b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1) Ti caji de nezescité y sce al vëgn sö emergënzes che interessëia plü comuns vëgnel convochè le zënter operatif raional por coordiné les aziuns de salvamënt y d’aiüt; chësc é presidié dal presidënt o dala presidënta dla uniun raionala di Corps di stödafüch volontars o da n so deleghè o da na süa delegada.

(2) Vigni zënter operatif raional é metü adöm dales porsones suandëntes:

1. le presidënt o la presidënta a će dla direziun;
2. n rapresentant o na rapresentanta dla repartiziun competënta por les costruziuns idrauliches;
3. n rapresentant o na rapresentanta dla repartiziun competënta por le sorvisc dles strades;
4. n rapresentant o na rapresentanta dla repartiziun competënta por i bosć;
5. n rapresentant o na rapresentanta dl’Aziënda sanitara locala;
6. n rapresentant o na rapresentanta dl Ofize competënt por la proteziun zivila.

(3) Le presidënt o la presidënta po cherdè a tó pert ales reuniuns d’atri funzionars o porsones cun competënzes tecniches dl’aministraziun provinziala o statala y porsones espertes de situaziuns spezifiches desvalies; al po inće nominé n vizepresidënt o na vizepresidënta.

(4) Le zënter operatif raional coordinëia le personal, i mesi y les atrezadöres a desposiziun tl raiun, ti mëna inant les domandes d’aiüt al Zënter operatif provinzial o al’aministraziun provinziala o statala y ti garantësc n’assistënza tecnich-aministrativa ai zëntri operatifs comunai.

(5) I mëmbri di zëntri operatifs raionai vëgn nominà dala Junta provinziala y romagn tl’inćiaria por cin agn. I comëmbri suplënć po gnì chiris fora dai mëmbri efetifs dal’organisaziun instëssa tignin cunt dla situaziun d’emergënza. La funziun de secretêr o de secreteria vëgn surantuta da n comëmber dl zënter operatif raional o da personal dependënt dl’aministraziun provinziala. Chi che fej pert di zëntri operatifs raionai ciafa la retribuziun odüda danfora dala normativa provinziala, tan inant che ara ti speta.