e) Lege Provinziala di 30 de novëmber dl 2004, n. 91)

(1) La Provinzia autonoma de Balsan promöi le dërt de studié al’université tres:

1. stipendiums ordinars;
   
2. stipendiums straordinars;
   
3. retüda dles tasses universitares;
   
4. stipendiums por teses de diplom, teses de laurea spezialistica, dissertaziuns y teses ecuiparades y inće por laûrs de inrescida y abilitaziun;
   
5. retüda dles spëises de iade;
   
6. cuartiers;
   
7. sorvisc de mensa;
   
8. provedimënć particolars por studëntes y studënć cun handicap;
   
9. imprësć;
   
10. contribuć a organisaziuns di studënć;
    
11. stipendiums por le barat de studëntes y studënć;
    
12. sorvisc de informaziun;
    
13. stipendiums por la formaziun postuniversitara y por practicums;
    
14. d’atri provedimënć por realisé le dërt de studié al’université.
    

(2) I provedimënć é ponsà por les studëntes y i studënć iscrić a cursc de stüde pro istituziuns universitares y istituć superiurs cun sënta tla Talia o te paîsc dl raiun cultural todësch, denominades chilò dessot “universitês”.

(3) La limitaziun indicada tl coma 2 ne vëgn nia aplicada ai provedimënć preodüs dal coma 1, lëtres a), b), d), i), k) y m).

(1) Chëstes porsones po se damanè les prestaziuns preodüdes da chësta lege:

1. zitadines y zitadins dl’Uniun europeica che frecuentëia universitês tla provinzia de Balsan;
   
2. zitadines y zitadins extracomunitars che frecuentëia universitês tla provinzia de Balsan, ma sce ai à la residënza da almanco un n ann te Südtirol;
   
3. zitadines y zitadins de chi stać dl’Uniun europeica che ti conzed ales zitadines y ai zitadins talians les mosöres de sostëgn por le dërt de studié, y inće les zitadines y i zitadins talians sc’ai frecuentëia universitês fora dla provinzia y à la residënza da almanco dui agn tla provinzia de Balsan.
   
4. zitadines y zitadins extracomunitars che à le zertificat de sojornanza CE a dorada lungia por la Talia y zitadines y zitadins che à ciafè le reconescimënt dl status de profugh o de proteziun sussidiara aladô dla diretiva comunitara 2004/83/CE, che vëgn ecuiparà ales zitadines y ai zitadins talians.2)
   
5. zitadines y zitadins foresć de Stać che ne fej nia pert dl’Uniun europeica, che frecuentëia l’université fora dla provinzia de Balsan, sce ai à da cin agn la residënza tla provinzia de Balsan. 2)
   

(2) Por i provedimënć preodüs dal articul 1, coma 1, lëtres a), b), c), d), h), i), k) y m), po les bandides de concurs o i criters d’assegnaziun preodëi condiziuns d’amisciun plü restritives.

(3) Nia se jovè dles prestaziuns de chësta lege ne po chi che:

1. à complì i trëntecinch agn y é iscrić a n curs de laurea o a n curs ecuiparè a chësc che döra trëi agn;
   
2. à complì i carant’agn y é iscrić a n curs de diplom, de magister o de laurea spezialistica;
   
3. é iscrić a n secundo curs de diplom, de magister, de laurea o de laurea spezialistica;
   
4. à superè de plü de n ann la dorada legala dl curs de stüde.
   

(4) Por studëntes y studënć che por rajuns personales o de familia sceries n’é nia bugn da stlüje jö sü stüdi tl tëmp dè dant tl coma 3, lëtra d), pol gnì preodü tles bandides dl concurs o ti criters d’assegnaziun ezeziuns al limit de tëmp scrit dant.

(1) I provedimënć preodüs dal articul 1, coma 1, lëtres a), b), c), d), e), h), i), k) y m) vëgn conzedüs a de bones studëntes y a de bugn studënć che s’al mirita y che é te de stletes condiziuns economiches.

(2) La stleta condiziun economica vëgn stabilida sön la basa dl davagn, dl patrimone y di imporć nia imponibli stabilis ti criters relatifs. Al vëgn tut en conscidraziun le davagn y le patrimone dla studënta o dl studënt y de sü geniturs. Sce la studënta o le studënt é despartida o despartì legalmënter, devorziada o devorzié, orfann de trami i geniturs o à mituns, spo vëgnel ma tut en conscidraziun so davagn y so patrimone y sc’ara o al é maridé, inće le davagn y le patrimone dl om o dla fomena. Chësc vel inće por les studëntes y i studënć che à albü denant co jì a studié n’ativité de davagn de almanco trëi agn y à ciafè n paiamënt adeguè por se mantignì.

