(1) Ai contrać passifs dl’aziënda ti va de regola danfora na indiziun de concurs, aladô dles modalitês preodüdes dala normativa comunitara, nazionala y provinziala. I contrać, plü avisa chi de forniziun de bëgns y de sorvisc de n valur dessot a chël stabilì dala normativa comunitara aladô dl dërt privat, indicades tl ordinamënt aziendal preodü dala lege de reordinamënt, vëgn apaltà o contratà diretamënter.
(2) I contrać mëss avëi termi y dorades sigüsc. Ai ne po dantadöt nia contignì tlausoles de arlungiamënt chît o de renovamënt chît. Ai po avëi na dorada desvalia en relaziun al oget y ales condiziuns dl marćé.
(3) Por le medemo oget ne pol nia gnì stlüt jö deplü contrać sc’al ne vëgn nia mostrè sö rajuns de nezescité o de conveniënza.
(4) Ti contrać ne ti pol nia gnì ćiarié sö al’aziënda cutes, che ti speta ala porsona privata che sotescrî le contrat, y gnanca la retüda di interesc o dles provijiuns a bëgn dla porsona privata che mëss instëssa paié danfora por stlüje jö le contrat.
(5) Ametüs é i paiamënć danfora, en relaziun ai bëgns y ai sorvisc o ales prestaziuns destrigades.
(6) Le contrat vëgn stlüt jö dal diretur general dl’aziënda o da n so deleghé te na forma publica o privata, aladô dles desposiziuns dl dërt comun o por ordinn scrit, tres n barat de corespondënza, aladô dl’usanza dl comerz.
(7) I contrać, i protocoi y dötes les atres ates dles aziëndes por chi che la lege scrî dant ch’ai vëgnes publicà, autenticà y ciafà tla forma aministrativa publica dal diretur aministratif o da n ater dirigënt aministratif, nominé cun deliberaziun dal diretur general.