j) Lege Provinziala di 3 de otober dl 2003, n. 151)
Paiamënt antizipà per l mantenimënt a defendura di minorenns

(1) Ti lims de cumpetënza dla Provinzia autonóma de Bulsan tla materia de assistënza y de benefizienza publica disziplinea chësta lege l paiamënt antizipà al genitor o a n’autra persona afidatera dla somes destinedes al mantenimënt dl minorenn, sce chësta somes ne vën nia paiedes dal genitor ublià ti tëmps y ala cundizions stabilides dal’autorità giudiziera.

(1) La rejon de damandé l paiamënt aldò dl articul 1 à l genitor o n’autra persona afidatera dl minorenn sce l minorenn ie:

1. n zitadin talian o n zitadin de n stat cumëmber dla Union europea che à la residënza y sta da almanco n ann tla provinzia de Bulsan, o
   
2. n zitadin de n stat che ne toca nia pra la Union europea o che ie zënza stat, y che à la residënza y sta da almanco cin ani tla provinzia de Bulsan.
   

(2) Nia la rejon al paiamënt antizipà per l mantenimënt ne à l genitor afidater che cunviv cun l genitor ublià al mantenimënt.

(1) Cundizions per la rejon al paiamënt antizipà ie:

1. la presënza de n titul esecutif che se stiza sun n pruvedimënt dl’autorità giudiziera taliana o de n auter stat fulestier che stabilësc la soma y la modaliteies dla cuntribuzion al mantenimënt da pert dl genitor nia afidater; i pruvedimënc dl’autoriteies giudizieres furestes o de d’autra autoriteies furestes cumpetëntes muessa vester recunesciui y detlarei esecutifs tla Talia, ora che sce i ie unic dac ora te n Stat cumëmber dla Union europeica lià dal protocol de Haag dl 23 de nuvëmber 2007; 2)
   
2. la presentazion dl’esortazion de paiamënt nutificheda aldò dla despusizions de lege, a chëla che l genitor ublià al paiamënt ne se à nia asogetà tl tëmp de 10 dis, o dla sentenza dla detlarazion de falimënt contra la persona che à la ublianza de paiamënt.
   

(1) La situazion economica dla persona damandënta ne daussa, tl mumënt che la fej dumanda per l paiamënt antizipà dl mantenimënt, nia sëurapassé l valor dla situazion economica curespundënta al 2,2 dla soma che ie debujën aldò dl articul 7-bis dl regulamënt d’esecuzion dla lege provinziela dl 30 d’auril 1991, nr. 13 y mudazions suzessives.

(2) L fator de valor dla situazion economica vën determinà dala cumbinazion dla situazion de davani y dla situazion patrimuniela dla persona che fej dumanda, aldò dl regulamënt d’esecuzion nunzià tl coma 1.

(3) Per azerté la situazion economica dla persona che fej dumanda vëniel tëut n cunscidrazion la familia coche udù danora dal regulamënt d’esecuzion nunzià tl coma 1.

(4) La jonta provinziela muda cun n pruvedimënt aposta l fator de valor dla situazion economica nunzià tl coma 1. 3)

(1) L ent che paia ora l’antizipazion per l mantenimënt tla mesura che curespuend al titul giudizier y te uni cajo, per uni minorenn, tla mesura mënsila nia plu auta che l 80 percënt dla cuota de basa nunzieda tl articul 2, coma 1, pustom b), y tl articul 14 dl decret dl Presidënt dla jonta provinziela dl 11 d’agost 2000, nr. 30, y mudazions suzessives.

(2) Tl cajo de deplù minorenns vën la soma cumplessiva che possa unì paieda ora avaneda aldò di parametri dla scala de ecuivalënza nunzieda tla tabela 2 dla njonta A dl decret dl presidënt dla Jonta provinziela dl 11 de agost 2000, nr. 30, y mudazions suzessives.

(1) Ora che la funzions aministratives liedes ala recupereda dl’antizipazion paieda ora, ti vën la funzions aministratives che reverda l ntervënt de assistënza udù danora da chësta lege deleghedes ai chemuns aldò dl articul 10 dla lege provinziela dl 30 d’auril 1991, nr. 13, y mudazions suzessives. 4)

(1) La dumanda per giapé l’antizipazion dl paiamënt per l mantenimënt ie da presenté ala cumenanza raionela dl teritore te chël che la persona che à la rejon ie residënta.

(2) Sce la dumanda ne ie nia cumpleta y la ne vën, zënza rejons giustifichedes, nia ntegreda dala persona che fej dumanda tl tëmp de 15 dis da canche la à giatà la damandeda de ntegrazion, vën la dumanda refudeda.

(3) Sce la documentazion ududa danora dal articul 3 ie scrita te n’autra rujeneda che no chëla taliana o tudëscia, iel dedebujën de njunté la traduzion de chisc documënc tla rujeneda taliana o tudëscia.