(3) Le davagn mascimal ametü y inće i criters de valutaziun dl davagn, dl patrimone y di imporć nia imponibli vëgn stabilis tla bandida dl concurs.

(1) Ćina ai 31 de mà de vigni ann aprovëia la Junta provinziala le plann d’ativité general di provedimënć por realisé le dërt de studié al’université.

(2) Tl plann vëgnel stabilì sides i provedimënć che les studëntes y i studënć po se damanè zënza messëi ademplì condiziuns sogetives o ogetives determinades, co inće i provedimënć che ti vëgn conzedüs a studëntes y studënć cun condiziuns determinades o tres concursc.

(1) Pro la Repartiziun provinziala Promoziun dl stüde vëgnel metü sö la Consulta provinziala por le dërt de studié al’université, denominada chilò dessot “Consulta”, sciöche organn aconsiënt dl’aministraziun provinziala. La Consulta fej propostes y laôra fora arać por ći che reverda le plann d’ativité general y inće i criters y les bandides di concursc por i provedimënć singui; implü propónera scomenciadies por le svilup, le mioramënt y le coordinamënt di provedimënć.

(2) La Consulta é metüda adöm:

1. dal’assessuria provinziala competënta o dal assessur provinzial competënt o da na porsona en süa sostituziun, sciöche presidënt;
   
2. da döes porsones en rapresentanza dl’Université Lëdia da Balsan che fej pert de grups linguistics desfarënć;
   
3. da trëi porsones espertes; öna de chëstes trëi mëss fà pert dl grup linguistich ladin;
   
4. da trëi porsones en rapresentanza dles studëntes y di studënć nominades, a öna danter d’ëres, dales organisaziuns di studënć cun sënta tla provinzia;
   
5. dala direturia o dal diretur dla Repartiziun provinziala Promoziun dl stüde.
   

(3) La Consulta vëgn nominada dala Junta provinziala y resta tl’inćiaria por cin agn alalungia.

(1) Ales studëntes y ai studënć ti pol gnì conzedü ann por ann n stipendium sce dlungia les condiziuns preodüdes dal articul 2,

1. ài arjunt n resultat de stüde positif y
   
2. é te de stletes condiziuns economiches aladô dl articul 3.
   

(2) I stipendiums vëgn assegnà tres concursc scrić fora dala Junta provinziala.

(3) Tla publicaziun bandida dl concurs vëgnel stabilì:

1. a tan che i stipendiums amunta;
   
2. i criters por valuté les condiziuns de relevanza iuridica, laprò inće le profit de stüde y la situaziun de bojëgn;
   
3. les desposiziuns por assegné i punć por la gradatöra.
   

(4) Ales studëntes y ai studënć cun resultać de stüde ezelënć ti pol gnì conzedü stipendiums por sü profić particolars. Un di obietifs prinzipai de chisc stipendiums é chël de motivé la studënta o le studënt da jì inant a studié o da se spezialisé y de promöie la frecuentaziun de universitês, inće privates, de altiscima cualité. Te chësc caje ne vëgnel nia apliché les desposiziuns por la determinaziun de na stleta condiziun economica. Le stipendium por profić particolars corespogn al 20 porcënt dla soma dl stipendium ordinar preodü dal coma 3, lëtra a). Por i stipendiums por profić particolars vëgnel adorè vigni ann academich le trëi porcënt di finanziamënć preodüs por stipendiums. Sce i mesi finanziars a desposiziun ne basta nia por ti dè n stipendium a düć chi che ess le dërt da le ciafè vëgnel metü sö na gradatöra sön la basa dl profit de stüde.

(1) Ales studëntes y ai studënć preodüs dal articul 3 che é te de stletes condiziuns economiches y che n’à nia arjunt, por rajuns de sanité o d’atres rajuns gravëntes y ezezionales, nia gaujades da colpa, le profit de stüde damanè por ciafè le stipendium preodü dal articul 6, ti pol gnì conzedü n stipendium straordinar.

(2) Ales studëntes y ai studënć nia maridà, despartis legalmënter o devorzià, cun mituns a ćiaria che, por gauja dl’assistënza, dl guern o dl’educaziun di mituns, n’à nia arjunt le profit de stüde damanè ti pol gnì conzedü i stipendiums preodü dal coma 1. Chisc po ma gnì conzedüs sce tl momënt dla presentaziun dla domanda n’à la möta o le möt nia complì i sis agn y la studënta o le studënt à arjunt n profit de stüde minim.

