(1) L'organisaziun dles ativitês formatives y didatiches toma, tl respet dles competënzes di organns colegiai y dl dirigënt o dla dirigënta dla scora, tl'autonomia y tla responsabilité dles scores.
(2)Por realisé i curricula dles scores organisëia les scores, tl cheder dl plann trienal dl’oferta formativa, les ativités y les materies dla cuota resservada ales scores y dla cuota facoltativa opzionala eventuala, che va a öna cun le profil formatif dla scora, sciöche ince - tla scora mesana - cun la continuaziun di stüdi tl secundo scalin d’istruziun. La cerna dles ativités opzionales vëgn fata cun l’aiüt dl personal insegnant y vëiga danfora ince la partezipaziun dles families. A chëstes ativités pon tó pert debann. Les scolares y i scolars mëss tó pert ales ativitês y ai insegnamënc chiris fora. Les scores po, te süa autonomia, se mëte adöm por amplié l'oferta. 32)
(3) Les scores realisëia sü curricula aladô di prinzips dla lege provinziala di 29 de jügn dl 2000, n. 12, y tl respet dles indicaziuns provinziales, y stabilësc le numer de ores complessif a na moda che al vëgnes garantì na destribuziun dl'oferta de formaziun ecuilibrada por promöie l'individualisaziun y la personalisaziun dl imparè. Les scores sostëgn la partezipaziun y la reflesciun dles scolares y di scolars y ti assigurëia, tl cheder de süa autonomia didatica y organisativa, a vigni scolara y a vigni scolar na consulënza individuala por l'aprendimënt y l'orientamënt, sciöche inće na documentaziun dles conescënzes y competënzes. Le collegium di insegnanć definësc i criters y les mosöres por realisé concretamënter la consulënza tl aprendimënt, y por la documentaziun dl svilup dl aprendimënt.
(4) Por garantì l'uniformité dl insegnamënt laôra fora y mët a jì les insegnantes y i insegnanć dl consëi de tlassa deboriada les ativitês; ai é contitolars dla tlassa. Ëi porta pro a cherié n conzet d’insegnamënt integrè. Tla scora elementara insëgna vigni insegnant y vigni insegnanta de plü materies y te de plü tlasses, inće deboriada cun d’atri y te forma de modui, y sc’ara va te na sóra sënta scolastica.
(5) Por les scolares y i scolars cun handicap resta impé les mosöres por l'integraziun y l’intlujiun odüdes danfora dala lege provinziala di 30 de jügn dl 1983, n. 20, y mudaziuns suandëntes.