a) Lege Provinziala di 20 de forà dl 2002, n. 31)
Disciplina di ufizies de viac y turism

(1) I programs metui a jì dai ufizies de viac y turism y dal’aziendes nunziedes tl articul 18 che trata di viages, dla escursions y dla crëujedes, cun o zënza prestazions n cont dla sojurnanza, muessa cuntenì, ai fins de si publicazion tla forma de brosciura ufiziela, nfurmazions a puntin y esplizites sun:

1. l soget produtëur o urganisadëur dl viac;
   
2. i dis de viac;
   
3. la dureda cumplessiva y l numer di pernuetamënc;
   
4. la cuotes de partezipazion, cun la ndicazion dl priesc global curespundënt a duc i servijes pitei y dl acont che ie n cajo da paië pra l’ata de iscrizion, sciche nce la ndicazion dla destumënzes di tëmps per l paiamënt dla soma che ie mo da paië;
   
5. la cualità y la cuantità di servijes per cie che reverda l hotel o n’autra sort de alojamënt, la cumpëida di cëifs, l trasport y la ufierta de acumpaniadëures y mëinaturisć y dut cie che ie cuntenì tl priesc de partezipazion; tl particuler, muessel n cont di mesuns de trasport, unì dat sëura la tipologies y la carateristiches, y n cont dl albierch o dl alojamënt, la categoria y la nluegeda;
   
6. i lims de tëmp per l’apustedes y per i rezesc dal’apustedes;
   
7. la cundizions per la remburseda de somes bele paiedes ite, sibe tl cajo de rezesc da pert di tlienc, sibe tl cajo dl anulamënt dl viac da pert dl ufize de viac o per forza plu auta o per d’autra gaujes prestabilides danora;
   
8. la dureda de validità dl program;
   
9. i dac dla garanzia dl’assegurazion aldò dl articul 12 cun la ndicazion di riscs curìi;
   
10. la cumpëida minima de partezipanc che ie, n cajo, debujën per mëter a jì l viac, y l tiermul per ti fé al savëi ala persona che à apustà l servisc sce l viac vën anulà;
    
11. i dac dl’autorisazion dl’atività;
    
12. la mesures igeniches per la prevenzion de malaties, sciche nce nfurmazions genereles n cont de visums y passaporc, de chëi che l partezipant à debujën per pudëi se nuzé di servijes turistics udui danora tl program de viac;
    
13. la detlarazion che tl cuntrat iel te uni cajo da apliché la lege dl 27 de dezëmber 1977, nr. 1084 y l decret legislatif dl 17 de merz 1995, nr. 111, ënghe sce l vën dat sëura n’autra tlausula.
    

(2) I programs de viac dl’assoziazions y urganisazions nunziedes tl articul 16 muessa cuntenì la nfurmazions nunziedes tl coma 1, pustoms a), b), c), d), e) y l). La despusizions dl pustom m) muessa unì respetedes sce l ie tl viac plu che set pernuetamënc.

(3) Tl cuntrat de viac muessa l program de viac vester nunzià espressamënter.

(4) L program de viac ie l elemënt de referimënt per determiné sce i servijes mpermetui ie efetivamënter unic mantenìi.

(5) L ie pruibí dé ora publicazions che ne curespuend nia ala despusizions de chësta lege.