a) Lege Provinziala di 30 de setëmber dl 2005, n. 71)
Normes tla materia de nuzeda dl’eghes publiches 2)

(1)  L’eghes minereles tl raion dla provinzia de Bulsan ie pert dl patrimone nia despunibl dla Provinzia autonoma de Bulsan.

(2)  La cunzescion dl’eghes minereles, danter chëles che l vën ratà l’eghes minereles y termeles y l’eghes de sotfonz cun carateristiches chimiches particuleres, vën data aldò dla despusizions n forza tla materia d’eghes publiches, do che l ie unì recunesciù l’adatënza dl’eghes da pert dl’Agenzia provinziela per l ambient y do che chëst’eghes ie unides scrites ite tl indesc aposta, che ie unit apurvà dala Jonta provinziela.

(3)  Per l ciariamënt te bozes o per la nuzeda termela o terapeutica dl’eghes minereles vën l recunescimënt d’atatënza fat dal’Agenzia provinziela per l ambient adum cun l’Azienda sanitera de Bulsan.

(4)  I tratamënc cun ega nia terapeutics te strutures d’albierch y semientes, tipics dla tradizion locala, vën fac aldò dla disciplina provinziela sun l’ativiteies urganisedes y sun i tratamënc idrics, fisics y semienc dejëuc per fins nia terapeutics.

(5)  L decret de cunzescion dà dant la purtedes d’ega autorisedes coche nce la sort y l numer dla captazions. La manieres de mesurazion dla cuantiteies d’ega y l munté dla tarifes dl’ega vën determinei dala Jonta provinziela y ajurnei uni doi ani cun decret dl Diretëur dl’Agenzia provinziela per l ambient, sun la basa dla variazions dl custimënt dla vita aldò di indesc ASTAT. Per chësc fin vëniel tëut n cunscidrazion chisc parametri:

1. per l’eghes minereles destinedes a unì ciariedes te bozes:
   
   1. la purteda d’ega autoriseda aldò dl decret de cunzescion;
      
   2. la cuantità d’ega efetivamënter deriveda l ann dant;
      
   3. la cuantità d’ega ciarieda te bozes aldò che la bozes sibe cun uet a pierder o a reter;
      
   4. la sort y l numer de captazions d’ega aldò dla purtedes cunzedudes;
      
2. per l’eghes destinedes a na nuzeda termela o terapeutica:
   
   1. la purteda d’ega autoriseda aldò dl decret de cunzescion;
      
   2. la cuantità d’ega efetivamënter deriveda l ann dant;
      
   3. la sort y l numer de captazions d’ega aldò dla purtedes cunzedudes;
      
3. per d’autra nuzedes nia terapeutiches:
   
   1. la purteda d’ega autoriseda aldò dl decret de cunzescion;
      
   2. la cuantità d’ega efetivamënter deriveda l ann dant;
      
   3. la sort y l numer de captazions d’ega aldò dla purtedes cunzedudes.
      

(6)  A pië via dal prim de jené 2018 vën la tarifes de cunzescion idrica determinedes sun la basa dla purteda dl’ega cunzeduda tl decret de cunzescion, sciche nce n basa ala sort y al numer de captazions d’ega dac sëura iló. Tl calcul vëniel ratà la cuantiteies d’ega ciariedes te bozes ndichedes dal cunzesciuner tla comunicazion relativa. A pië via dal prim de jené 2019 vëniel nce ratà la cuantiteies d’ega museredes y efetivamënter derivedes l ann dant.

(7)  La despusizions per la cunzescion di cuntribuc udui danora dala lege provinziela di 8 de nuvëmber 1974, n. 18, y mudazions suzessives, ne vën nia aplichedes per l’eghes minereles nunziedes te chësc articul.

(8)  L’eghes minereles nunziedes tl coma 2 vën metudes sot a scunanza aldò dla despusizions dl titul II, capitul II, dla lege provinziela di 18 de juni 2002, n. 8, y mudazions suzessives. L ufize provinziel cumpetënt per la gestion dla ressurses idriches istituësc i raions de defendura che ie de bujën per l’eghes minereles nunziedes tl coma 2, che ne vën nia asseniedes n cunzescion; i raions de defendura vën manejei dala Repartizion provinziela Bosc. 26) 27)