c) Lege provinziala di 19 d’otober dl 2004, n. 71) —
Desposiziuns por valorisé le sorvisc zivil volontar te Südtirol

(1) La Provinzia autonoma de Balsan porta pro ala valorisaziun dl sorvisc zivil volontar tla provinzia y se sorvësc dles ressurses dla sozieté zivila y dl volontariat y inće de sü sorvisc tl ćiamp sozial, sanitar, cultural, ambiental, educatif y dl tëmp lëde.

(2) I fins dl sorvisc zivil provinzial é chisc:

1. ti garantì a dötes les zitadines y a düć i zitadins de podëi tó pert al sorvisc zivil provinzial zënza desfarënzies de eté, ses, cultura o religiun por ti dè la poscibilité de partezipé ativamënter ala vita dla comunité;
   
2. ti pité ala jonëza l’ocajiun de ciafè na formaziun te un o plü ćiamps spezifics y de fà esperiënzes por miorè les conescënzes profescionales y por arjunje na cosciënza soziala plü sota;
   
3. ti dè la poscibilité ales porsones adultes de vigni eté de mëte a desposiziun dla comunité so savëi y sües esperiënzes y de ciafè insciö bonus y vantaji;
   
4. promöie proieć y scomenciadies por sodesfà i bojëgns y les ghiranzes dla comunité dantadöt dles porsones plü debles y dejavantajades dla sozieté;
   
5. promöie seturs y ativitês inovatives sciöche la cultura dla pêsc y dla solidarieté y inće formes alternatives de intervënć nia violënć te situaziuns de crisa;
   
6. promöie le svilup sostignibl dla sozieté sides a livel provinzial che a livel global;
   
7. colaborè cun l’Ofize Nazional por le Sorvisc Zivil y cun d’atres istituziuns statales o comunitares.
   

(1) I fins preodüs dal articul 1 vëgn realisà tres:

1. le sorvisc zivil volontar fat aladô dla lege di 6 de merz dl 2001, n. 64, da jogn y jones danter i 18 y i 28 agn por na perioda che va dai 6 ai 12 mëisc pro organisaziuns y ënć de dërt privat y publich ciafan compënsc, bonus y vantaji preodüs dal articul 6, comesc 1, 2, 3 y 7, y inće dal articul 14, coma 1, lëtra a);2)
   
2. le sorvisc zivil sciöche sorvisc sozial volontar fat da porsones adultes y porsones atempades por na perioda che va dai 8 ai 24 mëisc pro organisaziuns y ënć privać y publics.Sciöche compëns ciafa chëstes porsones volontares bonus y vantaji preodüs dal articul 6, coma 1, 4, 5, 6, y 7, y dal articul 14, coma 1, lëtra a).
   

(1) Le sorvisc de volontares y volontars preodüs dal articul 2, coma 1, ne stabilësc nia n raport de laûr y al vëgn a s’al dè tl cheder de proieć y intervënć te chisc seturs:

1. assistënza sanitara y soziala;
   
2. reintegraziun tla sozieté sciöche inće d’atri intervënć de carater sozial, dantadöt intervënć d’emergënza;
   
3. educaziun, laûr por y cun la jonëza y promoziun culturala;
   
4. sconanza dl patrimone ambiental y artistich;
   
5. proteziun zivila;
   
6. sconanza di dërć dles consumadësses y di consumadus;
   
7. cooperaziun al svilup y intervënć de pêsc danter i popui;
   
8. organisaziun dl tëmp lëde y dl’educaziun sportiva.
   

(1) L’aministraziun provinziala arjigna:

1. n sistem de informaziun y na banca dać di proieć y di intervënć pità por garantì che les zitadines y i zitadins s’intopes plü saurì te na varieté ampla de propostes y inće por favorì le contat danter le volontariat y le marćé dl laûr;
   
2. n sistem de control provinzial por garantì che che che tol pert respetes sü dovëis y sües oblianzes; ma insciö po le sorvisc zivil portè pro a n svilup y a na valorisaziun dla porsona.
   