(2/bis) Desvian dales desposiziuns preodüdes dal articul 2, ti pol gnì conzedü n stipendium straordinar ales studëntes y ai studënć che nen à dassënn debojëgn. 3)

(3) Tla bandida dl concurs por la conzesciun de stipendiums ordinars preodüs dal articul 6 vëgnel stabilì a tan che i stipendiums amunta y i criters por valuté les condiziuns de relevanza iuridica, le profit de stüde y la situaziun de bojëgn.

(1) Ales studëntes y ai studënć che é iscrić a n’université tla provinzia de Balsan y che é sön la gradatöra de chi che à le dërt de ciafè n stipendium o s’à cualifiché por ciafè n stipendium, preodü dai articui 6 o 7, ti vëgnel retü la tassa provinziala por le dërt de studié al’université.

(2) Ales studëntes y ai studënć preodüs dal articul 2, coma 1, lëtra c) che é iscrić a n’université tla Talia y che é sön la gradatöra de chi ch’à le dërt de ciafè o de chi che s’à cualifiché por ciafè n stipendium, preodü dai articui 6 o 7, ti pol gnì retü les tasses universitares. Chësc a condiziun che les studëntes y i studënć ne sides nia esonerà daldöt dales tasses universitares dales universitês respetives o da d’atri ënć aladô dl articul 12, coma 1, lëtra a), dla lege di 2 de dezëmber dl 1991, n. 390 y mudaziuns suandëntes, o che chëstes tasses ne sides nia bele gnüdes rembursades. 4)

(3) Ales studëntes y ai studënć preodüs dal articul 2, coma 1, lëtra c) che é iscrić a n’université ti paîsc dl raiun cultural todësch y che é sön la gradatöra de chi ch’à le dërt de ciafè o de chi che s’à cualifiché por ciafè n stipendium, preodü dai articui 6 o 7, ti pol gnì retü les tasses universitares. Chësc a condiziun che les studëntes y i studënć ne ciafes nia zoruch daldöt les tasses universitares dales universitês respetives o da d’atri ënć o che ai sides esonerà da chësc paiamënt. 4)

(4) La retüda preodüda dai comesc 2 y 3 vëgn inće a se le dè sce les studëntes y i studënć é esonerà en pert da paié les tasses universitares o sce ares ti é bele gnüdes retüdes parzialmënter dales universitês respetives o da d’atri ënć. Te chësc caje ti vëgnel retü la soma paiada ite efetivamënter o la soma che romagn a ćiaria dles studëntes y di studënć. 4)

(1) A studëntes y studënć che mëss surantó spëises straordinares por na tesa de laurea spezialistica o por n dotorat de inrescida pro n’université taliana o por na tesa de diplom tl cheder de n stüde da magister, por na dissertaziun o na tesa ecuiparada y inće por laûrs de inrescida o de abilitaziun pro na université foradecà ti pol gnì conzedü n stipendium. Chësc po ma gnì conzedü un n iade su tratan le stüde y po gnì acumulé cun les atres prestaziuns preodüdes dal articul 1, coma 1.

(2) L’assegnaziun di stipendiums vëgn fata tres concursc scrić fora dala Junta provinziala.

(3) Tla bandida dl concurs vëgnel stabilì:

1. a tan che i stipendiums amunta;
   
2. i criters por valuté les condiziuns de relevanza iuridica, laprò inće le profit de stüde y la situaziun de bojëgn;
   
3. les desposiziuns por assegné i punć por la gradatöra.
   

(1) Ales studëntes y ai studënć preodüs dal articul 2, coma 1, lëtra c) ti pol gnì conzedü na retüda pausciala dles spëises de iade sc’ai se tëgn sö por rajuns de stüde te na manira permanënta tl post de stüde o tles vijinanzes.Chësta retüda, che corespogn al cost de na cherta por tó la ferata de secunda tlassa, po gnì conzedüda tl tëmp de n ann academich por cater iadi da jì y gnì.

(2) La Junta provinziala fej fora la soma minima che po gnì rembursada.

