netto mesan anual aratè sön la basa dla coltivaziun dl lüch d’usanza locala. Chësc prisc vëgn capitalisé, por ći che reverda l'ativité agricula a n tas anual dl cinch por cënt y por ći che reverda les ativitês coliades preodüdes dal coma 3 dl articul 2135 dl codesc zivil, a n tas anual dl nü por cënt. Le prisc insciö determiné vëgn aumentè o diminuì aladô di criters determinà dal regolamënt d’esecuziun preodü dal articul 49. 15)
(3) I dërć lià ala conduziun dl lüch, sciöche inće les portignënzes dl lüch preodüdes dal articul 12, passa tl caje de zesciun dl mêsc stlüt debann ala porsona che surantol le lüch. 16)
(4) I bëgns che ne jô nia ai fins agricui vëgn stimà separatamënter; i bëgns che à n valur economich subordiné y che taca pro le lüch a na te´manira che n destach comportass n dann por la conduziun dl lüch, o i bëgns che é nezesciars sön le lüch por d´atri motifs, ne vëgn nia stimà separatamënter. 17)
(5) Sce le mêsc stlüt é aćiarié da dërć de nüz, adoranza o abitaziun, da servitus o groaries de terac vëgni stimà separatamënter y so valur vëgn trat jö dal prisc d´assunziun calcolè.
(6) Por la sciazada di bosć che fej pert dl mêsc stlüt da pert di consulënć tecnics o dles consulëntes tecniches nominà/ades aladô dl articul 23 mëssel gnì damanè l´autorité provinziala di bosć por conësce les utilisaziuns che po gnì realisades cun le tëmp y respetan les normes forestales.
Le coma 2 é gnü sostituì dal art. 4, coma 2, dla l.p. di 20 de jügn 2005, n. 4.
Le coma 3 é gnü sostituì dal art. 4, coma 2, dla l.p. di 20 de jügn 2005, n. 4.
Le coma 4 é gnü sostituì dal art. 4, coma 2, dla l.p. di 20 de jügn 2005, n. 4.