i) Lege Provinziala di 26 de mà dl 2006, n. 41)2)
Gestion dl refudam y defendura dl terac

Recuisic de basa n cont dla cumposizion y l renuzamënt y la recuperabltà (dantaldut l rezitlaje) di mpacamënc

1. Recuisic per la frabicazion y la cumposizion di mpacamënc

1. I mpacamënc ie produjei a na maniera da limité l volum y l pëis al minim de bujën per garantì l livel de segurëza, de igena y de azetabltà che ie de bujën sibe per l prudot mpacà che per l cunsumadëur.
   
2. I mpacamënc ie da cunzepì, produjer y cumerzialisé a na maniera che l renuzamënt o la recupereda, ënghe l rezitlaje, sibe puscibli y che la fazion sun l ambient pra l smaltimënt dl refudam de mpacamënt o dla restanzes dla oprazions dla gestion dl refudam de mpacamënt sibe limiteda a n minim.
   
3. I mpacamënc ie da produjer a na maniera che la prejënza di mitei danejënc y d' autra sustanzes y materiai periculëusc coche costituenc di materiai de mpacamënt o de vel' cumpunënta dl mpacamënt sibe limiteda al minim cun referimënt a si prejënza tla emiscions, ti cëndri o tla avanzadures de lescivazion, canche i mpacamënc o la restanzes dla oprazions dla gestion dl refudam de mpacamënt ie ncendrei o giavei ite.
   

2. Recuisic per l renuzamënt de n mpacamënt

Chisc recuisic muessa vester sodesfac tl medemo mumënt:

1. la carateristiches fisiches y la merches dl mpacamënt muessa lascé pro na lingia de spustamënc y rotazions te cundizions d' adurvanza da udëi danora normalmënter;
   
2. i mpacamënc adurvei muessa pudëi unì tratei tenian cont dl respet dla cundizions de sanità y de segurëza per i lauranc y la laurantes nteressedes;
   
3. usservanza di recuisic spezifics per i mpacamënc recuperabli sce l mpacamënt ne vën nia plu adurvà y devënta nsci refudam.
   

3. Recuisic per la recuperabltà de n mpacamënt

1. Mpacamënc recuperabli tla forma de rezitlaje dl material
   L mpacamënt muessa unì produjà a na maniera da lascé pro l rezitlaje de na cërta perzentuela de pëis di materiai adurvei, tla frabicazion di prodoc cumerziabli, respetan la normes n forza tla Cumenanza europea. La determinazion de chësta perzentuela possa mudé aldò dl material dl mpacamënt.
   
2. Mpacamënc recuperabli tla forma de recupereda d' energia
   L refudam de mpacamënt tratà per la recupereda d' energia muessa avëi n valor calorifich minim che lasce nce pro pra l valor plu bas na recupereda d' energia otimala.
   
3. Mpacamënc recuperabli tla forma de cumpost
   L refudam de mpacamënt tratà per la produzion de cumpost muessa vester biodegradabl assé a na moda da ne vester no de rëm per l'abineda deferenzieda y per l pruzes o l'atività de cumpostaje te chëi che i ruva ite.
   
4. Mpacamënc biodegradabli
   L refudam de mpacamënt biodegradabl muessa pudëi unì desfat tres pruzesc fisics, chimics, termics o biologics a na maniera che la gran pert dl prudot finel se partësc su te biossid de carbonium, biomassa y ega.
   

-------------------------------------------