a) Lege provinzialadi 17 de forà dl 2000, n. 71) —
Ordinamënt nü dl comerz

(1)  Chësta lege tëgn cunt dl’autonomia particolara che ti vëgn reconesciüda ala Provinzia autonoma de Balsan dal Test unich dles leges costituzionales che reverda le Statut spezial dl Trentino-Südtirol, aprovè cun le decret dl Presidënt dla Republica di 31 d’agost dl 1972, n. 670. Ara regolamentëia le setur dl comerz, tignin cunt dla formaziun geomorfologica spezifica dl teritore provinzial, dla richëza de sües ressurses naturales, dla contrada y dl ambiënt, dla particolarité de tröc, pici inćiasamënć rurai y da munt. Te chësc contest àn debojëgn de n svilup ecuilibré dla rëi comerziala cun sües ofertes de sorvisc desvalies, odon ite l’importanza sozioeconomica dles piceres aziëndes y dles aziëndes mesanes che garantësc na destribuziun dl’oferta ai residënć y ai turisć altamënter cualificada y che cür na gran spersa.

(2)  I fins dl'ordinamënt dl comerz é:

1. 2)
   
2. la sconanza dla concorënza, la trasparënza dl marćé, le svilup dl’imprenditorialité, dantadöt chëra di imprenditurs jogn y dles imprendituries jones, y la zircolaziun dla marćianzia lëdia;
   
3. la defenüda dl consumadù, tignin dantadöt cunt dl'informaziun, dla poscibilité de fornidöra, dl bun sorvisc ai tliënć, dl sorvisc tla vijinanza, dl sortimënt y dla segurëza di produć, sciöch’inće de prisc iüsć;
   
4. l'efiziënza, la modernisaziun y le svilup dla rëi de destribuziun, la valorisaziun y la sconanza dl sorvisc comerzial ti raiuns urbans, rurai y da munt, schiöch’inće le svilup tecnologich dl'oferta.
   

(3)  Te chësta lege capëscion sot a:

1. comerz alingrossa, l'ativité eserzitada da chi che cumpra de profesciun marćianzia a so inom y a sües spëises y la vënn a d’atri comerzianć al menü o grossisć, o a anuzadus profescionai, o a d’atri consumadus alingrossa. Chësta ativité po avëi la forma de comerz intern, de importaziun o de esportaziun;
   
2. comerz al menü, l'ativité eserzitada da chi che cumpra de profesciun marćianzia a so inom y a sües spëises y la vënn diretamënter al consumadù final sön na spersa privata te na sënta fissa o tres d’atres formes de destribuziun.
   

(4)  Les desposiziuns de chësta lege ne vëgn nia aplicades:

1. ai farmazisć y ai direturs dles apoteches realisades y aministrades dal comun, aladô dla lege di 2 d’aurì dl 1968, n. 475, y mudaziuns suandëntes, y dla lege di 8 de novëmber dl 1991, n. 362, y mudaziuns suandëntes, sce ai vënn ma medejines, medicamënć particolars, stromënć medics y mesi medich-chirurgics;
   
2. ai titolars de botëghes che vënn marćianzia de monopol, sce ai vënn ma la marćianzia de monopol preodüda dala lege di 22 de dezëmber dl 1957, n. 1293, y mudaziuns suandëntes, y dal regolamënt d’esecuziun respetif aprovè cun le decret dl Presidënt dla Republica di 14 d’otober dl 1958, n. 1074, y mudaziuns suandëntes;
   
3. ales assoziaziuns di produzënć de ordöra y ortam costituides aladô dla lege di 27 de lugio dl 1967, n. 622, y mudaziuns suandëntes;
   
4. ai paurs, singui o assozià, che vënn produć agricui ti limić preodüs dal articul 2135 dl codesc zivil, dla lege di 25 de merz dl 1959, n. 125, y mudaziuns suandëntes, y dla lege di 9 de forà dl 1963, n. 59, y mudaziuns suandëntes;
   
5. ai artejans preodüs dala lege provinziala di 16 de forà dl 1981, n. 3, sciöch’inće ai industriai por la venüda, ti locai de produziun o te locai dlungia, de bëgns de süa produziun, sciöch’inće azessurs y tòć de sostituziun che reverda süa ativité;
   
6. ai pëiapësc y ales cooperatives de pëiapësc, sciöch’inće ai iagri, singui o assozià, che vënn al publich al menü salvarjina y pësc, y i produć che vëgn estlusivamënter dal eserzize de süa ativité, y a chi che vënn i produć coiüs diretamënter y legalmënter da ëi instësc sön i terac sotmetüs ales rajuns de vijinanza, anuzan le dërt de cöie ciüfs y erbes, fonguns y de medemo;
   
7. a chi che vënn o pîta sües operes d'ert, sciöch’inće les operes inteletuales a carater creatif, tutes ite les publicaziuns scientifiches o informatives realisades inće tres le suport informatich;
   
8. a chi che vënn bëgns de caji de concurs aladô dl articul 106 dles desposiziuns aprovades cun decret roial di 16 de merz dl 1942, n. 267, y mudaziuns suandëntes;
   
9. a chi che vënn intratan na fiera ti locai d’esposiziun ai vijitadus la marćianzia che vëgn esponüda intratan la manifestaziun;
   
10. ai ënć publics o ales porsones iuridiches privates, a chi che le Stat o i ënć teritoriai tol pert, che vënn publicaziuns o d’ater material informatif che reverda süa ativité y é gnüs elaborà da d’ëi o da d’atri, inće sön suport informatich;
    
11. al'ativité de venüda che vëgn fata intratan les manifestaziuns culturales y religioses promoiüdes dai organisadus ti locai o tla zona dla manifestaziun o atira dlungia la zona de azès, sce la venüda se referësc ma a produć che reverda les manifestaziuns;
    
12. ales aziëndes de cura y de turism, sciöch’inće ales assoziaziuns y ai consorc dl turism scrić ite tles listes provinziales respetives, sce ares vënn estlusivamënter chertes di trus, chertes postales y publicaziuns turistiches y de retlam;
    
13. ai zëntri soziai y istituzionai che aministrëia i laboratori por la defenüda di portadus de handicap preodüs dal articul 10 dla lege provinziala di 30 de jügn dl 1983, n. 20, y mudaziuns suandëntes, por la venüda de bëgns fać dailò;
    
14. ai paurs, singui o assozià, ai afitadins de na pert o de döta la spersa, che eserzitëia sön les sperses publiches la venüda de sü produć aladô dla lege di 9 de forà dl 1963, n. 59, y mudaziuns suandëntes, sciöch’inće ai artejans preodüs dala lege provinziala di 16 de forà dl 1981, n. 3, y mudaziuns suandëntes, che ô vëne sü produć. Les desposiziuns revardëntes la conzesciun dles plazes da parchè y da stè por l'eserzize dl'ativité di crameri resta impé;
    
15. al'ativité de venüda che vëgn fata ti marćià de pöresc, de secunda man y cosses analoghes, anfat da chi che ai vëgn organisà, sce la venüda ne reverda nia articui cumprà aposta y ara ne vëgn nia fata da imprejes che eserzitëia l’ativité comerziala o d’atres sorts de imprejes. L’iniziativa mëss gnì comunicada al ombolt competënt che po la proibì por rajuns de sconanza dl'ordinn publich, dla segurëza, dl chît publich y dl ambiënt.