i) Lege Provinziala di 26 de mà dl 2006, n. 41)2)
Gestion dl refudam y defendura dl terac

(1) I chemuns à la cumpetënza estlujiva per l’abineda y l trasport dl refudam de nridlamënt destinà ala recupereda y al smaltiment; i dejëuj chësta cumpetënza aldò dl test unich dla leges regiuneles sun l urdinamënt di chemuns.

(2) I chemuns regulea la gestion dl refudam de nridlamënt cun regulamënc aposta che vëij danora n particuler:

1. la despusizions per seguré la defendura igenich-sanitera te duta la fases dla gestion dl refudam de nridlamënt;
2. la modaliteies dl servisc d'abineda y de trasport dl refudam de nridlamënt;
3. la modaliteies dl dé jù, dl’abineda deferenzieda y dl trasport dl refudam de nridlamënt per seguré na gestion deferenzieda dla sortes de refudam defrëntes, per sustenì la prevenzion y l smendrimënt dla produzion, ma nce la recupereda dl refudam, y chësc nce tres la chëutes sun l refudam;
4. la despusizions che ie de bujën per miuré la formes dl dé ju, dl'abineda y dl trasport dl refudam de mpacamënt primer y segonder adum cun d’autra frazions de marcanzia determinan i standarc minims da respeté;
5. la determinazion dl refudam speziel nia periculëus, che ie da junté aldò dla cualità y dla cuantità al refudam de nridlamënt, n basa ai criteres udui danora da pert dla Jonta provinziela tl articul 8, coma 1, pustom f).

(3) I chemuns y i ënc o la strutures da chisc deleghei o nciariei possa nce mëter a jì servijes de njonta per la gestion dl refudam speziel.