(1) La Provinzia po conzede a istituziuns y a organns zënza fins de davagn, che laora tla Provinzia de Balsan y che destriga ativitês tl setur dl’assistënza sanitara y sozio-sanitara, n finanziamënt ćina al 100 por cënt dla spëisa reconesciüda sciöche ametüda por la realisaziun, la restrotoraziun y l’adeguamënt de strotöres dedicades al’assistënza paliativa y de sostëgn dantadöt por i paziënć cun la neoplasia terminala: chësc finanziamënt sozed respetan les desposiziuns aladô dl Decret dl Minister por la sanité di 28 de setëmber 1999, publiché tl Boletin Ofizial, nr. 55 di 7 de merz 2000, y dl Decret dl Presidënt dl Consëi di Ministri di 20 de jenà 2000, publiché tl Boletin Ofizial nr. 67 di 21 de merz 2000.
(2) Les strotöres realisades cun le finanziamënt dla Provinzia mëss ester destinades por le fin dl coma 1 por na dorada de 30 dis. Le lian de destinaziun vëgn registré tl liber fondiar. Tl caje che la destinaziun vëgn mudada, vëgn le finanziamënt retü en proporziun ala dorada dl lian, adöm cun i interesc legai.
(3) Les istituziuns y i organns aladô dl coma 1, mëss s’impegné de stlüje jö convenziuns cun les aziëndes sanitares competëntes te areai desvalis.
(4) La Junta provinziala, cun la delibera che é da publiché tl Boletin Ofizial dla Regiun, determinëia i criters y les modalitês de prestaziun dles domandes, de licuidaziun dl finanziamënt y la documentaziun dles spëises da presentè.
(5) Por i fins de chësc articul vëgn la spëisa de lires 2.000.000 autorisada a ćiaria dl eserzize finanziar 2001 (capitul 52430). La spëisa a ćiaria di eserzizi finanziars seghënć gnarà autorisada cun la lege finanziara anuala.72)