(1) Le sistem formatif provinzial à sciöche fin le svilup y la valorisaziun de vigni porsona, y l’acuisiziun de comportamënć democratics y de competënzes soziales, che pormët de tó pert ala vita tla comunité. Chësc sozed tl respet dles fases de svilup aladô dl'eté, dles desfarënzies y dl'identité de vignun y vignöna, inće tres la cooperaziun danter scora y geniturs, y en armonia cun i prinzips dla Detlaraziun universala di dërć dla porsona, dla Convenziun internazionala sön i dërć di mituns, dla Costituziun y dl Statut d’autonomia.
(2) La Provinzia realisëia chisc fins - tl respet dl'autonomia dles scolines y dles scores - tres süa politica dla formaziun y promöi:
- le svilup cultural, sozial y economich dla popolaziun;
- la realisaziun de n contest sozial che garantësces la conviënza danter i grups linguistics mantignin sües carateristiches y tradiziuns;
- la difujiun y le renforzamënt dl pinsier y dla cultura europeica che se basëia sön raîsc cristianes;
- la conescënza dla storia locala, por ti fà conësce ales scolares y ai scolars le svilup storich dla provinzia y les cultures y tradiziuns locales.
(3) Por promöie le suzès formatif de vigni porsona se tol la Provinzia dant da realisé mosöres che garantësc le dërt d’azès a düć i degrà de formaziun, ales medemes poscibilitês de formaziun, al aumënt dla cualité y dla cuantité dl’oferta de formaziun y al’imparè por döta la vita. Chëstes mosöres à inće sciöche fin l'orientamënt y l'inserimënt tl monn dl laûr, sciöche inće le svilup de competënzes por afrontè i mudamënć y se orientè te n monn tres plü compliché.
(4) Le sistem formatif provinzial ti garantësc a düć le dërt de formaziun, pian ia dala scolina, y l’ademplimënt dl dovëi de formaziun scolastica y profescionala por almanco dodesc agn, o a vigni moda, ćina al arjunjimënt de na cualifica profescionala de almanco trëi agn, ćina ai dejedot agn.
(5) Le sistem formatif provinzial é partì ite tla scolina, n pröm scalin che tol ite la scora elementara y la scora mesana, y n secundo scalin, che tol ite les scores altes a carater statal y chëres dla formaziun profescionala dla provinzia. Inće les scores de musiga metüdes sö dai istituć d’educaziun musicala fej pert dl sistem formatif provinzial.
(6) Le dërt y le dovëi de istruziun y formaziun vëgn ince realisá tles scores privates parificades y reconesciüdes dala Provinzia sciöche ince tl cheder dl’istruziun di geniturs. 2)
(6/bis) Sce al vëgn realisé le dërt y le dovëi de istruziun y formaziun te na scora privata reconesciüda dala Provinzia mëss i scolars y les scolares dé jö n ejam de idoneité ala fin dla scora elementara por gní ametüs al proscimo degré scolastich o al ejam de stat che stlüj jö le pröm scalin d’istruziun da privatisć/privatistes. Implü él ince da dé jö n ejam de idoneité sce al vëgn fat domanda de iscriziun a na scora de carater statal, a na scora profescionala dla Provinzia o a na scora parificada. 3)
(6/ter) Sce che che eserzitëia la responsabilité da genitur se crüzia da ademplí le dërt y le dovëi de istruziun y formaziun tl cheder dl’istruziun di geniturs mëssi ti le comuniché ann por ann al diretur/ala direturia dl’istituziun scolastica a carater statal dl pröm scalin competënta a livel raional o dl'istituziun scolastica publica chirida fora dl secundo scalin d'istruziun. Te chësta comunicaziun mëss che che eserzitëia la responsabilité da genitur, tres na detlaraziun sostitutiva de n at de notorieté aladô di articui 46 y 47 dl decret dl Presidënt dla Republica di 28 de dezëmber dl 2000, n. 445, conescion le conseguënzes penales preodüdes dal articul 76 dl decret dl Presidënt dla Republica n. 445/2000 tl caje de detlaraziuns o atestaziuns falzes:
- desmostré da avëi fat n colloquium de consulënza obligatore te scora, da n espert/na esperta dl'Unité consulënza psicopedagogica dla Repartiziun pedagogica o dal Garant/dala Garanta por l'infanzia y l'adolescënza;
- dé dant ci porsones che tëgn l'istruziun di geniturs y de ci cualificaziuns che ares desponn;
- splighé sciöche ai á intenziun da garantí che al vëgnes arjunt i obietifs formatifs stabilis tles indicaziuns provinziales o ti planns de stüde, presentan n program y desmostran te na manira detaiada sciöche les ores de leziun vëgn planificades y tignides. 4)
(6/ter.1.) La comunicaziun referida al anuzamënt dl'istruziun di geniturs preodüda dal coma 6/ter por l'ann de scora suandënt mëss de regola gní fata anter le tëmp por les iscriziuns te scora o alplü tert cina al termo d'esclujiun di 31 de messé. L'istruziun di geniturs é da tigní por la dorada de n ann de scora intier, ater co te situaziuns motivades. La direturia o le diretur dla scora o na porsona inciariada da d'ël pó intratan l'ann jí a ciaré a sciöche al vëgn tigní les leziuns, valutan ince les competënzes sozio-emozionales dla porsona de mëndra eté. Sce al ess da ester n dübe iustifiché che l'eserzize dl dërt de formaziun dla porsona de mëndra eté sides al prigo, pó la direturia/le diretur de scora bele do le pröm tëmp de valutaziun, invié ia les mosöres che vëgn preodüdes dales desposiziuns varëntes sce al vëgn violé le dovëi de istruziun y formaziun. Les porsones de mëndra eté che vëgn istruides dai geniturs mëss, por passé tla classa suandënta y cina al ademplimënt dl dovëi de istruziun y formaziun, fá vigni ann l'ejam d'idoneité sciöche candidat o candidata da defora pro la scora a chëra che al ti é gnü presenté la detlaraziun che an s'anüza dl'istruziun di geniturs. 5)
(6/quater) 6)
(7) Les desposiziuns varëntes sön le dovëi scolastich y sön le dërt y dovëi de formaziun resta impé; chisc po gnì ademplis tan bëgn tles scores a carater statal co tles scores profescionales provinziales.
