a) Lege Provinziala di 7 de messè dl 2010, n. 91)
Desposiziuns tl ciamp dl sparagn d'energia, dl'energia regenerabla y dla sconanza dl clima 2)

(1) La Provinzia autonoma de Balsan sostëgn l’adoranza razionala dl’energia, le sparagn de energia, sciöche inće l’adoranza de fontanes de energia regenerables, en conformité ala politica dl’energia dl’Uniun Europeica.

(2) Por i fins preodüs dal coma 1 vëgnel conscidré sciöche fontanes de energia regenerables chëstes fontanes de energia nia fossiles: vënt, sorëdl, energia aerotermica, geotermica y idrotermica, forza dl’ega, biomassa, gas de desćiaria, gas avanzè da prozesc de depuraziun y biogas.

(3) La Provinzia sostëgn tl ciamp di obietifs internazionai, nazionai y dl’Uniun europeica por la sconanza dl clima le smendrimënt dles emisciuns de gas cun na faziun ciasa de spidl y tl medemo tëmp na fornidöra de energia sostenibla.  3)

(1) La costruziun y l'eserzize di implanć de produziun de energia eletrica da fontanes renovables, i intervënć de mudaziun y potenziamënt, la recostruziun totala o parziala y la reativaziun, sciöche inće les operes coliades y les infrastrotöres indispensables por la costruziun y l'eserzize di implanć é sotmetüs al’autorisaziun unica preodüda dal articul 12 dl decret legislatif di 29 de dezëmber dl 2003, n. 387, y mudaziuns suandëntes, sciöche al articul 5 dl decret legislatif di 3 de merz dl 2011, n. 28. 4)

(1) Por la costruziun y l’eserzize di implanć de produziun de energia eletrica da fontanes renovables ćina a 1 MW eletrich, por les operes coliades y por les infrastrotöres indispensables por la costruziun y l’eserzize di implanć, sciöche por les mudaziuns sostanziales di implanć, vëgnel apliché la prozedöra d’abilitaziun scemplificata preodüda dal articul 6 dl decret legislatif di 3 de merz dl 2011, n. 28. Sce les desposiziuns provinziales prevëiga autorisaziuns ambientales o paesajistiches de competënza provinziala, mëss la realisaziun y l'eserzize de chisc implanć avëi l'autorisaziun unica preodüda dal articul 1-bis.

(2) Les spëises de inrescimënt a ćiaria dl proponënt y a bëgn dl comun competënt por le teritore vëgn stabilides insciö:

1. 0,015 porcent dles spëises complessives d’investimënt dl'istalaziun di implanć cun capazité de generaziun che ne superëia nia 500 kW;
   
2. 0,020 porcent dles spëises complessives d’investimënt dl'istalaziun di implanć cun capazité de generaziun de passa 500 kW. 5)
   

(1) Tl respet dles prescriziuns di stromënć urbanistics di comuns y a vigni moda tl respet dles atres normatives sön la regolamentaziun dl frabiché y, dantadöt dles desposiziuns antisismiches, de segurëza, cuntra le mè de füch, igienich-sanitares y de chëres dla faziun energetica, sciöche inće dles desposiziuns sön la sconanza y conservaziun dl patrimone storich, artistich y popolar y de sconanza dla contrada y dles desposiziuns preodüdes dal articul 3, coma 5, dla lege provinziala di 30 de setëmber dl 2005, n. 7, y mudaziuns suandëntes, po i implanć de produziun de energia eletrica da fontanes renovables preodüdes dai paragrafs 11 y 12 dles diretives por l'autorisaziun di implanć da fontanes renovables, adotades aladô dl articul 12, coma 10, dl decret legislatif di 29 de dezëmber dl 2003, n. 387, y mudaziuns suandëntes, gnì realisà zënza n’autorisaziun, do la comunicaziun, inće por via telematica, dl scomenciamënt di laûrs da pert dla porsona interessada dl’aministraziun comunala, aladô dles condiziuns y modalitês preodüdes dales diretives. Tl respet dles desposiziuns sön la valutaziun de impat ambiental y de sconanza dles ressurses idriches, vëgn le regim dla comunicaziun slarié fora ai proieć de implanć de produziun de energia eletrica da fontanes renovables cun potënza nominale ćina a 50 kW, sciöche inće i implanć fotovoltaics de vigni potenza da realisé sön i frabicać. 6)

(1) Vigni dui mëisc ti lascia i comuns alsavëi, por via telematica, ala Repartiziun provinziala Natöra, contrada y svilup dl teritore y al’Agenzia provinziala por l’ambiënt les informaziuns sön les autorisaziuns conzedüdes, sciöche inćë les comunicaziuns de scomenciamënt di laûrs cun laprò la sort dl implant y la localisaziun. 7)

