(1) La cumiscion provinziela per la valivanza dla chances per l'ëiles, tlo dedò tlameda cumiscion provinziela, ie n organn cunsultif dla Jonta provinziela tl ciamp dla parificazion di sesc y dl sustëni dl'ëila.
(2) La cumiscion provinziela ie metuda adum da 15 ëiles y la vën numineda dala Jonta provinziela chiran ora danter doi numinazions purtedes dant dala urganisazions economiches, sozieles, sindacheles y politiches, che ie njiniedes ite mé o dantaldut per l'ëiles. La Jonta provinziela possa numiné, oradechël, d'autra espertes de cuestions de parificazion, zënza dërt de vela. La cunseliera de valivanza ie na cumponënta de dërt dla cumiscion provinziela. Cumponënta de dërt dla cumiscion provinziela ie l'assessëura/l assessëur cun delega per la valivanza dla chances o si sostituta/sostitut. Trëi cumponëntes dla cumiscion provinziela vën desiniedes dala forzes de mendranza prejëntes tl Cunsëi provinziel. Per uni cumpunënta vëniel numinà na suplënta dla medema urganisazion. La cumponëntes muessa avëi cunescënzes y esperienzes te cuestions che reverda la parificazion y l sustëni dl'ëiles. La cumposizion dla cumiscion provinziela muessa curespuender ala cunsistënza dla grupes linguistiches coche les resultea dai dac dla ultima cumpëida dla populazion. La cumiscion provinziela litea, danter si cumponëntes, a maiuranza de ujes, la presidënta y la vizepresidënta. Ala cumponëntes y ala espertes o ai esperc, n cajo cunsultei, ti spieta la cumpensazions ududes danora dala normes provinzieles valëivles.
(3) La cumiscion provinziela resta tla ncëria per la dureda de na legislatura, y chëla do muessa unì numineda tl tëmp de 90 dis dala veles dl Cunsëi provinziel nuef.
