a) Lege Provinziala di 20 de forà dl 2002, n. 31)
Disciplina di ufizies de viac y turism

(1) L eserzize dl’ativiteies aldò dl articul 2 y la giaurida di ufizies de viac y turism ie sometui al’autorisazion dl assessëur provinziel al turism.

(2) La dumanda curespundënta, che cuntën duta la generaliteies dla persona che fej dumanda, la denuminazion crissa ora y l’adres ie da presenté ala Repartizion provinziela per l turism, l cumerz y i servijes. La persona che fej dumanda muessa detlaré:

1. de avëi i recuisic sogetives udui danora dal articul 11 dl decret dl rë dl 18 de juni 1931, nr. 773 y mudazions suzessives;
   
2. de avëi la capazità de se deriejer aldò dl codesc zevil y de seguré la fidanza che ie debujën
   
3. de avëi da garat i locai ndependënc y de azes saurì, te chëi che l vën mé dejëut l’atività d’ufize de viac y turism:
   
4. de avëi da garat la njinies adatedes al’atività dl’azienda.
   

(3) Tla dumanda muessel oradechël ënghe vester cuntenì chësta detlarazions sostitutives revardëntes:

1. la zitadinanza y la residënza;
   
2. la cualifica de diretëur tecnich;
   
3. l mpëni de lauré dantaldut tl ufize de viac;
   
4. l’anutazions che ie n cajo unides fates tl register giudizier y la pruzedures penales pendëntes;
   
5. la pruzedures de cuncurs, sce l nen ie;
   
6. la iscrizion tl register dl’aziendes.
   

(4) Sce la persona che se ncëria dla direzion tecnica dl’azienda ne curespuend nia ala persona che fej dumanda, muessa la dumanda nce cuntenì duta la generaliteies dl diretëur tecnich. Chësc ultim muessa oradechël ënghe detlaré de avëi i recuisic aldò dl coma 3, pustoms a), b), c) y d).

(5) Ala dumanda iel ënghe da njuné l plann di locai dl ufize.

(6) La dumanda ie rateda azeteda sce ala persona che fej dumanda ne ti vën l pruvedimënt de refudeda nia comunicà tl lim de tëmp de 30 dis da canche la dumanda ie unida presenteda, o te n lim de tëmp eventualmënter stabilì per la regularisazion dla documentazion che ie debujën.