(1) L paiamënt antizipà vën fat dala cumenanza raionela aldò dla modaliteies nunziedes tl articul 7 dl decret dl Presidënt dla jonta provinziela dl 11 d’agost 2000, nr. 30 y mudazions suzessives, n basa ala detlarazions fates dala persona damandënta y, n cajo, nce tenian cont dla nfurmazions tëutes d’ufize, nce tres na vijita a cësa, per ntegré y cunfronté al fin de na valutazion la nfurmazions che ie bele da garat.

(2) Sce per la dezijion n cont dla cunzeduda dl’antizipazion dl paiamënt iel da valuté cundizions d’ezezion, ti spieta la dezijion al cumité tecnich istituì pra l raion soziel cumpetënt per l teritore, aldò de cie che ie stabilì dal articul 8 dl decret dl Presidënt dla jonta provinziela dl 11 d’agost 2000, nr. 30, y mudazions suzessives.

(1) Cun l paiamënt antizipà vëniel scumencià n l prim di dl mëns dla presentazion dla dumanda, sce chësta ie unida presenteda dan l vintejim di de chël mëns, sce no, dal prim di dl mëns do.

(2) L paiamënt antizipà vën fat per la dureda de n ann n iede al mëns y, acioche n posse n giaudei inant, iel da fé na dumanda, a chëla che l ie da njunté na autodetlarazion, aldò dl articul 5 dla lege provinziela dl 22 de utober 1993, nr. 17, che atestea che la situazion preududa dala lege va inant.

(1) Contra la dezijion dla cumenanza raionela possa la persona che fej dumanda presenté recurs per rejons de legitimità y de merit ala sezion recursc dla consulta provinziela dl’assistënza soziela nunzieda tl articul 4, coma 3, dla lege provinziela dl 30 d’auril 1991, nr. 13, y mudazions suzessives, tl tëmp de 30 dis a pië via dala nutificazion dla comunicazion.

(1) Sce, tl cajo de n cuntrol, ne respuend la persona che benefizieia dl paiamënt nia tl tëmp de 30 dis da canche la à giatà la dumanda de azertamënt, fërma la cumenanza raionela preventifmënter l paiamënt antizipà per l mantenimënt.

(2) La cumenanza raionela detlarea la destumeda dl dërt al paiamënt antizipà per l mantenimënt sce:

a) la persona benefizienta ne desmostra nia de avëi inò duc i recuisic udui danora dala lege per giaté l paiamënt antizipà tl tëmp de trëi mënsc dala data che l ti ie unì fermà chësc paiamënt.

b) la persona che benefizieia dl paiamënt ne respetea nia la ublianza de ti comuniché debota al ent paiënt uni mudamënt, ënghe sce mé de carater temporer, de si stat y de si situazion persunela, de davani y de patrimone, che possa putenzialmënter avëi fazion sun i recuisic per l dërt al paiamënt antizipà.

(1) Cundizion acioche l vënie paià l’antizipazion per l mantenimënt ie che la persona damandënta feje subentré la Provinzia autonóma de Bulsan te si dërc ti cunfronc dla persona ublieda aldò dl articul 1201 dl codesc zevil y che la l comunicheie ala persona ublieda cun na lëtra recumandeda cun rezevuda retuda.

(2) La Provinzia autonoma scudësc la somes paiedes ora danora y i fic madurei diretamënter dala persona oblieda al mantenimënt. L ie da paië i fic dal prim di d’erogazion de uni paiamënt dl mëns. 

5) 6)

(3) La somes paiedes ora danora ne vën nia scudides te chisc caji:

1. la cundizion economica dl genitor ublià al mantenimënt ne ie nia plu auta che 1,5 iedesc l davani minim de nserimënt determinà cun l regulamënt d’esecuzion nunzià tl articul 7/bis, coma 3, dla lege provinziela di 30 d’auril 1991, n. 13, y mudazions suzessives;
   
2. l’adres dl genitor ublià al mantenimënt che ie residënt y/o sta dedora dal teritore naziunel ne ie nia cunesciù y nia da abiné ora.  7)
   

(1) La spëises, che se porta pro da chësta lege a cëria di eserzizies 2004 y 2005 per l’antizipazion dla somes per l mantenimënt di minorenns y che vën sciazedes ntëur ai 220 mile euro al ann a pië via dal eserzize finanzier 2004, vën curides a chësta maniera:

1. per la soma de 55 mile euro al ann tres ntredes curespundëntes, che pervia dla surogazion dla Provinzia, aldò dl articul 12 de chësta lege, vën ratedes scudibles dal debit di genitores ubliei al mantenimënt;
   
2. per la pert restënta di de ndut 330 mile euro per i ani 2004 y 2005, tres na cuota curespundënta dl stanziamënt udù danora per l bienn 2004-2005 tl bilanz trienal 2003-2005, funzion 27, pustom b.1.
   

(2) La spëisa per i eserzizies suzessives unirà autoriseda cun lege finanziera anuela.

(1) Chësta lege va n forza ai prim de jené 2004.

Chësta lege unirà publicheda tl Buletin Ufiziel dla Region. Uni un, a chël che ti spieta, ie ublià a la respeté sciche lege provinziela y a la fé respeté.