i) Lege Provinziala di 26 de mà dl 2006, n. 41)2)
Gestion dl refudam y defendura dl terac

(1) L refudam vën tlassificà, aldò dla pruvenienza, te refudam de nridlamënt y te refudam speziel, y, aldò dla carateristiches dl pericul, te refudam periculëus y refudam nia periculëus.

(2) L refudam de nridlamënt ie:

1. l refudam de cësa, nce l refudam grove, che vën da locai y lueges destinedes a n’adurvanza d'abitazion zevila;
2. l refudam nia periculëus che vën da locai y lueges nuzedes per adurvanzes defrëntes da chëles nunziedes pra l pustom a), tratà unfat coche l refudam de nridlamënt per cualità y cuantità dal chemun sun la basa di criteres fissei dala Jonta provinziela;
3. l refudam che se porta pro dal netamënt dla stredes;
4. l refudam de uni sort o pruvenienza, che ie sun la stredes y sperses publiches o sun la stredes y sperses privates azessibles al publich o sun spiages de lec y rives de ruves azessibles te na maniera liedia;
5. l refudam vegetel pruvenient da sperses vërdes sciche parcs, verzons y curtines;
6. l refudam pruvenient da esumazions y auter refudam che vën da ativiteies de curtina, che ne toma nia sot ai pustoms b), c) y e).

(3) L refudam speziel ie:

1. l refudam che vën dal’agricultura y dal’agroindustria;
2. l refudam che vën dal’ativiteies de demolizion y costruzion, y l refudam che vën dal’ativiteies de giaveda y che superea i valores lim stabilii dala Jonta provinziela;
3. l refudam che vën dala laurazion ndustriela;
4. l refudam che vën dala laurazion artejanela;
5. l refudam che vën da ativiteies cumerzieles;
6. l refudam che vën da ativiteies de servisc;
7. l refudam che vën dal’atività de recupereda y de smaltimënt dl refudam, la lutreies prodotes dala potabilisazion y da d’autri tratamënc dl’eghes y dala depurazion dl’eghes de desćëria y dai mplanc de netamënt di fums;
8. l refudam che vën dala ativiteies de selezion mecanica dl refudam de nridlamënt solid;
9. l refudam che vën da ativiteies saniteres;
10. la mascinns y i njins danejei y vedli;
11. i veicui a motor, i remorcs y simileres che ne va nia plu, ma nce pertes de chisc;
12. l combustibl da refudam.

(4) Periculëus ie l refudam che ne vën nia da abitazions zeviles, dat sëura avisa tla njonta A y senià cun n asterisch "*", coche stabilì tla dezijion 2000/532/CE dla Cumiscion dl 3 de mei 2000.