(1) L eco-mprenditëur aldò dl articul 2, coma 1, pustom f), che à si sënta legala o na unità aziendela locala tla provinzia de Bulsan, nutificheia aldò dl articul 3 l scumenciamënt de si atività ala Repartizion, damandan tl medemo mumënt la iscrizion tl register. Na copia dla nutificazion muessa unì mandeda al organn de cuntrol cris ora.
(2) L organn de cuntrol cris ora muessa ti fé avëi ala Repartizion l atestat de cunformità cunstateda tla pruzedura de cuntrol. Te chësc atestat vëniel cunfermà che l eco-mprenditëur nutificà da nuef à i recuisic damandei dal regulamënt.
(3) Sce l atestat de cunformità ie positif, cumanda l diretëur dl ufize cumpetënt per l’agricultura biologica pra la Repartizion – do che la regularità dla nutifica y dla documentazion njunteda ala dumanda aldò dl coma 1 ie unda azerteda – la iscrizion dl eco-mprenditëur tl register curespundënt.
(4) Sce n eco-mprenditëur pierd i recuisic udui danora per la iscrizion tl register, cumanda l diretëur cumpetënt per l’agricultura biologica pra la Repartizion si cancelazion da chësc register; la dumanda per unì inò scric ite ne possa nia unì prejenteda dan che l ie passà trëi ani dala cancelazion.
(5) Contra la refudanza de iscrizion tl register y l pruvedimënt de cancelazion da chësc possa l eco-mprenditëur prejenté recurs ala Jonta provinziela tl tëmp de 30 dis da canche l à giapà la comunicazion relativa.