(1) Le raport de laûr dl Diretur general vëgn regolè cun n contrat de laûr dl dërt privat aposta a tëmp determiné; les condiziuns de contrat vëgn stabilides dala Junta provinziala, tignin cunt di livì retributifs preodüs por chësc setur. Por ći che reverda l’incompatibilité y l’ilitabilité, vëgnel apliché les desposiziuns dl’articul 3, comesc 9 y 11 dl Decret legislatif di 30 de dezëmber 1992, nr. 502, y les mudaziuns suandëntes. I dependënć publics nominà vëgn colocà tl’aspetanza aladô dles desposiziuns statales varëntes, sc’ai ne tol nia la dezijiun de mantignì le tratamënt economich ch’ai god. La dorada dl raport de laûr ne po nia ester mëndra co trëi y nia maiù co cin agn, mo tl caje che la valutaziun é tlermënter tresfora positiva tl arjunje sü obietifs, vëgn le contrat arlungé.
(2) La Junta provinziala stabilësc i prinzips generai, i obietifs y i criters de valutaziun dl’ativité dl Diretur general.13)
(3) Ti caji de n gran dejavanz o de violaziun de leges o dl prinzip dl bun andamënt y de imparzialité dl’aministraziun, azertà dai organns de control, o tl caje ch’al n’é nia gnü arjunt i obietifs dl coma 2, che mëss gnì verificà anter le mëis de mà dl ann do chël de referimënt, do avei aldì l’interessè, detlarëia la Junta provinziala la decadënza dl Diretur general dal’inćiaria y desliëia le contrat de laûr.14)
(4) La nominaziun dl Diretur general comporta por i dependënć le colocamënt te aspetativa zënza assëgns y le dërt al mantignimënt dl post. L’aspetativa vëgn conzedüda anter 60 dis dal dé ch’al é gnü fat domanda. Le tëmp d’aspetativa é d’ütl por le tratamënt de contlujiun dl raport de laûr y de previdënza. Les aministraziuns d’portignënza fistidiëia por le versamënt di contribuć previdenziai y assistenziai adöm cun les cuotes a pëis dl dependënt, calcolà sön le tratamënt economich corespognü por l’inćiaria che ti é gnüda conferida ti limi de mascimai aladô dl articul 3, coma 7, dl Decret legislatif di 24 d’aurì 1997, nr. 181, y fistidiarà de ghiré dal’Aziënda sanitara la retüda de dötes les spëises albüdes che ćiararà de trà ite la cuota a pëis dl interessè.