(1) Le comun mët a desposiziun di Corps di stödafüch volontars i locai adatà por che ai pois eserzité so sorvisc cuntra le medefüch te na manira adeguada, al se crüzia dl’istalaziun y dla manutenziun di idranć de strada, dl refornimënt dl’ega plü adatè ales nezescitês locales y inće d’arjigné ite implanć d’alarm en conformité ales normes diretives dades fora dal consëi d’aministraziun dl’Aziënda speziala. Por chësc fin po les aministraziuns de comun damanè alisiraziuns y contribuć odüs danfora da chësta lege y dales normes dla Provinzia.
(2) Tut fora desposiziuns desfarëntes, é düć i cosć nezesciars por l’ativité dl Corp di stödafüch volontars a ćiaria dl comun; al surantol inće les spëises por l’acuisiziun y la manutenziun dles atrezadöres y dl echipamënt.
(3) Pro l’emisciun de conzesciuns, reconescimënć y renovamënć di dërć por l’utilisaziun d’eghes publiches mëssel gnì garantì la cuantité d’ega nezesciara por les operaziuns cuntra le medefüch.
(4) Sön dötes les contestaziuns che vëgn fates por gauja dles spëises albüdes pro intervënć, che chësta lege mët a ćiaria di comuns o de privać, tol na dezijiun la Junta provinziala sön tru aministratif.
(5) La partezipaziun al finanziamënt dles spëises ordinares di bilanc di Corps di stödafüch volontars istituida aladô dl articul 1 dla lege regionala di 14 de jenà dl 1978, n. 1, vëgn tuta jö y porchël resta les spëises ordinares che va sura les entrades ordinares fora a ćiaria dles aministraziuns de comun competëntes por le raiun.
(6) I bilanc di singui Corps di stödafüch volontars che vëgn elaborà dai comandanć y dales comandantes vëgn aprovà dal consëi de comun competënt. Cun l’aprovaziun di bilanc aprovëia i comuns inće le finanziamënt dles spëises che é odüdes danfora por le consum, la manutenziun y inće por la sostituziun d’atrezadöres y dl echipamënt di Corps di stödafüch volontars.
Art. 51 (Plann de finanziamënt dles dotaziuns de sorvisc di Corps di stödafüch volontars)
(1) Le consëi d’aministraziun dl’Aziënda speziala aprovëia n plann por arjigné ite atrezadöres, auti, mascinns y echipamënt por le sorvisc cuntra le medefüch che mëss gnì presentè dal’Uniun provinziala di Corps di stödafüch volontars. Le plann contëgn:
- les sorts d’atrezadöres che po gnì paiades cun contribuć por i Corps di stödafüch volontars, les Uniuns raionales di Corps di stödafüch volontars, l'Uniun provinziala, le Consorz di stödafüch de Südtirol y la Scora di stödafüch provinziala;
- les dotaziuns minimes por les singules categories di Corps di stödafüch volontars;
- les spëises por i intervënć de manutenziun straordinara;
- les spëises y les dotaziuns por la gestiun y la manutenziun ordinara dles atrezadöres di punć de sostëgn. 13)
(2) Tl cheder di mesi desponibli po le plann resservè na cuota por curì les spëises che reverda acuisiziuns nia preodüdes, d’urgënza y straordinares.