(1) Le comandant o la comandanta y le vizecomandant o la vizecomandanta dl Corp di stödafüch volontars vëgn proponüs dal Corp instës y nominà dal ombolt o dal’ombolta. La proposta vëgn fata tres na lîta da pert di mëmbri atifs dl Corp di stödafüch volontars tignin cunt dl’idoneité y dla partezipaziun ai cursc d’adestramënt preodüs dala Scora di stödafüch provinziala. Tl caje de gran violaziuns di dovëis d’ofize po le consëi de comun trà zoruch cun na deliberaziun iustificada les funziuns de comandant o comandanta y de vizecomandant o de vizecomandanta dl Corp di stödafüch volontars.
(2) Le comandant o la comandanta dl Corp di stödafüch volontars fej pert por dërt dla comisciun por le frabiché y olache ara esist dla comisciun cuntra le medefüch dl comun respetif y inće dl zënter operatif comunal. Sce al esist tl medemo comun plü Corps di stödafüch volontars spo po n comandant deleghè o na comandanta delegada o le comandant competënt o la comandanta competënta te chël raiun fà pert dles comisciuns nominades chilò dessura.
Art. 49 (Inzidënć, maraties y rembursamënć)
(1) Sce n inzidënt de sorvisc o na maratia ciafada intratan le sorvisc de stödafüch, o a gauja de chësc, porta ala mort o a na invalidité permanënta o temporana paia l’Aziënda speziala na soma sciöche indenisaziun por le dann albü a bëgn dl stödafüch volontar inzidentè o püre o dla stödafüch volontara inzidentada o püra, o a chi che à la rajun.
(2) La soma paiada ne vel nia sciöche tratamënt economich por maratia o inzidënt y é acomulabla cun les formes desvalies, volontares o obligatories, de previdënza o assistënza economica a chëres che ara vëgn injuntada.
(3) Le consëi d’aministraziun dl’Aziënda speziala determinëia les modalitês y l’amunta di paiamënć; chisc ne po nia ester mëndri di imporć che vëgn paià dal Istitut Nazional por l’Assiguraziun cuntra i Inzidënć sön le Laûr.
(4) Por podëi fà pert dl sorvisc atif di stödafüch adora düć i mëmbri dl Corp di stödafüch n zertificat de idoneité dl dotur; por podëi eserzité ativitês particolarmënter prigoroses sciöche l’adoranza de mascheres de respiraziun o cosses analoghes vëgnel scrit dant na vijita da n dotur spezialisé o da na doturia spezialisada inće cun analises de laboratore y/o analises stromentales.
(5) Les porsones indicades ti articui 18 y 32, coma 10, é parificades ai mëmbri di stödafüch.
(6) Pordüdes de davagn o de paiamënt relevantes da reportè a intervënć ti vëgn rembursades, sön domanda dl interessè o dl’interessada, al stödafüch volontar o ala stödafüch volontara dal comun y ai funzionars o ales funzionares dles Uniuns preodüdes dal articul 2, coma 3, dal’Aziënda speziala.