(1) Pro vigni comun vëgnel metü sö n zënter operatif por la proteziun zivila. I comëmbri dl zënter operatif comunal vëgn nominà dal consëi de comun y à le dovëi de sostignì l’ombolt o l’ombolta tla previjiun, tla prevenziun y tl’atuaziun dles mosöres da tó te caji de catastrofes. Por chësc fin vëgnel elaborè n plann sön la basa de modei che l’Ofize por la proteziun zivila dla Provinzia mët a desposiziun; chësc vëiga danfora:
(2) Le zënter operatif comunal é presidié dal ombolt o dal’ombolta o da na porsona da ël o ëra delegada. Le numer dles porsones che fej pert dl zënter operatif comunal depënn dal numer diabitanć y dala grandëza dl raiun comunal. Dl zënter operatif comunal mëssel te vigni caje fà pert le comandant o la comandanta dl Corp di stödafüch de profesciun por le Comun de Balsan y ti atri comuns n comandant o na comandanta di Corps di stödafüch volontars. Implü pol fà pert dl zënter operatif comunal inće i rapresentanć o les rapresentantes di ofizi destacà dl aministraziun provinziala y inće dles assoziaziuns de volontariat por la proteziun zivila reconesciüdes. Le personal dla Repartiziun provinziala Bosć vëgn metü en sorvisc por l’esecuziun dles ativitês relatives, tan inant che l’ombolt o l’ombolta arata de ütl cherdè ite le personal forestal pro le zënter operatif comunal, o sce al vëgn nominé comëmber dla comisciun comunala por la proteziun cuntra les lovines. Le zënter operatif comunal resta de regola tl’inćiaria por la dorada dla legislatöra o almanco ćina a so renovamënt.
(3) Vigni comun ti ortiëia al Comitê provinzial por la proteziun zivila na copia di planns comunai y inće dötes les dates che va debojëgn por l’elaboraziun dl plann provinzial de proteziun zivila.