(8) L’anuzamënt dl'oferta de formaziun é por düć, inće por i minorenns da foradecà che é tla provinzia de Balsan, n dërt sogetif y n dovëi sozial. Tres mosöres adeguades vëgnel garantì l'integraziun y l'intlujiun dles mitans y di mituns sciöche inće dles jones y di jogn cun handicap tl sistem formatif provinzial.
(9) Ala realisaziun dl dovëi scolastich y dl dërt y dovëi de formaziun porta pro les scolares y i scolars, sües families, la scolina, les scores y les istituziuns por la formaziun profescionala, les aziëndes che tol sö jones y jogn cun n contrat da lerner, sciöche inće d’atres istituziuns y organisaziuns por la formaziun. Les scolines y les scores se crüzia te chësc contest dantadöt dla colauraziun cun les scores de musiga dl istitut por l'educaziun musicala.
(10) Le svilup y la valorisaziun dla porsona y le svilup dles competënzes por vire tla comunité vëgn promoiüdes tl sistem formatif provinzial tres la realisaziun de percursc formatifs che corespogn ales predisposiziuns de vignun y de vignöna, che vëgn svilupades a na manira mirada, y che à sciöche fin le suzès formatif plëgn.
(11) La Junta provinziala definësc tl Statut dles scolares y di scolars i dërć y i dovëis dles scolares y di scolars, y stabilësc indicaziuns por mosöres d’orientamënt, de prevenziun y de recuperada de chi che à lascè da jì a scora, acioche an pois assiguré deplëgn la realisaziun dl dërt y dovëi de formaziun.
(12) Les direziuns raionales dles scolines y les scores promöi, tl cheder de süa autonomia, l'individualisaziun y la personalisaziun dl imparè dles mitans y di mituns, sciöche inće dles scolares y di scolars, che é i aturs primars y i destinatars dl sistem formatif provinzial. Les direziuns raionales dles scolines y dles scores definësc le curriculum por realisé percursc formatifs che corespognes ales predisposiziuns y ai bojëgns formatifs de vigni möta y de vigni möt, sciöche inće de vigni scolara y de vigni scolar, y adora stromënć adatà de consulënza por l'aprendimënt y l'orientamënt, y de documentaziun.
(13) Por les scolares y i scolars che renunzia da tó pert al’insegnamënt de religiun catolica él preodü la partezipaziun obligatoria a n’oferta formativa alternativa. La Junta provinziala aprovëia le regolamënt d’esecuziun che toca lapró. 7)
L'art. 1, coma 6 é gnü sostituí insciö dal art. 9, coma 1 dla l.p. di 11 de messé dl 2018, n. 10.
L'art. 1, coma 6/bis, é gnü injunté dal art. 9, coma 2 dla l.p. di 11 de messé dl 2018, n. 10.
L'art. 1, coma 6/ter é gnü injunté dal art. 9, coma 2 dla l.p. di 11 de messé dl 2018, n. 10, dedô él gnü mudé dal art. 10, coma 1 dla l.p. di 29 d'aurí dl 2019, n. 2 y inultima él gnü sostituí dal art. 7, coma 1 dla l.p. di 12 de otober dl 2021, n. 11.
L’art 1, coma 6/ter1.1. é gnü injunté dal art. 7, coma 2 dla l.p. di 12 de otober dl 2021, n. 11.
L'art. 1, coma 6/quater é gnü injunté dal art. 9, coma 2 dla l.p. di 11 de messé dl 2018, n. 10, y spo abroghè dal art. 10, coma 1 dla l.p. di 29 d'aurí dl 2019, n. 2.
L'art. 12, coma 13 é gnü ajunté dal art. 30, coma 1 dla l.p. di 10 de jená dl 2022, n. 1. Ciara ince l'art. 30, coma 2 dla l.p. di 10 de jená dl 2022, n. 1.