f) Lege provinziala di 16 de messè dl 2008, n. 51) —
Obietifs formatifs generai y ordinamënt dla scolina y dl pröm scalin d’istruziun

(1) Tl respet dla liberté d’insegnamënt, dl'autonomia didatica y organisativa dles scores dades dant tla lege provinziala di 29 de jügn dl 2000, n. 12, y dl identité culturala dles scores di trëi grups linguistics aprovëia la Junta provinziala - do avëi aldì le Consëi scolastich provinzial - por les scores di trëi grups linguistics les indicaziuns provinziales corespognëntes por la definiziun di curricula por la scora elementara y la scora mesana. Chëstes indicaziuns provinziales definësc:

1. la strotoraziun dl pröm scalin d’istruziun te periodes de n ann, de dui agn y de trëi agn;
   
2. i obietifs formatifs generai y i obietifs dl imparè spezifics por ći che reverda les competënzes dles scolares y di scolars;
   
3. l'orar dles leziuns tles scores di trëi grups linguistics adöm al contingënt de ores al ann dles materies y ativitês singoles dla cuota de basa obligatoria y le contingënt de ores minimal al ann dla cuota resservada ala scora;
   
4. i criters de cualité generai por ti pité la poscibilité de cerna ales scolares y ai scolars;
   
5. i limi temporai de flessibilité por spostè materies y ativitês tratan l’orar d’insegnamënt obligatore, sciöche inće por mëte a jì percursc didatics inovatifs tl insegnamënt di lingac.
   

(2) Les deliberaziuns dla Junta provinziala dades dant tl coma 1 ti vëgn menades al Ministêr dl’istruziun publica aladô dl articul 9 dl decret dl Presidënt dla Republica di 10 de forà dl 1983, n. 89, y mudaziuns suandëntes.

(3) Tignin cunt dles indicaziuns provinziales prevëiga le program de scora dles scores autonomes n curriculum strotoré y flessibl. Por chësc fin determinëia les scores le curriculum obligatore por les scolares y i scolars - che à sciöche fin l’arjunjimënt di obietifs formatifs generai y l'acuisiziun dles competënzes fondamentales - ti ajuntan ales materies y ales ativitês obligatories fondamentales materies y ativitês chirides fora liberamënter dales scores instësses.

(4) La strotöra y la flessibilité dl curriculum po inće gnì realisà tres la costituziun de grups de scolares y scolars de de plü tlasses, por realisé i aprofondimënć nezesciars dl insegnamënt curicolar obligatore, recuperè l’aprendimënt romagnü indô y promöie le talënt, sciöche inće tres la poscibilité de cerna dles scolares y di scolars por individualisé y personalisé le prozès formatif.

(5) Les indicaziuns provinziales po odëi danfora, d’ajunta al curriculum obligatore dla scora, na cuota facoltativa opzionala por realisé i interesc, les predisposiziuns y i bojëgns dles scolares y di scolars, tignin cunt di bojëgns particolars de so contest.

(6) Tl cheder dles ressursses dan man à l'ampliamënt dl'oferta de formaziun sciöche fin l’arjunjimënt di fins dà dant tl articul 10 dla lege provinziala di 29 de jügn dl 2000, n. 12. L'ampliamënt dl’oferta de formaziun ne po nia sostituì les materies y les ativitês dl orar d’insegnamënt obligatore.