(1) Cun l'ativiteies "feries sun l luech da paur" ntënden l servisc rezetif y de alojamënt per ghesć pità da pert di mprenditëures agricui nunziei tl articul 2135 dl codesc zevil – nce tla forma de sozieteies de persones o tla forma de n'assoziazion – y denuminei tlo dedò mprenditëur agricul, tres la nuzeda de si azienda n cumbinazion cun la laurazion dl terac, la cultivazion dl bosch y l zidlamënt de bestiam.
(2) Aldò dl articul 230-bis y 230-ter dl codesc zevil muessa l'atività "feries sun l luech da paur" unì eserziteda dantaldut dal mprenditëur agricul y dala persones de si familia. La persones che dejëuj l'ativiteies "feries sun l luech da paur" vën ratedes lauranc agricui ai fins dla despusizions valëivles sun l tratamënt de previdënza, d'assegurazion y dla chëutes. 2)
(3) L'ativiteies "feries sun l luech da paur" tòl ite:
- pité alojamënt a ghesć te frabiches sun l luech da paur; 3)
- dé ora da maië y da bever sun l luech da paur ("Hofschank"), te mediei sa mont ("Almschank"), te ustaries da paur (Buschenschank"), pra la trasses di troies per la rodes o coche party-service,
- urganisé, nce ora di grunc a despusizion dl'azienda, ativiteies recriatives, cultureles, didatiches, sportives, jites a pe y a ciaval, urganisé pra l'azienda degustazions de prudoc dl luech da paur y di luesc dl raion ntëurvia, y mëter a jì ativiteies d'assistënza de persones, nce tres cunvenzions cun i ënc locai, al fin de valorisé l teritore y l patrimone culturel rurel.
(4) L'ativiteies nunziedes tl coma 3 possa unì eserzitedes adum o ndependentmënter. L'atività de dé ora da maië y da bever sun l luech da paur y chëla tla ustaries da paur ne ie nia cumpatibles la una cun l'autra. L’atività de dé alojamënt ne ie nia cumpatibla cun l’atività rezetiva fata a na maniera prufesciunela. 4)
(5) Cun aziendes agricules dl raion iel minà chëles nluegedes sun l teritore provinziel, tlo leprò toca nce la cooperatives de trasfurmazion y cumerzialisazion de prudoc da paur.
(6) Aldò dl articul 2, coma 5 dla lege di 20 de fauré 2006, n. 96, ie la ntredes che vën dal'ativiteies "feries sun l luech da paur" ai fins dl recunescimënt dla cualifiches defrëntes de mprenditëur agricul sciche nce dla priorità tl paië ora i cuntribuc, y a uni moda per uni auter fin che ne sibe nia de carater fischel, ratedes ntredes agricules.
L articul 2, coma 2, ie unì mudà nsci dal articul 20, coma 1, dla L.P. di 27 de merz 2020, n. 2.
L pustom a), dl articul 2, coma 3, ie unì mudà nsci dal articul 20, coma 2, dla L.P. di 27 de merz 2020, n. 2.
L articul 2, coma 4, ie unì mudà nsci dal articul 20, coma 3, dla L.P. di 27 de merz 2020, n. 2.