(1) L’aziendes che dejëuj n’atività de autoservijes publics nia de linia possa urganisé, diretamënter y zënza autorisazion, jites y viages cun nia plu che un n pernuetamënt. Prupostes y iscrizions per la jites y i viages nunziei possa nce unì fates cun remburseda dla spëises curespundëntes tres la urganisazion turistica locala. Chësc vel ënghe per i ufizies de viac y turism. Oradechël ie chësta aziendes sometudes ala despusizions aldò dl articul 12 y dl articul 15, coma 1, pustomes a), b), c), d), e) y i).
(2) La urganisazion provinziela cumpetënta per la promozion turistica dl Südtirol y la urganisazions turistiches aldò dl articul 2, coma 1 dla lege provinziela di 19 de setëmber 2017, n. 15, possa dejëujer la resservazion de sojurnanzes, ënghe cun prestazions de njonta tipiches, zënza l’autorisazion nunzieda tl articul 3, a cundizion che chësc sibe limità al raion de cumpetënza y ti lims aldò dl articul 12. 4)
(3) La scoles d’alpinism, i mëinacrëp y i mëinaschi possa se cruzië diretamënter, mé per si tlienc dl alojamënt, dl trasport y d’autri servijes che ie n cajo debujën per fé arpizedes y escursions tl’Europa, tl respet dl articul 12 y dl articul 15, coma 1, pustoms a), b), c), d), e), f), g) y i). La urganisazion de jites te duc i autri paejes ie sometuda ala despusizions nunziedes tl articul 16, coma 6.
(4) Chi che gestësc n portal internet, de chël che l servisc ie la prenotazion de sojurnanzes zënza servijes de njonta, ne ie nia sometù ala ublianza d’avëi l’autorisazion nunzieda tl articul 3. Nia sometui ala ublianza d’avëi n’autorisazion ne ie ënghe de no i gestëures de chëi portai internet, sun chëi che, ora che la prenotazion de sojurnanzes vëniel nce pità servijes, a cundizion che chisc ne reprejënte nia na pert sustanziela dl valor cumplessif dl servisc turistich cunlià o che i ne vënie nia retlamisei sciche sce i l fossa o che i ne reprejenteie nia n elemënt essenziel dl viac o dla vacanza. 5)
L articul 18, coma 2, ie unì mudà nsci dal articul 54, coma 2, dla L.P. di 11 de lugio 2018, n. 10.
L articul 18, coma 4, ie unì njuntà dal articul 29, coma 1, dla L.P. di 6 de lugio 2017, n. 8.