(1) I bilanc njiniëi dala Jonta regiunela o da chëla provinziela y i rendiconc finanzieres njuntei dala relazion dla Jonta nstëssa ie apurvei respetivamënter cun lege regiunela o provinziela.
(2) La litazion de uni capitul dl bilanz dla Region y dla Provinzia de Bulsan vën tenida, sun dumanda dla maiuranza de na grupa linguistica, per grupes linguistiches.
(3) I capituli de bilanz che ne à nia giatà la maiuranza dla stimes de uni grupa linguistica vën sometui, tl lim de tëmp de trëi dis, a na cumiscion de cater cunselieres regiunei o provinziei, liteda dal Cunsëi al scumenciamënt dla legislatura y per duta la dureda de chësta, cun cumposizion paritetica danter la doi majera grupes linguistiches y n cunformità ala desiniazion de uni una de chësta grupes.
(4) La cumiscion nunzieda tl coma dessëura muessa fé ora, tl lim de tëmp de chindesc dis, cun dezijion lienta per l Cunsëi, la denuminazion definitiva di capituli y l munté di stanziamënc relatives. La dezijion vën tëuta a maiuranza scëmpla, y la usc de uni cunselier vel unfat.
(5) Sce tla cumiscion ne vëniel nia arjont la maiuranza sun na pruposta cuntlujiva, manda l Presidënt dl Cunsëi regiunel o de chël provinziel, tl lim de tëmp de set dis, l proiet dl bilanz y duta la ates y i verbai dla discuscion fata tl Cunsëi y tla Cumiscion, ala sezion autonóma de Bulsan dl Tribunal regiunel de giustizia aministrativa che, nchin a trënta dis do, muessa dezider cun pronunzia arbitrela la denuminazion di capituli nia apurvei y l munté di stanziamënc relatives.
(6) La pruzedura dessëura nunzieda ne vën nia aplicheda ai capituli de ntreda, ai capituli de spëisa che cuntën stanziamënc da scrì ite n basa a despusizions spezifiches de lege per na soma determineda danora per l ann finanzier y ai capituli relatifs ala spëises normales de funzionamënt per i organns y i ufizies dl ënt.
(7) La dezijions nunziedes tl coma 4 y 5 de chësc articul ne possa nia unì cuntestedes y l ne possa nia unì fat recurs decontra pra la Chëurt costituzionela.
(8) Per i capituli definei cun la pruzedura aldò di comes dessëura possa la lege de apurvazion dl bilanz unì renvieda o cuntesteda dal Guviern mé per rejons de iligitimità che reverda viulazions dla Costituzion o de chësc Statut.
(9) Per l’apurvazion di bilanc y di rendiconc finanzieres dla Region iel debujën dla usc cunsenzienta dla maiuranza di cunselieres dla Provinzia de Trënt y dla Provinzia de Bulsan. Sce chësta maiuranza ne vën nia arjonta, vën l’apurvazion data da n organn a livel regiunel. Chësc organn ne possa nia mudé la dezijions sun i capituli de bilanz eventualmënter cuntestei n basa a cie che ie udù danora ti comes 3, 4 y 5 de chësc articul y definei cun la pruzedura ndicheda iló.