(1)  La Provinzia autonoma de Balsan pó, aladô dles modalités y di criters fissá dala Junta provinziala, conzede contribuc por investimënc de alplü le 80 porcënt por mioré l’efiziënza dl’energia y l’adoranza dles fontanes de energia regenerables, sciöche ince conzede contribuc por scomenciadies por dé inant le savëi, por elaboré stromënc de planificaziun y por zertificac y audit tl ciamp dl’energia. I contribuc por les impreses vëgn conzedüs tl cheder dles normes dl’Uniun europeica por i aiüc de Stat por la sconanza dl ambiënt y por l’energia. 9)

(1/bis) 10)

(2) La Provinzia autonoma de Balsan po, aladô dles modalitês y di criters fissà dala Junta provinziala, conzede contribuć tla mosöra mascimala dl 80 porcënt por fà sö y amplié implanć por prodüje forza eletrica da fontanes de energia regenerables por frabicać da paur, prömes abitaziuns, frabicać aziendai, üties de munt y ćiajares, sce ai ne n’é nia colià ala rëi dla forza eletrica y ara ne va nia da realisé n coliamënt ala rëi dla forza eletrica a cosć proporzionà y zënza dificoltês tecniches spezifiches.

(3) La Provinzia autonoma de Balsan po inće conzede contribuć tla mosöra mascimala dl 80 porcënt ales aziëndes de destribuziun de forza eletrica:

1. sce ares é atocades da catastrofes naturales;
   
2. por coliamënć nüs, la sostituziun o le renforzamënt de implanć de destribuziun de forza eletrica ti raiuns rurai;
   
3. por spostè sot tera ite les condütes tl’aria a tenjiun mesana y bassa;
   
4. por le coliamënt ala condüta dla forza eletrica de üties de munt y ćiajares, sce al ne n’é nia na forma de refornimënt de forza eletrica plü bun marćé.
   

(4) Sce les spëises ametüdes a contribut é de passa 500.000 euro, pol gnì conzedü n’antizipaziun de alplü 50 porcënt dl contribut.

(5) Sce les somes é ametüdes a contribut y é bele gnüdes resservades a ćiaria dl bilanz provinzial, mëss la documentaziun dles spëises gnì ortiada te alplü trëi agn pian ia dal eserzize a chël che la resservaziun se referësc, scenò toma le contribut.

(6) I contribuc preodüs dai comesc 1 y 2 ne pó nia gní acumulá cun d’atri contribuc o d’atres alisiraziuns, bel anfat de ci sort, odüs danfora da normes statales o a ciaria dl bilanz provinzial por les medemes spëises amiscibles. I contribuc preodüs dal coma 1 pó gní acumulá cun finanziamënc de operes publiches aladô di articui 3 y 5 dla lege provinziala di 11 de jügn dl 1975, n. 27, y mudaziuns suandëntes.  11)

(6/bis) Por i intervënc preodüs dal decret dl Ministere por le svilup economich di 16 de forá dl 2016 realisá da aministraziuns publiches, pó i contribuc preodüs dal coma 1 gní conzedüs ma tla mosöra dl 20 porcënt por integré i sostëgns statai.  12)

(7) Al vëgn abroghè:

1. la lege provinziala di 19 de forà dl 1993, n. 4, y mudaziuns suandëntes;
   
2. le coma 4 dl articul 6 dla lege provinziala di 13 de forà dl 1997, n. 4;
   
3. les lëtres f) y g) dl coma 1 dl articul 8 dla lege provinziala di 30 d’agost dl 1972, n. 18 y mudaziuns suandëntes.
   

(1) Ti condomini, ti frabicac plurifunzionai y a vigni moda ti frabicac cun de plü anuzadus finai che á a desposiziun n implant zentral de scialdamënt y desfridamënt o na rëi de telescialdamënt o teledesfridamënt mëss le proprietar lascé istalé sistems de termoregolaziun y de contadus de consum individuai. Al vëgn mosoré le consum efetif de cialt, frëit y ega cialda de vigni unité imobiliara. 13)

(2) Tl caje de frabicac che é bele olache al n’é tecnicamënter nia poscibl da istalé contadus de consum individuai preodüs dal coma 1 o al n’é nia efiziënt dal punt de odüda di cosć en relaziun al sparagn d’energia potenzial, mëss le proprietar lascé istalé, por mosoré le consum por ci che reverda le scialdamënt, sistems de contabilisaziun indireta dl cialt sön vigni radiadú che é tles unités imobiliares singoles, ater co sce al resultëia che l’istalaziun de chisc sistems ne sides nia efiziënta por ci che reverda i cosć.

(3) I contadus de consum individuai y i sistems de contabilisaziun indireta dl cialt, preodüs dai comesc 1 y 2, che é impormó gnüs istalá mëss podëi gní lic da dalunc. Cina al 1. de jená dl 2027 mëss düc i contadus de consum individuai y i sistems de contabilisaziun indireta dl cialt preodüs dai comesc 1 y 2 gní dotá de despositifs che conzed da i lí da dalunc, tan inant che chësc é fatibl dal punt de odüda tecnich y efiziënt por ci che reverda i cosć.

