(1) I proiec de bonificazion y de recostituzion dla lueges mpaziedes vën prejentei da pert dl nteressà al’Agenzia provinziela, che do avëi audì i chemuns nteressei, i apurvea. Tl’apurvazion iel dat sëura la mudazions y la ntegrazions eventualmënter fates tl proiet prejentà, l ie fissà i tëmps d'esecuzion y stabilì la garanzies finanzieles per curì i danns ambientei eventuei, che muessa unì dates a bën dla Provinzia.
(2) L’apurvazion nunzieda pra l coma 1 cumporta la detlarazion de utl publich, de prëscia y de mpuscibltà de spustamënt tl tëmp y la remplazea d'uni viers l’autorisazions, la cunzescions, i cunsënsc, i bensteies y l’apurvazions ududes danora dala legislazion valëivla, nce ai fins urbanistics, per la realisazion y l eserzize di mplanc y dla massaria che ie de bujën per l’atuazion dl proiet de bonificazion.
(3) L finé via di ntervënc udui danora dai proiec de bonificazion vën atestà da na zertificazion aposta data ora dal’Agenzia provinziela.
(4) La Jonta provinziela dà ora normes tecniches cun chëles che la definësc:
- I valores lim dla cuntaminazion di teraces, dl’eghes sëuravia y dl’eghes de sofonz, n relazion ala destinazion urbanistica spezifica dla sperses;
- la manieres de ndividuazion dla spereses cuntaminedes y potenzialmënter cuntaminedes;
- i criteres generei per la segurazion, la bonificazion y la recostituzion ambientela dla sperses cuntaminedes y per la redazion di proiec de bonificazion, cun la ndividuazion dla sortes de proiec nia sometui a autorisazions, i tëmps per fé i lëures y la modaliteies de spustamënt dl refudam tl raion dla spersa nstëssa, ënghe sce l vën da lueges defrëntes.
(5) La Jonta provinziela, sun pruposta dl ufize gestion dl refudam y do avëi audì i chemuns nteressei, apurvea n plann – nce partì su te pertes – sun la sperses cuntaminedes y potenzialmënter cuntaminedes, dajan sëura per uni una de chëstes i lëures che ie da fé, i controi do la bonificazion, i custimënc relatifs y i tëmps de realisazion udui danora, aldò di bujëns dla defendura dl ambient. I proiec de bonificazion per pruvedimënc che ie udui danora tl plann vën apurvei aldò dla manieres ududes danora tl coma 1.
(6) La despusizions nunziedes ti comes da dant ne vën nia aplichedes ai proiec dla sperses, che ie ndividuedes aldò dl articul 1/bis dla lege provinziela dl 29 de lugio 1986, nr. 21, purtà ite dal articul 25 dla lege provinziela dl 23 de dezëmber 2005, nr. 13, coche nce aldò dl articul 10/bis dla lege provinziela dl 6 de setëmber 1973, nr. 61, mudà tres l articul 3 dla lege provinziela dl 3 de utober 2003, nr. 14, y tres l articul 28 dla lege provinziela dl 23 de lugio 2004, nr. 4; per chisc proiec vëniel aplicà la despusizions iló repurtedes. Per i proiec d’esecuzion relatifs, ënghe sce i ne ie nia nunziei tl articul 1/bis dla lege provinziela dl 29 de lugio 1986, nr. 21 y tl articul 10/bis dla lege provinziela dl 6 de setëmber 1973, nr. 61, vën l’apurvazion sustituida cun la sëula verificazion de cunformità cun l proiet preliminer o definitif apurvà.