(1) Tles localitês dla provinzia de Balsan che é sëntes de strotöres universitares po l’aministraziun provinziala mëte a desposiziun poscibilitês abitatives sciöche cuartiers, ćiases por studënć o istituziuns analoghes che vëgn manajades diretamënter dal’aministraziun provinziala o da terzi por studëntes y studënć sciöche inće por les professuries y i professurs a contrat, i visiting professors y por les assistëntes y i assistënć a contrat. La Junta provinziala stabilësc l’afit a ćiaria dles porsones che nen benefiziëia y inće i criters y les modalitês por rové pormez a chëstes poscibilitês abitatives.

(2) La Junta provinziala po stlüje jö convenziuns cun Regiuns o d’atres istituziuns publiches o privates tla Talia o te paîsc dl raiun cultural todësch por resservè n numer adeguè de posć da dormì por studëntes y studënć de Südtirol te strotöres residenziales aposta. Tles convenziuns vëgnel anter l’ater stabilì i criters por rové pormez a chëstes poscibilitês abitatives y inće i cosć por resservè i posć da dormì da pert dl’aministraziun provinziala. L’afit y les spëises secundares é a ćiaria dla studënta o dl studënt che à chësc benefize.

(3) Acioche les strotöres vëgnes adorades deplëgn y cun razionalité po la Junta provinziala ti conzede de rové pro na poscibilité d’abitaziun te chëstes strotöres inće a porsones che n’à aladô de chësta lege nia le dërt de rové ite.

(4) Le post da dormì te na te’strotöra abitativa po gnì acumulé cun les atres prestaziuns preodüdes tl articul 1, coma 1.

(5) Ai ënć y ales assoziaziuns, zënza fins de davagn, che mët a desposiziun posć da dormì preodüs dal coma 1, ti pol gnì conzedü contribuć ćina a na mosöra mascima dl 90 porcënt dles spëises reconesciüdes por:

1. cumprè frabicać o tòć de grunt;
   
2. proietè, fà sö, amplié, sistemé, restrotoré y completè frabicać;
   
3. cumprè aredamënć y atrezadöres.
   

(6) I ënć y les assoziaziuns che ciafa i contribuć preodüs dal coma 5 mëss s’impegné a ne mudé nia la destinaziun d’adoranza di frabicać cun ći che alda laprò, atrezadöres y aredamënt, zënza consëns dla Junta provinziala. La dorada de chësc impëgn, che ne po nia ji sot ai 20 agn mo gnanca sura i 50 agn fora, vëgn stabilida dala Junta provinziala tolon en conscidraziun la mosöra dl contribut conzedü. L’impëgn de ne mudé nia destinaziun d’adoranza vëgn anotè tl liber fondiar.

(7) Sc’al vëgn mudé destinaziun d’adoranza di frabicać y de ći che alda laprò mëssel gnì dè zoruch le contribut cun i fić legai. Sce la strotöra vëgn adorada inant por fins soziai spo vëgn le contribut conzedü smendrì, en raport al tëmp che le frabicat é gnü adorè aladô dla destinaziun dada dant tl coma 1. La desfarënzia, cun i fić legai laprò, mëss gnì dada zoruch.

(8) Desvian dales desposiziuns preodüdes dai comesc 6 y 7 po i bëgns cun lian de destinaziun gnì metüs a desposiziun dla Provinzia sön paiamënt de n’indenisaziun che tëgn cunt di contribuć ciafà.

(1) Le sorvisc de mensa tles localitês universitares dla provinzia de Balsan vëgn manajè dal’aministraziun provinziala. La gestiun ti po inće gnì surandada a terzi.

(2) La Junta provinziala stabilësc i criters y les modalitês por organisé y podëi s’anuzè dl sorvisc de mensa sciöche inće por determiné la partezipaziun ai costimënć da pert dles porsones che se sorvësc dla mensa.

(3) Ai ënć y ales assoziaziuns che manajëia zënza fins de davagn sorvisc de mensa por les studëntes y i studënć preodüs dal coma 1, ti pol gnì conzedü i contribuć preodüs dal articul 11, coma 5.

(1) Por ti alisiré le dërt de studié ales studëntes y ai studënć cun handicap preodüs dal articul 1, coma 4, dla lege provinziala di 30 de jügn dl 1983, n. 20 y mudaziuns suandëntes, ti pol gnì conzedü chisc alisirimënć:

1. finanziamënt o retüda dles spëises por n sorvisc d’assistënza y d’acompagnamënt;
   
2. finanziamënt o retüda dles spëises liades al trasport;
   
3. retüda dles spëises por cumprè mesi didatics;
   
4. finanziamënt de d’atri sorvisc adatà por superè l’handicap.
   

