i) Lege Provinziala di 26 de mà dl 2006, n. 41)2)
Gestion dl refudam y defendura dl terac

(1) Te chësta lege ntënden per

1. refudam: duta la sustanzes y duc i ogec che toma ite tla categories dates dant tla njonta A y che l detenient tol y tres, o che l uel o muessa tò y tres;
   
2. materia prima segondera; sustanza o materia cun la carateristiches stabilides tl articul 5;
   
3. [sotprodot: la sustanzes y i materiai de chëi che l produtëur ne uel nia se desgatië aldò dl pustom a) y che sodesfej duc i criteres, i recuisic y la cundizions tlo dessot:
   
   1. les se à purtà pro da n pruzes de produzion, ma ne ie nia l travert de chësc pruzes de produzion;
      
   2. si adurvanza ie bele segura a pië via dala fasa de produzion, la ie ntegrela y vën realiseda diretamënter tl pruzes de produzion o te n pruzes de nuzeda ndividuà y definì danora;
      
   3. les curespuend ai standarc de marcanzia y de cualità ambientela adatei a garantì che si nuzeda ne gauje nia emiscions y fazions ambienteles che ne sibe cualitativamënter y cuantitativamënter nia defrëntes da chëles autorisedes per l mplant ulache les ie destinedes a unì adurvedes;
      
   4. les ne daussa nia unì sometudes danora a tratamënc y mudazions, per curespuender ai standarc de marcanzia y de cualità ambientela aldò dl pont 3), ma les muessa avëi chisc recuisic dal mumënt dla fasa de produzion;
      
   5. les muessa avëi n valor economich de marcià. La Jonta provinziela stabilësc i criteres aldò de chëi che la tiera y i sasc da giavedes ie ratei sotprodoc.] 3)
      
4. refudam de nridlamënt problematich: l refudam de nridlamënt che cuntën sustanzes problematiches per l ambient;
   
5. produtëur: la persona che à dejëut n’atività da chEla che l se à purtà pro na produzion de refudam (prim produtëur dl refudam) o che à fat operazions de tratamënt danora, de mescedoz o d’autri tratamënc che gauja n mudamënt dla natura o dla cumposizion dl refudam;
   
6. detenient: l produtëur dl refudam o la persona fisica o giuridica che à l refudam;
   
7. gestion; abiné adum, traspurté, rezitlé y tò y tres l refudam, coche nce cuntrolé chësta operazions y cuntrolé la desćëries y i mplanc de smaltimënt do che i ie unic stluc;
   
8. abineda: tlupé su, neté la stredes, mëter adum y cërder l refudam per l trasport;
   
9. abineda deferenzieda: abiné adum te na maniera adateda a spartì l refudam de nridlamënt te frazions de marcanzia omogenees per l fin de si recupereda o smaltimënt;
   
10. tratamënt dl refudam: la pruzedures de recupereda o de smaltimënt aldò di pustoms k) y l);
    
11. recupereda: la pruzedures che se nuza de refudam per crië materies primes segonderes, combustibli o prudoc tres tratamënc mecanics, termics, chimics o biologics, y la cerduda y dantaldut la pruzedures ududes danora tla njonta C;
    
12. smaltimënt: uni pruzedura per tò y tres definitivamënter na sustanza, n material o n oget dal zirtl economich o de abineda, y, dantaldut, la pruzedures cuntenides tla njonta B. L smaltimënt dl refudam ie la ultima fasa dla gestion dl refudam, do che l ie unit cuntrolà la pusciblteies tecniches y economiches per dejëujer na pruzedura de recupereda y tulan n cunscidrazion chësta prescrizions:
    
    1. la realisazion y la gestion de brujadoies de refudam possa mé unì autorisedes sce la pruzedura de brujeda garantësc la recupereda dl’energia cun na cuota minima de trasfurmazion dla putënza de sciadaumënt dl refudam te energia de utl;
       
    2. la esportazion y la mpurtazion de refudam nia periculëus per l smaltimënt ie pruibides, ora che tl cajo de acurdanzes regiuneles o nternaziuneles te situazions particuleres y limitedes tl tëmp;
       
13. luegia de produzion dl refudam: una o de plu frabiches o stabilimënc o sperses de nfrastrutura cunliedes la una cun l’autra sun n areal delimità, ulache l vën fat l’ativiteies da chëles che l refudam se porta pro;
    
14. desćëria: n mplant per l smaltimënt dl refudam coche definì tl articul 2, coma 1, pustom a) dl decret dl Presidënt dla Provinzia di 26 de setëmber 2005, nr. 45;
    
15. deponia provisora: la fasa de smaltimënt de refudam che stluj ite l’ativiteies de deposit de refudam aldò dl pont D15 dla njonta B;
    
16. amudlamënt: la fasa de recupereda dl refudam che stluj ite l’ativiteies de deposit de materiai aldò dl pont R13 dla njonta C;
    
17. deponia temporera: l amudlamënt de refudam fat dan l’abineda tla luegia ulache l vën prodot tenian ite la despusizions tecniches stabilides dala Jonta provinziela. L refudam, che se porta pro da ativiteies de manutenzion o da chi che fej lëures artejanei o de sostituzion de bëns pra terzi o da ativiteies de assistënza sanitera, vën ratà refudam prodot tla sënta o tl domizil dla porsona che à dejëut l’atività;
    
18. ressanamënt: duc i pruvedimënc per eliminé la funtanes de mpaziamënt y la sustanzes ajientes o i ntervënc per smendrì la cunzentrazion dla sustanzes ajientes prejëntes tl terac, sota tiera, tl’eghes sëura tiera o tl’eghes sota tiera nchin a n livel valif ai - o plu bas di - valores de cunzentrazion lim azetabli;
    
19. autosmaltimënt: l’ativiteies de smaltimënt de refudam dejëutes tla luegia de si produzion cun l’ezezion dl’ativiteies nunziedes pra i ponc D2, D8, D9, D13, D14 y D15 dla njonta B;
    
20. combustibl da refudam (CDR): l combustibl tlassificabl aldò dla normes tecniches UNI 9903 coche RDF (Refuse Derived Fuel) de cualità normala, che vën recuperà, tl respet dla gerarchia di tratamënc puscibli, dal refudam de nridlamënt y dal refudam speziel nia periculëus tres tratamënc per l’eliminazion dla sustanzes periculëuses per la combustion y per garantì na putënza de sciaudamënt adateda;
    
21. combustibl da refudam de cualità auta: combustibl tlassificà aldò dla normes tecniches UNI 9903-1 coche RDF (Refuse Derived Fuel) de cualità auta;
    
22. cumpost de cualità: prudot che vën davanià dal cumposté la pert organica dl refudam de nridlamënt, dl refudam dl’agricultura y dl’agrondustria tl respet dla despusizions tecniches che stabilësc la sustanzes de cuntenut y si adurvanza cumpatibla cun l ambient y cun la sanità, y n particuler, i gradi de cualità;
    
23. 4)
    
24. uele adurvà: uelesc ndustriei y uelesc unghënc, a basa minerela o sintetica, che ne possa nia plu unì nuzei per cie che i fova destinei, dantaldut uelesc adurvei de motores a combustion y dai sistems de trasmiscion, coche nce uelesc minerei per mascinns, turbines o cumanc idraulics y uelesc cuntenii ti filtri adurvei.