(1) Al vëgn metü sö la cherta de reconescimënt dl sorvisc zivil por les volontares y i volontars preodüs dal articul 2, coma 1, olache al vëgn registré i sorvisc fać tl cheder dl’ativité praticada y la formaziun arjunta, sciöche inće i bonus y i vantaji che po gnì adorà do che les prestaziuns fates é gnüdes reconesciüdes.

(2) Cun na deliberaziun da publiché tl Boletin Ofizial dla Regiun determinëia la Junta provinziala i ćiamps olache i bonus y i vantaji preodüs por i sorvisc registrà sön la cherta de reconescimënt dl sorvisc zivil po gnì adorà.

(1) A dötes les volontares y a düć i volontars che fej le sorvisc zivil ti vëgnel garantì debann les prestaziuns sanitares liades al eserzize dl sorvisc volontar.

(2) Ales volontares y ai volontars preodüs dal articul 2, coma 1, lëtra a), ti speta le paiamënt por le sorvisc zivil preodü dal articul 9, coma 2, dl decret legislatif di 5 d’aurì dl 2002, n. 77, cun laprò les indenitês eventuales tl caje che le sorvisc zivil vëgnes fat foradecà y inće düć i atri vantaji preodüs.

(3) Ales volontares y ai volontars preodüs dal articul 2, coma 1, lëtra a), che à l’atestat de bilinguism o de trilinguism preodü dal articul 4 dl decret dl Presidënt dla Republica di 26 de lugio dl 1976, n. 752, ti speta l’indenité preodüda dal articul 1 dl medemo decret; chësta é a ćiaria dl fonds provinzial por le sorvisc zivil.

(4) La Junta provinziala stabilësc cun deliberaziun da publiché tl Boletin Ofizial dla Regiun la retüda dles spëises al mëis por les volontares y i volontars preodüs dal articul 2, coma 1, lëtra b). Chëstes spëises é a ćiaria dl fonds provinzial por le sorvisc zivil. Chësta retüda dles spëises ne n’é nia sotmetüda al paiamënt dla cuta regionala sön l’ativité produtiva (IRAP); l’oblianza de presentè eventualmënter la detlaraziun dles cutes – IRAP resta impé.3)

(5) A dötes les volontares y a düć i volontars preodüs dal articul 2, coma 1, lëtra b) ti vëgnel garantì l’assiguraziun de responsabilité zivila y cuntra inzidënć. Chëstes spëises é a ćiaria dles organisaziuns y di ënć pro chi che les volontares y i volontars laôra.

(6) Ales volontares y ai volontars preodüs dal articul 2, coma 1, lëtra b), ti vëgnel retü les spëises por la contribuziun volontara por la preodënza soziala da pert dl fonds provinzial por le sorvisc zivil.

(7) La Junta provinziala fej fora cun deliberaziun da publiché tl Boletin Ofizial dla Regiun l’esenziun o la reduziun dles cutes locales a bëgn dles volontares y di volontars y di ënć de sorvisc zivil.

(1) La Provinzia eserzitëia funziuns de programaziun, d’orientamënt y de control; ara se sorvësc dles propostes y di consëis dl Sorvisc d’osservaziun provinzial por le volontariat. La Provinzia à chëstes competënzes:

1. istituì le register provinzial di ënć de sorvisc zivil pro la Repartiziun Presidënza;
   
2. garantì la formaziun de basa dles volontares y di volontars fissan tl program anual relatif les materies y i aspeć fondamentai da tratè te chësc contest;
   
3. ejaminé y aprovè i proieć de sorvisc zivil;
   
4. laurè fora i programs anuai d’ativité y de gestiun finanziara;
   
5. coordiné le sistem informatif y istituì la banca dać;
   
6. ćiarè che les desposiziuns dl sorvisc zivil volontar vëgnes aplicades indortöra.
   

(1) La Provinzia istituësc le fonds provinzial por le sorvisc zivil volontar; te chësc röia les ressurses dl fonds nazional por le sorvisc zivil preodü dal articul 4 dl decret legislatif di 5 d’aurì dl 2002, n. 77.

