c) Lege Provinziala di 16 de mà dl 2012, n. 91)
Finanziamënt tl ćiamp dl turism

(1) Por garantì y renforzè la basa de finanziamënt dla promoziun dl turism vëgnel metü sö dal 1. de jenà dl 2014 la cuta de sojornanza comunala a ćiaria de chi che sta sura nöt tles strotöres d’alojamënt tla provinzia de Balsan. La cuta é graduada y po fà fora da n minimo de 0,50 euro a n mascimo de 2,50 euro pro pernotamënt, ater co te caji de esenziun che vëgn stabilis dala Junta provinziala. Les strotöres d’alojamënt à la funziun de sostituć dla cuta aladô dl articul 64 dl decret dl Presidënt dla Republica di 29 de setëmber dl 1973, n. 600.3)

(2) Les strotöres d’alojamënt preodüdes dal coma 1 é:

1. les strotöres d’alojamënt cun carater d’alberch y nia d’alberch aladô di articui 5 y 6 dla lege provinziala di 14 de dezëmber dl 1988, n. 58;
   
2. les ćiamenes y i apartamënć preodüs tla lege provinziala di 11 de mà dl 1995, n. 12, y mudaziuns suandëntes; 4)
   
3. vacanzes söl lüch da paur preodüdes dal articul 2, coma 3, lëtra a) dla lege provinziala di 19 de setëmber dl 2008, n. 7. 5)
   

(3) La gradaziun dla cuta y vigni ater aspet che va debojëgn por l’atuaziun vëgn emanà cun regolamënt d’esecuziun ćina ai 31 de dezëmber dl 2012, do avëi aldì le Consëi di comuns, l’organisaziun plü rapresentativa de chi che laôra tl ćiamp dl turism y l’organisaziun plü rapresentativa dles organisaziuns turistiches. L’omisciun dl paiamënt, le paiamënt nia complet o tardì dla cuta vëgn straufà cun na sanziun aministrativa dl 30 porcënt dla soma nia paiada. Sce l’intardiada ne va nia sura i 30 dis, é la sanziun aministrativa le 5 porcënt dla soma nia paiada.

(4) Les entrades dla cuta ti vëgn assegnades ales organisaziuns turistiches locales o suralocales scrites ite tla lista dles assoziaziuns turistiches aladô dla lege provinziala di 18 d’agost dl 1992, n. 33, sciöche inće ales aziëndes de cura o ales aziëndes de turism, sce i criters de cualité determinà dala Junta provinziala vëgn ademplis. Al po gnì determiné cun regolamënt d’esecuziun che i comuns po ti trasferì diretamënter ai consorc turistics, scrić ite tla lista di consorc turistics aladô dla lege provinziala di 18 d’agost dl 1992, n. 33, na pert dles entrades resservades al marketing de destinaziun, sce ai ademplësc i criters de cualité stabilis dala Junta provinziala. 6)

(1) La cuta provinziala sön le turism vëgn istituida por i fins odüs danfora dal articul 1. La cuta vëgn aplicada aladô dles modalitês che vëgn determinades cun regolamënt d’esecuziun, do che les assoziaziuns profescionales interessades y le Consëi di comuns à dè jö n arat. Le regolamënt d’esecuziun vëgn emanè ćina ai 31 de messè dl ann olache al vëgn constatè che l’ann da denant ne n’él nia gnü trat ite la soma anuala de 18 miliuns de euro de contribuć volontars da pert dles organisaziuns turistiches scrites ite tla lista provinziala dles assoziaziuns turistiches. L’import minimal di contribuć volontars vëgn calcolè danü vigni trëi agn dala Junta provinziala aladô dla rata d’inflaziun inresciüda dal Istitut provinzial de statistica (ASTAT). Les organisaziuns turistiches scrites ite tla lista provinziala dles assoziaziuns turistiches ti comunichëia vigni ann ćina ai 31 de jenà ala Repartiziun Turism i contribuć volontars paià ite ćina ai 31 de dezëmber dl ann da denant.

