b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1)  Le presidënt o la presidënta dl Zënter operatif provinzial y dl Comitê provinzial por la proteziun zivila à i dovëis suandënć:

1. convochè y presidié le Zënter operatif provinzial y le Comitê provinzial por la proteziun zivila;
   
2. mantignì n contat costant cun le Comissariat dl Govern por coordiné l’ativité dl’aministraziun provinziala cun chëra dl Stat;
   
3. coordiné l’atuaziun di programs provinziai, comunai y raionai, y inće l’ativité dles strotöres preodüdes dal articul 2, dles scuadres de pröm aiüt y dles organisaziuns de volontariat por la proteziun zivila en general;
   
4. ti presentè al Presidënt dla Provinzia la domanda de detlaraziun dla situaziun d’emergënza o de catastrofes naturales y ti propone la delimitaziun dla zona interessada dl teritore provinzial aladô dl articul 34 dl decret dl Presidënt dla Republica di 22 de merz dl 1974, n. 381, tan inant che le Presidënt dla Provinzia ne n’é nia instës le Presidënt dl Comitê provinzial por la proteziun zivila;
   
5. ti presentè al Presidënt dla Provinzia la proposta por l’ordinn d’evacuaziun di abitanć de plü comuns aladô dl articul 52 dl decret dl Presidënt dla Republica di 31 d’agost dl 1972, n. 670, tan inant che le Presidënt dla Provinzia ne n’é nia instës le Presidënt dl Comitê provinzial por la proteziun zivila;
   
6. presentè ala Junta provinziala la proposta de surandè a repartiziuns y strotöres d’organisaziun provinziales la realisaziun di laûrs por garantì intervënć aprontà ti caji de prigo por la segurëza y la sanité publica y, sce al va debojëgn, propone la prelevaziun de imporć dai fonds de resserva por spëises nia preodüdes y urgëntes y le lian corespognënt sön i capitui dl bilanz provinzial;
   
7. te caji de catastrofes presentè al’autorité statala competënta l’emanaziun dl’ordinanza de proteziun zivila por l’anulamënt dl dovëi de paié cutes y tasses.