(2) Sce les ressurses dl fonds nazional por paié che che fej le sorvisc zivil volontar preodüs dal articul 2, coma 1, lëtra a), ne basta nia, spo vëgnel tut ca les ressurses dl fonds provinzial por ti dè le paiamënt ales volontares y ai volontars che laora tla provinzia sön la basa dla programaziun provinziala.

(1) Por gnì scrić ite tl register provinzial mëss les organisaziuns y i ënć publics y privać de sorvisc zivil ademplì chëstes condiziuns:

1. n’avëi degügn fins de davagn;
   
2. avëi funziuns istituzionales por promöie fins te un di seturs preodüs dal articul 3;
   
3. avëi capazité d’organisaziun y poscibilitês d’intervënt en proporziun ai proieć y ai intervënć preodüs;
   
4. mostrè sö n’ativité continuada da almanco trëi agn.
   

(2) L’acreditamënt y l’iscriziun tl register nazional dl Ofize Nazional por le Sorvisc Zivil vel sciöche titul por l’iscriziun tl register provinzial.

(1) I ënć de sorvisc zivil é competënć por la formaziun y inće por l’istruziun spezifica dles volontares y di volontars; por chësc fin poi se sorvì dl sostëgn di posć de coordinaziun o de formes d’assoziaziun di ënć.

(2) I ënć de sorvisc zivil en colaboraziun cun la Provinzia se crüzia de ajornè les porsones responsables dl sorvisc zivil ti ënć.

(1) La Junta provinziala aprovëia i proieć y i intervënć de sorvisc zivil che ademplësc chëstes condiziuns:

1. presentaziun dl’ativité por chëra che al vëgn damanè do volontares y volontars de sorvisc zivil;
   
2. dorada mascima dl intervënt preodüda dal articul 2, coma 1;
   
3. numer minim de volontares y volontars che po gnì tuć sö;
   
4. criters por chirì fora les volontares y i volontars;
   
5. previjiun dla formaziun de basa dla volontara o dl volontar;
   
6. determinaziun dl program de formaziun spezifica y dla prozedöra de control dles competënzes arjuntes;
   
7. indicaziun dla referënta o dl referënt che à la responsabilité dl’esecuziun dl proiet y dla porsona responsabla dl sorvisc zivil tl ënt o tl post de coordinaziun;
   
8. detlaraziun sön la segurëza y la sconanza dles volontares y di volontars inće por ći che reverda la proteziun dl’assiguraziun;
   

(1) Le fonds provinzial por le sorvisc zivil vëgn finanzié dala Provinzia, dal Stat y dal’Uniun Europeica.

(2) Les spëises che resultëia dal’atuaziun de chësta lege vëgn curides dai mesi finanziars metüs a desposiziun dal fonds provinzial por le sorvisc zivil preodü dal articul 8, coma 1, y inće dai mesi preodüs tles leges de setur di intervënć.

(1) I bonus y i vantaji preodüs dai articui 6 y 14 ti speta inće a che che fej le sorvisc zivil canche chësta lege va en forza.

(1) Cun regolamënt d’esecuziun vëgnel regolè:

1. i vantaji preodüs a bëgn dles volontares y di volontars sciöche credić de formaziun por la formaziun universitara y profescionala, le reconescimënt dl sorvisc zivil pro i concursc publics, les alisiraziuns tla mediaziun dl laûr, sciöche inće tl’adoranza di sorvisc de trasport publics, les reduziuns pro manifestaziuns culturales y sportives;4)
   
2. les modalitês y les condiziuns por l’iscriziun tl register preodü dal articul 7;5)
   
3. i controi por garantì le respet dles condiziuns preodüdes da chësta lege;
   
4. i criters por aprovè proieć y intervënć preodüs dal articul 11.
   

(1)6)

Chësta lege vëgn publicada tl Boletin Ofizial dla Regiun. Vignun a chël ch’al ti speta é oblié da la respetè y da la fà respetè sciöche lege dla Provinzia.