(2) La cuta é a ćiaria de chi che laôra te chi seturs economics che à n profit particolar dal turism, deache ai eserzitëia ativitês comerziales, artejanales, industriales y di sorvisc liades dassënn al turism, y che tol ite danter ater dantadöt i ostis, i gesturs de pistes dai schi o di implanć portamunt, les scores de schi y de snowboard, i comerzianć te posć turistics, les agenzies de iade a livel provinzial y i imprësć de atrezadöres sportives. Por chi che aprofitëia diretamënter dl turism ne po la cuta, che po inće gnì fissada te na forma pausciala, nia fà fora plü co le 10 promile dl volum d’afars generè tl ann da denant y te vigni caje ne pora nia amuntè a plü co 30.000,00 euro. Por chi che aprofitëia indiretamënter dl turism ne po la cuta nia fà fora plü co l’1 promile dl volum d’afars generè tl ann da denant, y te vigni caje ne pora nia superè i 500,00 euro. Al vëgn trat ite n import minimal de 100,00 euro. Por eserzizi cun n volum d’afars sot a 20.000,00 euro pol gnì odü danfora esenziuns.

(3) Tl regolamënt d’esecuziun preodü tl coma 1 vëgnel determiné l’amunta dla cuta sön le turism, inće te na forma graduada, les sanziuns eventuales, sciöche inće les modalitês de scodimënt, de verificaziun, de recuperada y de rembursamënt. Al po inće gnì odü danfora esenziuns o alisirimënć por raiuns determinà. Implü pol inće gnì preodü reduziuns parziales dla cuta por caji singui, sce al vëgn desmostrè le bojëgn te na manira adeguada. L’omisciun dl paiamënt, le paiamënt nia complet o tardì dla cuta vëgn straufà cun na sanziun aministrativa dl 30 porcënt dla soma nia paiada. Sce l’intardiada ne va nia sura i 30 dis, é la sanziun aministrativa le 5 porcënt dla soma nia paiada.

(1) Les entrades che vëgn dala cuta de sojornanza comunala y dala cuta provinziala sön le turism é destinades a intervënć de relevanza turistica.

(1) Do l’articul 15 dla lege provinziala di 18 d’agost dl 1992, n. 33 vëgnel injuntè chësc articul:

“Art. 15/bis (Fondaziun de assoziaziuns turistiches) - 1. Les assoziaziuns turistiches preodüdes dal art. 15 po gnì fondades sciöche assoziaziun o sozieté cooperativa.”

(2) L’articul 27, coma 1 dla lege provinziala di 18 d’agost dl 1992, n. 33 vëgn sostituì insciö:

“1. Por sostignì l’ademplimënt de sües inćiaries ti vëgnel vigni ann metü a desposiziun ales organisaziuns turistiches mesi finanziars tl bilanz provinzial da destiné ales assoziaziuns turistiches, ai consorc turistics sciöche inće ales aziëndes preodüdes dal art. 23, coma 3, sce al vëgn respetè i criters de cualité obligatori scrić dant dala Junta provinziala.”

(3) L’articul 28, coma 1 dla lege provinziala di 18 d’agost dl 1992, n. 33 vëgn sostituì insciö:

“1. I mesi finanziars metüs a desposiziun aladô dl articul 27 vëgn partis sö vigni ann aladô de chisc criters:

1. na cuota anfat o inće variabla por düć chi che à chësc dërt;
   
2. na cuota implü aladô de chisc criters:
   
   1. capazité turistica dla hotelaria y fora dla hotelaria;
      
   2. valur mesan di pernotamënć registrà da novëmber ćina d’otober ti trëi agn turistics da denant;
      
   3. valur mesan dl numer dles porsones rovades adalerch y registrades ti trëi agn turistics da denant;
      
   4. autofinanziamënt;
      
   5. arjunjimënt di criters de cualité graduà y facoltatifs definis dala Junta provinziala.”
      

(4) Do l’articul 35, coma 1 dla lege provinziala di 18 d’agost 1992, n. 33 vëgnel injuntè chësc coma:

“2. Les desposiziuns dl articul 27, coma 1 y dl articul 28, coma 1 vëgn aplicades pian ia dal 1. de jenà dl 2013.”

(1) Al ti vëgn proibì a dötes les assoziaziuns turistiches che ciafa contribuć dala Provinzia da finanzié y tó pert a campagnes litales de partis politics y candidać de vigni lista litala. Sce al vëgn violè chësta proibiziun spo vëgnel straiché le contribut provinzial por l’ann corënt.

Chësta lege gnarà publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.