(2) I alisirimënć indicà te chësc articul po gnì acumulà cun les atres prestaziuns preodüdes dal articul 1, coma 1.

(1) Ales studëntes y ai studënć che à arjunt i profić de stüde por la conzesciun de stipendiums ordinars preodüs dal articul 6 y che ne va nia sura n davagn mascimal fora, che vëgn stabilì de ann en ann, ti pol gnì conzedü imprësć dai istituć bancars convenzionà cun la Provinzia. L’alisirimënt de chësc coma po gnì acumulé cun i stipendiums preodüs dal articul 6.

(2) La determinaziun dl import di stipendiums preodüs dal articul 6 y di imprësć preodüs da chësc articul à sciöche fin chël de curì les spëises de mantignimënt dles studëntes y di studënć tratan le tëmp de stüde tles universitês desvalies.

(3) Les studëntes y i studënć cun resultać de stüde ezelënć o che stlüj jö sü stüdi anter la dorada legala po gnì esonerà en pert dal paié derevers i imprësć aladô dles modalitês dades dant ti criters d’assegnaziun.

(4) L’imprëst é da paié zoruch, zënza fić, a pié ia dal 13ejim mëis do avëi rové o lascè definitivamënter de studié, mo te vigni caje nia dan avëi metü man da laurè. I scioldi dl imprëst mëss gnì retüs cun rates periodiches te n tëmp mascim de 15 agn; l’amunta de chëstes rates mëss ester proporzionala al debit che é da dè zoruch. La rata anuala de retüda dl imprëst ne po indere nia superè le 15 porcënt dl davagn anual netto dla porsona che à godü dl benefize. Sc’al passa cin agn dal completamënt o dal’interuziun definitiva di stüdi mëss la porsona che à godü dl benefize, che n’à nia ćiamò metü man da laurè, dè te vigni caje derevers l’imprëst y inće i fić legai, ma por ći che reverda la perioda de tëmp da canche ara à stlüt jö o lascè definitivamënter de studié.

(5) Tles convenziuns stlütes jö cun i istituć bancars preodüs dal coma 1 vëgnel danterater inće stabilì:

1. l’import anual sciöche inće l’import mascimal dl imprëst;
   
2. i terminns anter chi ch’al é da paié les rates dl imprëst tignin cunt dl mëteman di cursc y di profić de stüde;
   
3. a tan che i fić a ćiaria dla Provinzia amunta;
   
4. les garanzies a bëgn di istituć bancars te caji olache l’imprëst ne gniss nia paié zoruch;
   
5. les straufunghes a ćiaria dla banca por le paiamënt tardì dles rates dl imprëst.
   

(1) En colaboraziun cun l’Université Lëdia da Balsan vëgnel promoiü i barać de studëntes y studënć cun les universitês talianes y da foradecà.

(2) I barać nominà tl coma 1 po gnì finanzià da stipendiums sc’ai s’orientëia ai cursc de stüde frecuentà da studëntes y studënć iscrić al’Université Lëdia da Balsan y sc’ai vëgn reconesciüs por le diplom de laurea. Chisc stipendiums po gnì acumulà cun les atres prestaziuns indicades tl articul 1, coma 1.

(3) Ales studëntes y ai studënć che é ghesć pro l’Université Lëdia da Balsan aladô dl coma 1 ti vëgnel conzedü i sorvisc preodüs dai articui 11 y 12.

(1) Ales organisaziuns di studënć cun sënta tla provinzia de Balsan che rapresentëia i interesc de chi che stüdia al’université ti pol gnì conzedü contribuć por chëstes scomenciadies:

1. gestiun dla sënta prinzipala dl’organisaziun te Südtirol y dles sëntes periferiches tles localitês de stüde desvalies;
   
2. investimënć por le funzionamënt dla sënta prinzipala y dles sëntes periferiches;
   
3. ativitês culturales che vëgn organisades pro les sëntes universitares dla Talia o di paîsc dl raiun cultural todësch.
   

(1) Zënza tochè les desposiziuns dades dant tla lege provinziala di 4 de mà dl 1988, n. 15 y mudaziuns suandëntes, pol gnì metü sö a Balsan y pro les sëntes universitares tla Talia o ti paîsc dl raiun cultural todësch che vëgn frecuentades da tröpes studëntes y tröc studënć de Südtirol, sorvisc de informaziun cun la funziun de:

1. dè informaziuns sura l’azès ales universitês talianes y da foradecà y sura les ofertes de formaziun relatives, sciöche inće sura la mobilité nazionala y internazionala;
   
2. colaborè cun les intendënzes competëntes por garantì na informaziun detaiada sön les modalitês por podëi jì a insigné tles scores secundares de pröm y secundo gré;
   
3. garantì na informaziun detaiada y sostëgn canch’ara se trata dl reconescimënt di titui academics y profescionai da foradecà.
   

