(1) Le pröm scalin d’istruziun se basëia sön le percurs metü man dala familia y dala scolina; al promöi le svilup dla personalité dles scolares y di scolars, y cheriëia les condiziuns por n aprendimënt global, interdisciplinar y dialogich. Al azeta y valorisëia les poscibilitês y les desfarënzies de vignun y vignöna, inće chëres che depënn da n handicap, y arata la pluralité n valur. So fin é chël de svilupé la costruziun dl sè y les competënzes soziales, y cheriëia les condiziuns por n aprendimënt por döta la vita. Le pröm scalin d’istruziun promöi ativamënter le dialogh cun les families tres incuntades de barat y de colaboraziun regolares. Tl cheder de süa autonomia se tôlel dant sü fins formatifs; al realisëia i obietifs odüs danfora dales indicaziuns provinziales, y assigurëia la continuité formativa cun la scolina y cun le secundo scalin d’istruziun.
(2) La scora elementara promöi, tres n’impostaziun globala, l'acuisiziun dles formes d’espresciun desfarëntes y dles tecniches culturales. Ara cheriëia les condiziuns por n confrunt cun i ćiamps d’aprendimënt desfarënć por svilupé les competënzes de basa y la comprenjiun dl monn. Implü promöiera esperiënzes soziales por renforzè les competënzes dl vire tla comunité.
(3) Zënza tochè i prinzips dà dant tl coma 2, vëgn l'insegnamënt tles scores di paîsc ladins tignì tl cheder dl ordinamënt preodü dal articul 19, coma 2, dl Statut d’autonomia y dles normes che alda laprò.
(4) La scora mesana promöi, tres l’insegnamënt spezifich y interdisciplinar, l'ampliamënt dles conescënzes, dles abilitês, dles capazitês y di comportamënć, y renforza la competënza de tó dezijiuns dles scolares y di scolars en ralaziun ala planificaziun de süa vita. Ara mët a jì, adöm cun les scores dl secundo scalin y i ofizi provinziai competënć, scomenciadies d’orientamënt por le secundo scalin y aziuns de formaziun por passè l’ejam de stat.
(5) Sön la basa dla situaziun linguistica particolara te Südtirol assigurëia le pröm scalin de istruziun l’insegnamënt dl lingaz dla uma todësch o talian, dl secundo lingaz, sciöche inće l’acuisiziun de conescënzes de basa de inglesc. Por miorè les conescënzes de de plü lingac dles scolares y di scolars po les scores mëte a jì proieć inovatifs d’insegnamënt di lingac, tl respet dl articul 19 dl Statut d’autonomia y dles indicaziuns dla Junta provinziala. Tles scores di paîsc ladins vëgnel renforzè y aprofondì, tl cheder dles desposiziuns sön l’insegnamënt paritetich, les competënzes di lingac ladin, todësch, talian y les conescënzes de basa d’inglesc.