(1) Sce l vën, tla esecuzion dl’atività de verdia aldò dl articul 12, azertà che i organns de cuntrol ne à nia dejëut o mé dejëut n pert i duvieres udui danora dal articul 10, nvieia l diretëur dla Repartizion per scrit l organn de cuntrol respunsabl a eliminé la iregulariteies y la mancianzes azertedes.
(2) Tl cajo che l organn de cuntrol autorisà aldò dl articul 8, coma 1, vede inant a no ademplì a si duvieres, o sce l organn pierd i recuisic sun la basa de chëi che l ti ie unit cunzedù l’autorisazion, cumanda la Jonta provinziela cun n pruvedimënt mutivà la suspenscion dl eserzize dl’atività de cuntrol sun l teritore dla Provinzia de Bulsan per n tëmp nia plu curt de n ann y, ti caji plu griefs, la revucheda dl’autorisazion al’atività de cuntrol. L medemo vel canche l organn de cuntrol ne resultea nia plu cunform ai criteres nunziei pra l coma 9, coma 5, dl regulamënt o sce l ne à nia plu i recuisic aldò dl articul 9, comes 7, 8, 9 y 11.
(3) Sce l vën azertà la prejenza dla zircustanzes nunziedes tl coma 2 n cont de organns de cuntrol recunesciui a livel naziunel aldò dl articul 8, coma 2, cumanda la Jonta provinziela la suspenscion dl’atività relativa de cuntrol tla provinzia de Bulsan per n tëmp nia plu curt de n ann, tenian cont dla grievëza dl cumpurtamënt. La Jonta provinziela ti fej, oradechël, la pruposta al Ministere per la politiches agricules y di bòsc che l’autorisazion vënie revucheda aldò de cie che ie udù danora tl articul 4, coma 3 dl decret legislatif dl 17 de merz 1995, nr. 220.
(4) Do che l tëmp de suspenscion ie passà possa l organn de cuntrol nteressà inò tò su si atività sun l teritore provinziel, a cundizion che l ti débe ala Repartizion la proes a desmustrazion che la rejons, che à gaujà la iregulariteies y mancianzes, ie unides eliminedes.