(2) Le sorvisc vëgn garantì cun so personal o stlujon jö convenziuns aposta cun ënć publics y privać o cun porsones espertes da defora.

(3) L’aministraziun provinziala po organisé tla Talia y ti paîsc dl raiun cultural todësch scomenciadies y manifestaziuns de informaziun por studëntes y studënć, sciöche inće ativitês d’ajornamënt por chi che laôra pro chësc sorvisc y surantó les spëises, cun laprò chëres por le mangé y le dormì. Ara po inće surantó les spëises por cumprè, elaborè y realisé material didatich y informatif, cun laprò hard- y software.

(1) Cun regolamënt d’esecuziun pol gnì preodü ćiamò d’atres scomenciadies y mosöres por realisé le dërt de studié al’université.

(1) A studëntes y studënć che, tl tëmp de sis agn da canche ai à stlüt jö so stüde,

1. fej na formaziun postuniversitara o na spezialisaziun che döra almanco trëi mëisc pro n’université o
   
2. fej n practicum de formaziun o profescional che döra almanco trëi mëisc pro n’istituziun publica o privata
   

ti pol gnì conzedü n stipendium, a condiziun che les studëntes y i studënć ais stlüt jö so stüde universitar, che ai ais arjunt le profit de stüde damanè y che ai sides te de stletes condiziuns economiches.

(2) I stipendiums vëgn assegnà tres concursc scrić fora dala Junta provinziala.

(3) Tla bandida dl concurs vëgnel stabilì:

1. a tan che i stipendiums amunta;
   
2. i criters por la valutaziun dles condiziuns de relevanza iuridica, le profit de stüde y la situaziun de bojëgn;
   
3. les desposiziuns por l’assegnaziun di punć por la gradatöra.
   

(4) I stipendiums ne po nia gnì acumulà cun d’atres mosöres de sostëgn che vëgn conzedüdes da istituziuns o ënć publics o privać che ciafa sovenziuns publiches.

(1) La Junta provinziala é autorisada da individuè i areai y da acuisì, inće tres espropriaziun, imobii por fà sö strotöres universitares, aladô dles prozedöres odüdes danfora dala normes provinziales varëntes. Ara é inće autorisada da surantó les spëises por l’afit, la costruziun y l’adatamënt, la manutenziun y l'aredamënt de strotöres universitares y de strotöres de sorvisc tl ćiamp universitar tla provinzia de Balsan, sciöch’inće da ti imprestè a chëstes strotöres bëgns mobii y imobii, cun laprò chi por le sport, le tëmp lëde y por abité, o da conzede finanziamënć aposta.

(2) Implü é la Junta provinziala autorisada da contribuì finanziariamënter ala gestiun dl’Université Lëdia da Balsan o de d’atres strotöres universitares o de inrescida scientifica cun sënta te Südtirol.

(2/bis) La Junta provinziala é autorisada da definì acordanzes programatiches de de plü agn, tl cheder di finanziamënć por la gestiun dl’Université Lëdia de Balsan o de d’atres strotöres universitares o de inrescida scientifica cun sënta te Südtirol; la curida corespognënta vëgn stabilida cun lege finanziara anuala. 5)

(3) La Junta provinziala é autorisada da sostignì scomenciadies, ativitês y proieć che reverda l’ativité didatica y l’inrescida fać da universitês cun sënta tla Talia o te paîsc dl raiun cultural todësch tl interès dla Provinzia. 6)

(1) Chësta lege ne comporta degönes spëises implü por l’ann finanziar 2004.

(2) Les spëises a ćiaria di agn che à da gnì vëgn stabilides cun lege finanziara anuala.

(1) Chëstes desposiziuns vëgn abrogades:

1. la lege provinziala di 8 d’agost dl 1991, n. 23, y mudaziuns suandëntes;
   
2. l’articul 4 dla lege provinziala di 11 d’agost dl 1998, n. 9.
   

Chësta lege gnarà publicada tl Boletin Ofizial dla Regiun. Vignun a chël ch’al ti speta é oblié da la respetè y da la fà respetè sciöche lege dla Provinzia.