b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1) L’ombolt o l’ombolta agësc tl cheder de sües competënzes o de chëres delegades aladô dles normes de lege varëntes y é l’autorité comunala por la proteziun zivila. Por ći che reverda l’esecuziun de laûrs resta impé l’autonomia operativa dles singules aministraziuns; chëstes mëss indere informè i ombolć interessà o les omboltes interessades dles scomenciadies tutes.

(2) Tl caje de situaziuns d’emergënza bele rumpides ite o de situaziuns de prigo iminënt ti speta al comun les ativitês de salvamënt y de pröm aiüt por les popolaziuns tocades, l’esecuziun di laûrs urgënć y che ne se lascia nia sburlé, por restabilì indô i sorvisc prinzipai, y inće l’esecuziun de vigni ater provedimënt por superè la situaziun de bojëgn a condiziun che l’organisaziun, i mesi y les ressurses umanes a desposiziun dl comun bastes por ester a će dl’emergënza. Les desposiziuns dla lege provinziala di 12 de messè dl 1975, n. 34, resta impé. Te chësc caje se crüzia l’ombolt o l’ombolta dla coordinaziun di intervënć y tol düć i provedimënć che aladô dles leges corespognëntes fej pert de süa competënza. Le comun po se sorvì dla consulënza tecnica y aministrativa dl ofize por la proteziun zivila y dles atres strotöres provinziales competëntes.

(3) Sce n comun n’é nia bun da s’un tó sura aladô dl coma 2 o sce l’avenimënt reverda le teritore de plü comuns, vëgn les ativitês de salvamënt y de pröm aiüt fates en colauraziun cun le Zënter operatif provinzial y raional.

(4) Te situaziuns de prigo gravënt se fistidiëia l’ombolt o l’ombolta de:

1. segnalè les situaziuns de prigo, coordiné i intervënć y inće damanè intervënć y aiüć da pert dl’aministraziun provinziala;
2. garantì l’atuaziun dles desposiziuns dades fora dal Zënter operatif provinzial y dal Comitê provinzial por la proteziun zivila;
3. regolè le trafich y determiné i itinerars de oblianza;
4. deslarié fora le segnal d’evacuaziun dla popolaziun dai raiuns manacià;
5. dèl’ordinn d’evacuaziun di abitanć aladô dl articul 18 dla lege regionala di 4 de jenà dl 1993, n. 1.