(4) Ti frabicac preodüs dai comesc 1 y 2, por partí sö coretamënter les spëises liades al consum de cialt por le scialdamënt y desfridamënt dles unités imobiliares singoles y di raiuns che vëgn adorá deboriada, y ince por l’ega cialda, sce ara vëgn scialdada zentralmënter, vëgn l’import complessif partí sö danter i anuzadus finai atribuin na cuota de almanco le 50 porcënt ai prelevamënc de energia termica volontars. Les desposiziuns preodüdes da chësc coma é facoltatives ti frabicac pro chi che al é bele gnü istalé, canche chësta desposiziun vá en forza, i despositifs preodüs dai comesc 1 y 2 y al é bele gnü fat la partiziun di cosć relativa.

(5) La Junta provinziala stabilësc i criters por mosoré y contabilisé le consum d’energia por le scialdamënt, le desfridamënt y l’ega cialda.  14)

(1) Sce al ne vëgn nia osservé les desposiziuns preodüdes dal articul 2/bis, dá fora l’Agenzia provinziala por l’ambiënt y la sconanza dl clima n avertimënt y mët n termo anter chël che al é da tó y jí l’inosservanza constatada.

(2) La dejosservanza dl avertimënt preodü dal coma 1 porta al’aplicaziun de chëstes sanziuns aministratives:

1. le proprietar dl’unité imobiliara che ne lascia nia istalé n contadú de consum individual preodü dal articul 2/bis, coma 1 vëgn sotmetü ala sanziun aministrativa de scioldi da 250 a 750 euro por vigni unité imobiliara;
   
2. le proprietar dl’unité imobiliara che ne lascia nia istalé sistems de contabilisaziun indireta dl cialt preodüs dal articul 2/bis, coma 2 sön vigni radiadú che é tl’unité imobiliara singola vëgn sotmetü ala sanziun aministrativa de scioldi da 250 a 750 euro por vigni unité imobiliara;
   
3. i proprietars di frabicac preodüs dal articul 2/bis che ne partësc nia sö i cosć aladô dles desposiziuns preodüdes dal articul 2/bis, coma 4, vëgn sotmetüs ala sanziun aministrativa de scioldi da 200 a 600 euro por vigni unité imobiliara.  15)
   

(1) Por sparagné energia mëss les portes de azes al publich di eserzizi comerziai gní tignides stlütes tratan le tëmp che al vëgn scialdé y ince d'isté sce al vëgn impié l'implant por l'aria condizionada; chësc ne vel nia por le tëmp che la clientela adora por jí ite y fora y che vá debojëgn por ciarié y desćiarié.

(2) Les desposiziuns preodüdes dal coma 1 ne vëgn nia aplicades sce les portes n'é nia diretamënter a contat cun l'aria da defora o sce sura les portes él en funziun n injin por l'aria che smendrësc la pordüda d'energia.

(3) La Junta provinziala determinëia i criters por l'aplicaziun dles desposiziuns preodüdes dai comesc 1 y 2, do avëi aldí le Consëi di Comuns.

(4) Sce al ne vëgn nia osservé les desposiziuns preodüdes dal coma 1, relascia le comun n'amoniziun. Sce al ne vëgn nia respeté l'amoniziun aplichëia le comun sanziuns aministratives che vá da n minim de 500,00 euro a n mascim de 1.500,00 euro.  16)

(1) Por sparagné energia y sconé le clima mëss i aparac de desfridamënt di eserzizi comerziai avëi üsc o sistems de saradöra ecuivalënc.

(2) La Junta provinziala determinëia i criters por l'aplicaziun dles desposiziuns preodüdes dal coma 1, do avëi aldí le Consëi di Comuns.

(3) Sce an ne se tëgn nia ales desposiziuns preodüdes da chësc articul se crüzia le comun da amoní le patrun dl aparat de desfridamënt y stabilësc le termin cina chël che al mëss eliminé les mancianzes ciafades sö. Sce an ne se tëgn nia al’amoniziun aplichëia le comun na sanziun aministrativa da altamo 200,00 euro a alplü 600,00 euro por vigni aparat de desfridamënt nia conform ales desposiziuns preodüdes dal coma 1.  17)

(1) Les spëises por i intervënć a ćiaria dl eserzize 2010 che vëgn da chësta lege, vëgn curides cun les cuotes de stanziamënt ćiamò dan man sön les UPB 23105, 23205 y 23210 dl bilanz provinzial dl 2010, autorisades por i intervënć preodüs dales leges abrogades dal articul 2, coma 7, lëtres a), b) y c).

(2) La spëisa a ćiaria di eserzizi finanziars suandënć vëgn stabilida cun la lege finanziara anuala.

Chësta lege gnarà publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.